11 Jan 2024, 15:47
ސްޕެނިޝް ސުޕާ ކަޕްގެ ފައިނަލުން ރެއާލް މެޑްރިޑް ޖާގަ ހޯދައިފިއެވެ.
ރެއާލްއިން މި މުބާރާތުގެ ފައިނަލުން ޖާގަ ހޯދައިފާވަނީ ސައުދީ އަރަބިއާގައި ރޭ ކުޅުނު ސެމީ ފައިނަލްގައި ވާދަވެރި އެޓްލެޓިކޯ މެޑްރިޑާ ބައްދަލުކޮށް ފުރިހަމަ ވަގުތު ހަމަވިއިރު ތިން ލަނޑު ތިން ލަނޑުން ދެ ޓީމު އެއްވަރު ވުމުން ކުޅުނު އިތުރު ވަގުތުގައި ކާމިޔާބު ކުރި ދެ ލަނޑާއެކު ފަސް ލަނޑު ތިން ލަނޑުންނެވެ.
ދެ ޓީމުގެ ފަރާތުން ވާދަވެރި އަދި ފޯރިގަދަ ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ރެއާލް އިންނެވެ. ނަމަވެސް މި މެޗުގެ ފުރަތަމަ ލަނޑު ޖަހާ މެޗުގެ ލީޑު ނަގާފައިވަނީ އެޓްލެޓިކޯއިންނެވެ. މި ލަނޑު މެޗުގެ ހަ ވަނަ މިނެޓްގައި އެ ޓީމަށް ކާމިޔާބު ކޮށްދިނީ މާރިއޯ ހާމޯސޯއެވެ. މިމެޗުގައި ރެއާލްއިން މެޗުގެ ނަތީޖާ ހަމަހަމަ ކުރި ލަނޑު މެޗުގެ 20 ވަނަ މިނެޓްގައި ޖަހައިދިނީ އެންޓޯނިއޯ ރުޑިގާއެވެ. އަދި މި ލަނޑު ޖެހިތާ ނުވަ މިނެޓް ފަހުން ރެއާލް އިން ވަނީ މި މެޗުގެ ލީޑު ނަގާފައެވެ. މި ލަނޑު އެ ޓީމަށް ޖަހައިދިނީ ފާލަންޑް މެންޑީއެވެ.
ނަމަވެސް މިލަނޑު ޖެހިތާ އަށް މިނެޓް ފަހުން އެޓްލެޓިކޯއިން ވަނީ މެޗުގެ ނަތީޖާ ހަމަހަމަ ކޮށްފައެވެ. މި ލަނޑު އެ ޓީމަށް ޖަހައިދިނީ އެންޓޮއިން ގްރީޒްމަންއެވެ.
މި ލަނޑާއެކު ގްރީޒްމަން ވެފައިވަނީ އެޓްލެޓިކޯގެ ތާރީހުގައި އެންމެ ގިނަ ލަނޑު ޖެހި ކުޅުންތެރިއާއަށް ވެގެން ގޮސްފައެވެ. ގްރީޒްމަން ވަނީ މިހާތަނަށް 174 ލަނޑު އެ ޓީމަށް ކާމިޔާބު ކޮށްދީފައެވެ. މި ރިކޯޑް ރެއާ ހަމައަށް އޮތީ އެޓްލެޓިކޯގެ ކުރީގެ ތަޖްރިބަކާރު ކުޅުންތެރިޔާ ލުއިސް އަރަގޮނޭޒް އަތުގައެވެ. މި ލަނޑާއެކު މި މެޗުގެ ފުރަތަމަ ހާފު ނިމިގެންދިޔައީ ދެ ލަނޑު ދެ ލަނޑުން ދެ ޓީމު އެއްވަރު ވެގެންނެވެ.
މި މެޗުގެ ދެވަނަ ހާފުގައިވެސް ދެ ޓީމުން ވަނީ ހަމަލާއަށް އިސްކަން ދީގެން ކުޅެފައެވެ. މި ހާފުގައިވެސް ފުރަތަމަ ހާފެކޭ އެއްގޮތަށް އެންމެ ފުރަތަމަ ލީޑު ނަގާފައިވަނީ އެޓްލެޓިކޯއިންނެވެ. ނަމަވެސް މެޗުގެ 78 ވަނަ މިނެޓްގައި އެޓްލެޓިކޯއިން ކާމިޔާބު ކުރި ތިން ވަނަ ލަނޑަކީ ރެއާލްގެ ރުޑިގާ އަތުން ބައިކޮޅަށް ވަން ލަނޑެކެވެ.
މި މެޗުގައި ރެއާލްއިން ދެވަނަ ފަހަރަށް މެޗުގެ ނަތީޖާ ހަމަހަމަ ކޮށްފައިވަނީ މެޗުގެ 85 ވަނަ މިނެޓްގައި ޑާނީ ކާވަހާލް ޖަހާދިން ލަނޑުންނެވެ. މި އާއެކު މި މެޗުގެ ފުރިހަމަ ވަގުތު ހަމަވިއިރު ނަތީޖާއަށް އިތުރު ބަދަލެއް ނައުމާއެކު ނަތީޖާ ނެރުމަށްޓަކައި އިތުރު ވަގުތުގެ ދެ ހާފު ކުޅުނެވެ.
މި މެޗުގައި ރެއާލްއިން ދެވަނަ ފަހަރަށް ލީޑު ނަގާފައިވަނީ އިތުރު ވަގުތު ނިމެން ހަތަރު މިނެޓަށް ވެފައިވަނިކޮށް ހޮސެލޫ ފޮނުވާލި ބޯޅައެއް އެޓްލެޓިކޯގެ ސްޓެފަން ސަވިޗް ގައިގައި ޖެހިފާ ވަން ގޯލެކެވެ. އަދި ރެއާލްގެ ފަސް ވަނަ ލަނޑު އިތުރު ވަގުތުގައި ޖަހައިދިނީ ބްރަހީމް ޑިއާޒްއެވެ. މި ލަނޑަކީ އެޓްލެޓިކޯގެ ކީޕަރު ޔާން އޮބްލެކްވެސް ކުރިއަށް އެރިވަގުތު ލިބުނު ބޯޅައެއްގައި ޑިއާޒް ކާމިޔާބު ކުރި ލަނޑެކެވެ.
މި ކާމީޔާބީއާއެކު ރެއާލް މިހާރު މި ވަނީ މި މުބާރާތުގެ ފައިނަލްގެ ފުރަތަމަ ޖާގަ ކަށަވަރު ކޮށްފައެވެ. ދެވަނަ ޖާގަ ކަށަވަރު ވެގެން ދާނީ މިރޭ އެންމެ ފަހުގެ ޗެމްޕިއަން އެފްސީ ބާސެލޯނާ އާއި އޮސަސޫނާގެ މެދުގައި ކުޅޭ ސެމީފައިނަލްގެ ދެވަނަ މެޗަށް ފަހުއެވެ. އެ މެޗުން ބާސާ މޮޅުވެއްޖެ ނަމަ މިވެގެންދާނީ ބާސާ އާއި ރެއާލް މި މުބާރާތުގެ ފައިނަލްގައި ޖެހިޖެހިގެން ކުޅޭ ދެވަނަ ފަހަރަށެވެ. މިދިޔަ އަހަރުގެ ފައިނަލްގައި ރެއާލް ވަނީ ބާސާ އަތުން ބަލިވެފައެވެ.