11 Jan 2024, 15:00
"ހެއި ދޮން...ނާޝްބެއާ މިއަދު ދިމާވި، ހުޝަލްގެ އެޕާޓްމެންޓުން ނިކުމެގެން އައި އިރު...ހީ ގްރީޓެޑް މީ... އެކަމަކު ހުޝަލް އާއި ވަރަށް ސުވާލު ކޮށލާނެ ކަންނޭނގެ....އަހަރުމެން ދެމީހުންވެސް ފެނުމުން ދިމާވެލީ ކަމަށް ހަދައިލީ..." މީކާއިލް ފޯނުން މެހެކް އަށް ހަބަރު ދިނެވެ. "އަލްޙަމްދުލިއްﷲ... ބައްޕަ އަށްވެސް އެނގޭނެ ދޯ ނާޝްބެ މިކޮޅުގަ ކަން...މީކާ އަށް ހީވޭތަ ބައްޕަ އަށް އެނގޭނެހެން ނަބިއްތަގެ ކަންތައްތައް..." މެހެކްގެ އަޑުގައިވީ ކަންބޮޑުވުމެވެ.
"ނާޝްބެ އާއި ބައްޕަ އަބަދުވެސް ކްލޯޒް އެކަމު ހީނުވޭ ބައްޕަ މިކަހަލަ ކަމެއްގައި ބައިވެރިވާނެ ހެނެއް...އަސްލު ނަބިއްތަ ކީއްވެބާ ނާވިޔާ އެއްގެ ވާހަކަ ދެއްކީ...ވަރަށް ބޭނުން އެއީ ކާކުތޯ ބަލަން..." މީކާއީލް ނާހަން ހުރެފައިވެސް މެހެކް ގާތު އަހާލެވުނެވެ.
"މީކާ...އެއީ ނަބިއްތަ ގެ ގައިގަ ހުރި ޖިންނި ދައްކާ ވާހަކަ...ފޯކަސް ގެއްލުވަން އެމީހުން ބޭނުންވާނީ...ނުލަފާ ޖިންނީން ހަދާނީ ދޮގު...ފިތުނަ އުފައްދަން ކިޔާހާ އެއްޗިހި...އެހާ އަޅާނުލާ...ނާވިޔާ އަކީ ހުޝަލްގެ އާންޓް....ނަބިއްތަގެ ހާފް ސިސްޓަރ...ޕްރެގްނެންސީގައި ނިޔާވެފަވީ. އެއީ މަންމަގެ ވެސް ވަރަށް ގާތް ރައްޓިއްސެއް..." މެހެކް ކިޔައިދިނެވެ. ***
ހުޝަލް އަށް ހެވުނެވެ. އަދި އަމިއްލަ ނަފްސަށް މަލާމާތްކުރެވުނެވެ. ނާޝިދު ކަހަލަ މީހެއްގެ ކިބައިން ތެދު ބުނުމަށް އުންމީދުކުރެވުނު މޮޔަ ހިތަށް ގެނެވުމުންނެވެ. "ފަސް ގަޑި އިރު ކާރުގައި ދަތުރުކޮށް ތިޔައީ ބިންކޮޅު ހޯދަން ދޯ.... މަންމަގެ ލާރީގައި އުޅެވޭލެއް އަދިވެސް މަދީތަ؟" އިސް ޖަހައިގެން ކުރިމަތީ އިން ނާޝިދު އަށް ބަލަހައްޓައިގެން ހުރެ ހުޝަލް އެއްސެވެ.
"ދަރިފުޅާ..ޕްލީޒް...މިއީ ބައްޕަގެ ފައިދާ އަކަށް ކުރާ ކަމެއް ނޫން...އެހެންނޫނަސް މާޒްވިލާ އެ ބިމުގެ ދިހަ ބިން ވަރު ވާނެ....." ނާޝިދު ބޭނުންވީ ހުޝަލް އެ ބިން ދޫކުރުމަށް ވިސްނައިދިނުމަށެވެ. "ވަރަށް ސާފު ސީދާކޮށް ބުނަންތަ ވާހަކައެއް..." ހުޝަލް ނާޝިދު އާއި ހަތަރު ކަޅި ހަމަ ކޮށް ޝަހާދަތް އިނގިލި ނާޝިދު އަށް ދިއްކުރިއެވެ.
