11 Jan 2024, 18:00
އެމްޓީސީސީން މިދިޔަ ނޮވެމްބަރު މަހުން ފެށިގެން މިދިޔަ މަހުގެ ނިޔަލަށް ކުރިއަށް ގެންދިޔަ "ކަށަވަރު ޕްރޮމޯ"ގެ ލަކީޑްރޯ ނަގައިފިއެވެ.
މިއަދު އެމްޓީސީސީގެ ކަށަވަރު ޝޯރޫމްގައި އޮތް އެ ރަސްމިއްޔާތުގައި ގުރުއަތު ނެގީ އެ ކުންފުނީގެ ސީއީއޯ އަބްދުﷲ ޒިޔާދެވެ. މި ޕްރޮމޯގެ ދަށުން ދެނީ 175 ހޯސްޕަވަރުގެ ސުޒުކީ އިންޖީނެކެވެ.
އެމްޓީސީސީ ގެ ސީއީއޯ އަބްދުﷲ ޒިޔާދު ވާހަކަ ދައްކަވަނީ--ސަން ފޮޓޯ:އިންފިނެޓް މުމެންޓްސް/ މޫސާ ނަދީމް
އެމްޓީސީސީގެ ސީއީއޯ އަބްދުﷲ ޒިޔާދު ވިދާޅުވީ މި ޕްރޮމޯޝަންގެ އެންމެ ބޮޑު ބޭނުމަކީ އެ ކުންފުނީގެ ކަސްޓަމަރުން އިތުރުކުރުން ކަމަށެވެ. އަދި އޭނާ ވިދާޅުވީ މި ޕްރޮމޯޝަނަކީ އެ ކުންފުނީގެ ޕްރޮޑަކްޓުތައް އިތުރަށް ޕްރޮމޯޓުކުރުމުގެ ގޮތުން ކޮންމެ އަހަރަކު ވެސް ބާއްވަމުންދާ ޕްރޮމޯޝަނެއް ކަމަށެވެ.
ޒިޔާދު ވިދާޅުވީ އެމްޓީސީސީގެ މެރިން ޕްރޮޑަކްޓުތައް ވިއްކަމުން އަންނަ "ކަށަވަރު" ޝޯރޫމް ތަރައްގީކޮށް އަޕްގްރޭޑުކުރުމުގެ މަސައްކަތްތަކާއި އެ ތަނުން ވިއްކާ ޕްރޮޑަކްޓުތައް އިތުރުކުރުމުގެ މަސައްކަތް ކުރުމަށް މިހާރު ރާވައިފައިވާ ކަމަށެވެ.
އަދި އޭނާ ވިދާޅުވީ ކަސްޓަމަރުން އިތުރުކުރުމަށް ޓަކައި ރާއްޖޭގެ އެކި ހިސާބުތަކުން ކަސްޓަމަރުން ހޯދުމުގެ މަސައްކަތްކޮށް، އެ ކުންފުނީގެ ޕްރޮޑަކްޓުތަކާއި ޚިދުމަތްތައް ރާއްޖޭގެ އެކި ހިސާބުތަކަށް ފުޅާކުރުމަށް މަސައްކަތްކުރުމަށް ވެސް ރާވައިފައިވާ ކަމަށެވެ.
ހަމައެއާއެކު އެންމެ ބޮޑު އަމާޒަކީ އެ ކުންފުނީގެ ސޭލްސް ކުރިއަށް އޮތް ތިން އަހަރު ދުވަހުގެ ތެރޭގައި 60 ޕަސެންޓަށް އިތުރުކުރުން ކަމަށް ވެސް ފާހަގަކުރެއްވިއެވެ.
އެމްޓީސީސީއިން ކޮންމެ އަހަރެއްގެ ވެސް ނޮވެމްބަރު މަހުން ޑިސެމްބަރު މަހަށް "ކަށަވަރު ޕްރޮމޯ"ގެ ނަމުގައި ޕްރޮމޯޝަނެއް ކުރިއަށް ގެންދެއެވެ. މި ޕްރޮމޯޝަނުގައި ބޮޑެތި ޑިސްކައުންޓުތައް ވެސް ދެއެވެ.