11 Jan 2024, 16:45
މިހާރު ކުރަމުން އަންނަ ވިއްސާރައިގެ ސަބަބުން ކްރިމިނަލް ކޯޓަށް ފެން ވަދެ ސާވާތަކަށް ގެއްލުންވާތީ، ވީޑިއޯ ކޮންފަރެންސް މެދުވެރިކޮށް ޝަރިއަތްތަށް ކުރިއަށް ގެންދިއުން، އަންނަ ހޯމަ ދުވަހުން ފެށިގެން ހުއްޓައިލާނެ ކަމަަށް ކްރިމިނަލް ކޯޓުން މިއަދު ބުނެފިއެވެ.
ކޯޓުން މިއަދު ނެރުނު ބަޔާނެއްގައި ބުނީ، ވިއްސާރައިގެ ސަބަބުން އެ ކޯޓުގެ ކަރަންޓު ވިއުގައަށް އޭގެ އަސަރު ކުރަމުން އަންނަ ކަމަށެވެ. އެގޮތުން ސާވާތަކަށް ފެނުގެ އަސަރުކޮށް، އެކި ވަގުތުތަކުގައި، ނެޓްވޯކް ކެނޑޭކަމަށް އެ ކޯޓުން މައުލުމާތު ދިނެވެ.
އެހެންވެ ސާވާތައް ރައްކާތެރިކުރުމުގެ ގޮތުން އެހެން އިމާރާތަކަށް ބަދަލުކުރާތީ ވީޑިއޯ ކޮންފަރެންސް މެދުވެރިކޮށް ޝަރީއަތް ކުރިއަށް ގެންދެވޭނެ ގޮތެއް މިހާރު ނެތްކަމަށް އެ ކޯޓުން ބުންޏެވެ.
އެއާއެކު އަންނަ ހޯމަ ދުވަހުން ފެށިގެން ބަންދާމެދު ގޮތެއް ނިންމުމުގެ ޝަރީއަތްތަކާއި އެހެނިހެން ޝަރީއަތްތަކުގެ އަޑުއެހުންތައް ކުރިއަށް ގެންދާނީ މައްސަލައިގައި ހިމެނޭ އެންމެން ކޯޓަށް ހާޒިރުކޮށްގެންކަމަށް އެ ކޯޓުން ވަނީ ބުނެފައެވެ.
ކްރިމިނަލް ކޯޓު ހިންގާ އިމާރާތަކީ ވަރަށް ބޮޑަށް ބާވެފައި ހުރި ތަނެކެވެ. އެ ކޯޓުގައި ޝަރީއަތް ހިންގާ ކޮޓަރީގައި ވެސް ރެނދުލައި، ބައެއް ތަންތަން ވެއްޓިފައި ވެސް އެބަހުއްޓެވެ.
މީގެ ކުރިން ވެސް ވިއްސާރަވެ ކޯޓަށް ފެން ވަނުމުން، މަސައްކަތް ކުރަން ދަތިވެ، މަސައްކަތް ހުއްޓައިލަން ޖެހިފައި ވެސް އެބަހުއްޓެވެ.