"ތި ނާޝިދުއަށް އެ ބިން ނުދޭނަން... ހިލޭ މީހަކަށް ދޭން ޖެހުނަސްވެސް ތި ނާޝިދަކަށް ނުދޭނަން." ހުޝަލް ތެދުވެގެން ދިޔައީ ލޮލުގައި ކަރުނަ ފުނި ޖެހިފައި ހުރެއެވެ. ނާޝިދަކީ އޭނާގެ ބައްޕަ ކަމުގައި ވިޔަސް ދުނިޔެ މަތީން އެހާ ފުހިވާ މީހެއް ނުހުރެއެވެ. ނަބީލާގެ އެކަނިވެރި ދިރިއުޅުމާއި ރުއި ރުއުމަކީ ހުޝަލްގެ ހަނދާނުން ދުވަހަކުވެސް ފިލައިގެންދާނެ ކަންތައްތަކެއް ނޫނެވެ. ނާޝިދުގެ އަގުބޮޑު ދިރިއުޅުމުގެ ފަހަތުގައި ވަނީ ނަބީލާގެ މުދާވެރިކަމެވެ. ނާޝިދުގެ ދިރިއުޅުމުގައި އެތައް ގިނަ ހިލޭ އަންހެނުންތައް ގެންގުޅުނު އިރު އެ ހިތްދަތިކަން ތަހައްމަލް ކުރި ނަބީލާގެ އިހުސާސް ހުޝަލް އަށް ރަނގަޅަށް އެނގޭނެއެވެ. ނަބީލާގެ ހާލަތު މިހާ ގޯސް ވާންޖެހުނީ ނާޝިދު އާއި ހެދީ ކަން ހުޝަލް ގަބޫލުކުރެއެވެ.
ހުއްޓުން އަރާފައި ހުރި ނާޝިދު އަށް ހުޝަލްގެ ރުޅި ފެނުމުން އަމިއްލަ ނަފްސު ކުށްވެރި ކުރެވެއެވެ. ބިއްލޫރިގަނޑުން ހުޝަލް ކާރަށް އަރައިގެން ދިޔަތަން ފެނުމުން ހިތުގައި ރިއްސިއެވެ. ނަމަވެސް އާދަމްގެ ފުށުން ސަލާމަތްވުމަށް އެ ގެ ބޭނުންވެއެވެ. ނާޝިދު ކޮންމެ ގޮތެއް ހަދާފައިވެސް އެ ގެ އާދަމަށް ދޭން ޖެހެއެވެ. އެވަގުތު ފޯނަށް އައި ކޯލުންވެސް ނާޝިދުގެ ހިތް ބިރުގަނެ އަވަސްވެލިއެވެ. ***
ނަމާދު ކޮޓަރީގައި އެކަނި އިން އުރުޖުވާން މުސައްލަމަތީ އިށީނދެގެން ދުޢާ ކުރަމުންދިޔައީ ކަރުނަތައް އޮހެމުންނެވެ. ދުނިޔެ އަކީ ވަގުތީ އެއްޗެއްކަން ހިތަށް ގެނެވެއެވެ. ދިރިއުޅުމުގައި ދިމާވަމުން ދިޔަ ކަންތައްތަކަކީ އެންމެ ބޭނުންވާގޮތެއް ނޫން ކަމުގައި ވިޔަސް ﷲ އަށް ޙަމްދުކޮށް ހުރިހާ ކަމެއްގެ ފަހަތުގައި ހެވެއް ވާނެކަން ހިތާއި ސިނކުޑިއަށް ވިސްނައިދެއެވެ. ކަރުނަތައް ފޮހެލާ އަވަހަށް ސަބީހާ ދެކެލުމަށް އައިސީޔޫ އަށް ދާން ހިނގަގަތެވެ. އެ ދިޔަ މަގުމަތީ އުރޖުވާނގެ ކޮނޑުގައި މީހަކު ޖެހިގަތެވެ. ސިއްސައިގެން ދިޔަ އުރުޖުވާންއަށް ފަހަތް ބަލާލެވުނު އިރު އެމީހާ ފެނި ހިތުގައި ބިރުވެރިކަމެއް އުފެދުނެވެ. މޫނެއް ނުފެނުނު ކަމުގައިވިޔަސް އުނދަގޫ އިހުސާސެއް ވިއެވެ. "އަނހަ.. މިއޮތް އައީ ނު...