11 Jan 2024, 15:33
ކަރަބާއޮ ކަޕް ފުޓްބޯޅަ މުބާރާތުގެ ސެމީ ފައިނަލްގެ ފުރަތަމަ ލެގްގައި ލިވަޕޫލާއި ފުލަމް ބައްދަލުކުރި މެޗު ލިވަޕޫލް ކާމިޔާބު ކޮށްފިއެވެ.
ލިވަޕޫލްގެ ދަނޑުގައި ކުޅުނު މި މެޗު އެ ޓީމު ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ލިވަޕޫލުންނެވެ. ނަމަވެސް މި މެޗުގެ ފެށުން ރަނގަޅު ވެފައިވަނީ ފުލަމްގެއެވެ. މިގޮތުން ފުލަމް އިން ވަނީ މެޗުގެ 19 ވަނަ މިނެޓްގައި ލަނޑެއް ޖަހާ މެޗުގެ ލީޑު ނަގާފައެވެ. މި ލަނޑު އެ ޓީމަށް ޖަހައިދީފައިވަނީ ވިލިއަމްއެވެ. މި މެޗުގެ ފުރަތަމަ ހާފުގައި ފުލަމްއިން ވަނީ ރަނގަޅު ކުޅުމެއް ދައްކާފައެވެ.
ފުރަތަަމަ ހާފާއި ހިލާފަށް މި މެޗުގެ ދެވަނަ ހާފުގައި ލިވަޕޫލުން ވަނީ އެ ޓީމުގެ ކުޅުން ރަނގަޅު ކޮށްފައެވެ. މި ގޮތުން މެޗުގެ ނަތީޖާ ހަމަހަމަ ކޮށްދިން ލަނޑު މެޗުގެ 68 ވަނަ މިނެޓްގައި އެ ޓީމަށް ކާމިޔާބު ކޮށްދިނީ ކާޓިސް ޖޯންސްއެވެ. އަދި އޭގެ ތިން މިނެޓް ފަހުން ކޯޑީ ގަކްޕޯ ވަނީ މި މެޗުން ލިވަޕޫލް މޮޅުވި ލަނޑު ޖަހައިދީފައެވެ.
މިއީ ވެތުވެ ދިޔަ މަހެއް ހާ ދުވަސް ތެރޭ މި ގޮތަށް ފުލަމްއިން ކުރި ހޯދާފައިވަނިކޮށް ފަހަތުން އަރާ ލިވަޕޫލް އަމިއްލަ ދަނޑުގައި މޮޅުވި ދެވަނަ ފަހަރެވެ. މި ދެ ޓީމު ޑިސެމްބަރު މަހުގެ ތިންވަނަ ދުވަހު ބައްްދަލުކުރި މެޗުގެ ފަހު 10 މިނެޓަށް ވީއިރުވެސް ތިން ލަނޑު ދެ ލަނޑުން ކުރީގައި އޮތީ ފުލަމްއެވެ. ނަމަވެސް ފަހު ވަގުތު ލިވަޕޫލް އިން ވަނީ މި މެޗު ހަތަރު ލަނޑު ތިން ލަނޑުން ކާމިޔާބު ކޮށްފައެވެ.
މި ދެ ޓީމުގެ މެދުގައި ކުޅުމަށް ހަމަޖެހިފައިވާ ދެވަނަ ލެގް މި މަހުގެ 24 ވަނަ ދުވަހު ކުޅުމަށް ހަމަޖެހިފައިވަނީ ފުލަމްގެ ދަނޑުގައެވެ. އެހެން ކަމުން މި މުބާރާތުގެ ފައިނަލަށް ދިއުމުގެ ފުރުސަތު ފުލަމްއަށް އަދި މުޅިން ނުގެއްލެއެވެ.