11 Jan 2024, 23:17
ކޮޕާ އިޓާލިއާގެ ސެމީ ފައިނަލުން ލާޒިއޯ އާއި އެޓަލާންޓާ ޖާގަ ހޯދައިފިއެވެ.
މި މުބާރާތުގެ ސެމީ ފައިނަލުން ލާޒިއޯ ޖާގަ ހޯދީ ކުއާޓާ ފައިނަލްގައި ވާދަވެރި އޭއެސް ރޯމާއާއި ބައްދަލުކުރި މެޗު 0-1ގެ ނަތީޖާއަކުން ކާމިޔާބު ކޮށްގެންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނުނު މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ ރޯމާއިން އުފެއްދި އިރު ދެ ޓީމަށް ވެސް ހަމަލާ އުފެއްދިފައިވަނީ ހަމަހަމަކޮށެވެ.
މި މެޗުގެ ފުރަތަމަ ހާފްގައި ލަނޑެއް ނުފެނުނު ނަމަވެސް ލަނޑު ޖަހާނެ ފުރުސަތު ދެ ޓީމަށް ވެސް ލިބިގެންދިޔައެވެ. މި މެޗުގައި ލާޒިއޯއިން ކާމިޔާބުކުރި ހަމައެކަނި ލަނޑު މެޗުގެ 51ވަނަ މިނެޓްގައި ޖަހައިފައިވަނީ ލިބުނު ޕެނަލްޓީއަކުން މަޓިއާ ޒަކަގްނީއެވެ.
މި މެޗުގައި އިތުރު ލަނޑެއް ނުފެނުނު ނަމަވެސް ތިން ރަތް ކާޑުވަނީ މެޗުގެ އިތުރު ވަގުތުގައި ފެނިފައެވެ. މި ގޮތުން އިތުރު ވަގުތުގެ ހަވަނަ މިނެޓްގައި ދެވަނަ ރީނދޫ ކާޑާއެކު ލާޒިއޯގެ ޕެޑްރޯއަށް ރަތް ކާޑު ދެއްކިއިރު އިތުރު ވަގުތުގެ 10 އަދި 11 ވަނަ މިނެޓްގައި ރޯމާގެ ސަރްދާރު އަޒްމޫން އާއި ޖިއާންލޫކާ މަންޗީނީއަށް ވެސް ވަނީ ސީދާ ރަތް ކާޑު ދައްކައިފައެވެ.
ސެމީ ފައިނަލްގައި ލާޒިއޯ ބައްދަލުކުރާނީ ޔުވެންޓަސް އާއި ފްރޮސިނޯން ބައްދަލުކުރާ މެޗުން މޮޅުވާ ޓީމަކާއެވެ.