އުރޫޖް އަދި ތިރީސް މިނިޓް ވާނެ އޯ...އެއްޗެއް ކާންދާން ހިނގާ" މަދީނާ ބުންޏެއް ކަމަކު އެއީ އަސްލު މާޒިމް މަދީނާއަށް ދިން ހިޔާލެކެވެ. އުރުޖުވާން މުޅި ދުވަހުވެސް އެއްޗެއް ކޭ ކަމެއް ނޭނގެއެވެ. "އެ ކީއްވެ ލަސްވީ...." އުރޖުވާން ކަންބޮޑިވިއެވެ. "ނަތިން ޓު ވޮރީ...އެއީ ބެޑިންގްސް ޗޭންޖް ކުރާ ގަޑި ވީމަ" މާޒިމް ގެ ބަރު އަޑުން ބުނެލިއެވެ. އުރުޖުވާން އަށް ބުނާނެ އެއްޗެއް ނޭނގުމުން ބޯޖަހައިލިއެވެ. "މާޒް....މާޒް ނުފެނިފަ އޭ މިހިރީ...ލެޓްސް ގޯ ފޯ އަ ކޮފީ....." ދުވަމުން އައިސް މާޒިމް ގައިގާ ބައްދާލީ ފަރަހްއެވެ. ހެޔޮވަރު އިސްކޮޅަކާއި މުށިކުލައިގެ އިސްތަށިގަނޑު ކޮނޑާހިސާބަށް ކޮށާލައިފައި އޮތް އިރު ހަންގަނޑުގައިވެސް ހުރީ މާޒިމް އާއި ދާދި އެއްވަރެއްގެ ދޮން ކަމެކެވެ. އުރުޖުވާންގެ ލޯ ބޮޑުވިއެވެ. މަދީނާ ގެ މޫނުމަތީން ފެނުނީ ފޫހި ކަމަކެވެ. ހަމަ އެތަން ވަޅުގައި ކެނާން ވެސް އައިސް ކުޑަކޮށް ކަރު ކަހައިލިއެވެ. ހަދާނެ އެއޗެއް ނޭނގިފައި ހުރެވުނު މާޒިމް ބޭނުންވީ އަވަހަށް ފަރަހް ދުރުކޮށްލުމަށެވެ. އުރުޖުވާންގެ މޫނަށް އައި ކުލަވަރު ވަރަށް ރަނގަޅަށް މާޒިމް އަށް ފެނުނެވެ. "ހައި...މާޒް ގެ ނެއިބަރ ދޯ...މާޒް ހާދަ ރަނގަޅޭ......ހުރިހާ އެންމެނަށްވެސް ވަރަށް އެހީ ވާނެ ވަރަށް ކައިންޑް ހާޓެޑް......" އުރުޖުވާން އަށް ހަނާ އަޅަމުން ފަރަހް ބުނެލިއެވެ. "ނޮޓް ނެއިބަރ...ވައިފް..." ކެނާން ފުރުސަތުގެ ބޭނުންކޮށް ފަރަހްއަށް ބުނެލިއިރު އަޑުގައިވީ ފަހުރުވެރިކަމެކެވެ. އެ ހަމަހިމޭންކަން ވެރިފައި އޮތް މުޅި ތާ ފަރަހްގެ ހުނުމުގެ އަޑު މިނެޓެއް ހާއިރު ހުއްޓެވެ. މާޒިމް އަށް ފަރަހް އުޅޭގޮތް ފެނި ރުޅި ވެސް އާދެވުނެވެ. އުރުޖުވާން ލަދުން ގޮތްހުސްވފައި ހުރީ ފަރަހްގެ މަލާމާތް އަޑު އިވަފައެވެ. "ކެނާންވެސް ދޯ ދެން....ތިހާ މަޖާ ވާހަކައެއް ދުވަހަކު ކޮޅުންވެސް އަޑުނާހަން...ނޯ އޮފެންސް އިނގޭ އެކަމް ތީ މާޒް ގެ ޓައިޕެއް ނޫން...." ފަރަހް ހެމުން ދިޔަ އިރު އުރުޖުވާން އަށް ބުނެލިއެވެ.
