11 Jan 2024, 20:40
މާލޭ މޭޔަރުކަމަށް ވަކި ކެންޑިޑޭޓަކު ނުހޮވައިފިނަމަ ބައެއް ކަންކަމަށް ދަތިވާނެ ކަމަށް ބުނެ އިންޒާރު ދެމުން އަންނަކަމަށް އެމްޑީޕީން މިއަދު ބުނެފިއެވެ.
މާލޭ ސިޓީ ކައުންސިލުގެ ބައި އިލެކްޝަނާ ގުޅޭގޮތުން އެ ޕާޓީން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ޕާޓީގެ ކެންޑިޑޭޓް އާދަމް އާޒިމްގެ ތަރުޖަމާނު އަލީ ޚާލިދު ވިދާޅުވީ ވަކި ކެންޑިޑޭޓަކު ނުހޮވައިފިނަމަ މާލޭގެ ވަކި ކަންތައްތަކެއް ނުވަތަ މާލޭގައި ކުރަން ހުރި ކަންތައްތަކަށް ދަތިތަކެއް އަންނާނެ ކަމަށް ބުނާ ކަމަށެވެ.
އެހެން ނަމަވެސް އެއީ އެމްޑީޕީއަށް ލިބޭ ހިތްވަރު ކަމަށް ވެސް އޭނާ ވަނީ ފާހަގަކޮށްފައެެވެ.
"މި ކަހަލަ ކަންތައްތަކަށް ދަތި އަންނާނޭ މި ވިދާޅުވާ ވާހަކައަކީ އާދަމް އާޒިމްގެ މިއަދުގެ ސްޓްރެންތު" ޚާލިދު ވިދާޅުވިއެވެ.
އޭނާ އިތުރަށް ވިދާޅުވީ ސިޓީ ކައުންސިލަކީ އާމްދަނީ ލިބޭ ތަނެއް ކަމަށެވެ. އަދި އާޒިމަކީ ލިބޭ އާމްދަނީ ދެކޮޅު ޖައްސައިގެން ތަންތަން ހިންގަން ދަންނަ ބޭފުޅެއް ކަމަށެވެ.
އެގޮތުން އޭނާގެ ކިބައިގައި ޕްރޮޖެކްޓް ހިންގުމުގެ ތަޖުރިބާއާއި، ފައިނޭންޝަލް ބެކްގްރައުންޑާއި، މެނޭޖުކުރުމުގެ ތަޖުރިބާ ހުރިކަމަށް އޭނާ ވިދާޅުވިއެވެ. އަދި އެ ކަންކަމުގެ އަލީގައި މާލޭގައި ކުރަން ރާވައިފައިހުރި ކަންކަން ކޮށްދޭނެ ކަމަށް ވެސް އޭނާ ވިދާޅުވިއެވެ.
މީގެ އިތުރަށް އޭނާ ވަނީ ބައެއް ކެންޑިޑޭޓުން ސަރުކާރުގެ ބައެއް ވަސީލަތްތައް ބޭނުން ކުރަމުން އަންނަކަމަށް ތުހުމަތުކުރައްވައިފައެވެ.
"ވާދަ ކުރައްވާ ބައެއް ބޭފުޅުން ސަރުކާރުގެ ވަސީލަތްތައް ބޭނުންކުރާކަމަށް ވާހަކަ އެބަދެކެވޭ ރަށު ތެރޭގައި. މި ކަހަލަ ކަންކަމުގެ ސަބަބުން އަޅުގަނޑުމެންގެ ކެމްޕެއިނަށް ހީނަރުކަން އަންނަ ވާހަކައެއް ނޫން އެ ކަމަކު ނާޖައިޒް ފައިދާއެއް ހޯދާތީ. އެ ކަހަލަ ޝައްކުތަކާއި ތަކަށް އެ ބޭފުޅުން ޖަވާބެއް ނުދެއްވާތީ އެއީ ހަގީގަތް ކަމަށް ގަބޫލުކުރަން އެބަ ޖެހޭ،" އޭނާ ވިދާޅުވިއެވެ.
މީގެ އިތުރަށް އެންމެ ފުރަތަމަ މެނިފެސްޓޯ ނެރުނީ އާޒިމްކަން ފާހަގަކުރައްވާ އޭނާ ވިދާޅުވީ އާޒިމްގެ މެނިފެސްޓޯގައި ހުރި ބައެއް ނުކުތާތައް އެހެން ކެނޑިޑޭޓުންގެ މެނިފެސްޓޯގައި ހިމަނައިފައި ހުރިކަމަށް ވިދާޅުވެފައެވެ.
އަދި އެއީ އެ ކެނޑިޑޭޓުން ވެސް އެ ކަމަށް ތާއީދުކުރާކަމުގެ ހެއްކެއް ކަމަށެވެ.
މި އަންނަ ހޮނިހިރު ދުވަހު މާލޭ މޭޔަރު ހޮވުމުގެ އިންތިޚާބު އޮންނައިރު މި މަގާމަށް ފަސް ކެނޑިޑޭޓަކު ވާދަކުރައްވައެެވެ.
އެއީ އާޒިމާގެ އިތުރުން އެމްޑީޕީގެ ކެންޑިޑޭޓް އާދަމް އާޒިމާއި ދަ ޑިމޮކްރެޓްސްގެ ކެންޑިޑޭޓް ސައިފް ފާތިހާއި ކުރީގެ ރައީސް އަބްދުﷲ ޔާމީން އުފައްދާ ޕީޕަލްސް ނެޝަނަލް ފްރޮންޓްގައި އިސްކޮށް ހަރަކާތްތެރިވާ ކުރީގެ ފުލުސް ކޮމިޝަނަރު ހުސައިން ވަހީދުގެ އިތުރުން އަމިއްލަ ގޮތުން ވާދަ ކުރައްވާ ޝުއައިބު އަލީ (ފުރަހަނި ޝުއައިބު) އެވެ.