"ނޯ ޝީ އިޒް މައި ވައިފް......" ފަރަހްގެ ހުނުން މެދުކަނޑާލީ މާޒިމްގެ އަޑުންނެވެ. މޫނުގެ ކުލަ ވެއްޓެމުން ދިޔަ ފަރަހްގެ ފައިން ހީވީ ބިންގަނޑު ދަމައިގަތީ ހެންނެވެ. ބުނާނެ އެއްޗެއް ނޭނގި ރަކި ވެފައި ހުރި ފަރަހް ފެނުމުން މަދީނާ އާއި ކެނާންގެ މޫނުމައްޗަށް ލާނެތް ހިނިތުންވުމެއް ވެރިވިއެވެ. އުރުޖުވާން ގަތް ލަދުން ބޭނުންވީ ބިމުގެ އަޑިއަށް ވަދެގަންނަންށެވެ. ބޯވެސް ގުޑާފަ ހުރުމުން ގޮނޑީގައި ޖައްސާލެވުނެވެ. ވާނުވާ ނޭނގި ހުރި ފަރަހް އަށް މަދީނާ މިއަދު ކައިވެނި ކުރިކަން ކިޔައިދިނެއެވެ. ފަރަހް އަށް އުރުޖުވާންގެ މޫނަށް ބަލަހައްޓައިގެން ހުރެވުނީ ނަފްރަތުގެ ލޮލަކުން ކަމުގައި ވިޔަސް މާޒިމް މެން ކުރިމަތީ އެ ކަން ފޮރުވީ އެކަމަށް ވަރަށް އުފާވެއްޖެ ކަމުގައި ބުނަމުންނެވެ. ފަރަހް ފޯނު ބަލައިލުމަށް ފަހު ދާން ޖެހިއްޖެ ކަމަށް ހަދާފައިދިޔައެވެ.
"މިރޭ މާޒްވިލާ އަށް ދާން މާ ލަސްވެއްޖެ ކަންނޭނގެ..." ކެނާން ބުނެލީ ގަޑިއަށް ނަޒަރު ހިނގާލަމުންނެވެ. "ނޫން ލަހެއް ނުވޭ...މިރޭ ޗޭންޖް ވާން ވާނެ...ތަޅުދަނޑި ހަވާލުކުރަން ކޮނަސްޓްރަކްޝަން މީހާ އަންނާނެ ކަމަށް ބުނި އެ ގަޑިއަށް...މާޒްވިލާ އަށް މިރޭ ބަދަލުވާން ވާނެ އެންމެންވެސް...." މާޒިމް ބުނެލިއެވެ.
ލަދުން ކާން ނުކެރިފައި އިން އުރުޖުވާން އަށް މި ރޭ މާޒްވިލާއަށް ބަދަލުވާންޖެހޭކަން ރޭކާލީ ދެނެވެ. "އުރޫޖް އަދި އެކަމު ޕެކް ނުކުރެވޭ...މިރޭ ގޭގަ މަޑުކޮށްލިޔަސް އެންމެ ރަނގަޅުތަ...." ބިރުގެންފައި ހުރި އުރުޖުވާން މާޒިމް ގާތު އަހައިލީ އާ ގަންނަމުންނެވެ.
މާޒިމް އަށް ބުނެދޭން ނޭނގޭ ކަހަލަ އުފާވެރިކަމެއް އިހުސާސް ކުރެވުނެވެ. ލުއި ހިނތުންވުމެއް މޫނަށް ވެރިވި ކަމުގައި ވިޔަސް އެ އުފާވެރިކަން އެހެންމީހަކަށް ދެއްކުމަށް މާޒިމް ބޭނުމެއްނުވެއެވެ.
"އާނ އޯކޭ...އެކަމު މިރޭ އެކަނި...ހެނދުނުން ގެއަށް ބަދަލުވާން ތައްޔާރުވާން ޖެހޭނެ...އެކަމު މަދީނާ އާއި ކެނާން މިރޭ އެގެއަށް ބަދަލުވާންވާނެ..." މާޒިމް ބުނެލީ ހެވިފައި އިން މަދީނާ ގެ މޫނަށް ބަލައިލަމުންނެވެ. މަދީނާ ހުރީ ޕެކް ކުރަން އިތުރު ދުވަހެއް ލިބޭނެ ކަމަށް އުންމީދުގައެވެ. އުރުޖުވާންގެ އަތްފައި ފިނިވިއެވެ. މިރޭ މާޒިމް މާޒްވިލާއަށް ނުދާނެކަން އެނގުމުންނެވެ. ****
"ހީކުރީތަ މަށަށް ނޭނގޭނެކަމަށް އަހަރެންގެ ދަރި ދުނިޔޭގަ ހުރިކަމެއް....އެވެސް ކަލޭގެ ދަނބިދަރިއެއްގެ ގޮތުގައި މިހާރު...." އަޑުގައިވީ ހީލަތްތެރިކަމެވެ. "މޮޔަވީތަ އާދަނު....ކީކޭ ތި ކިޔަނީ...." ނާޝިދު އަށް އަހާލެވުނީ ހައިރާންކަމާއެކުއެވެ.