11 Jan 2024, 12:21
މިހާރަކަށް އައިސް ސައްހަ ނޫން ޑޮލަރުތައް ދައުރުވާކަން ފާހަގަކުރެވިފައިވާ ކަމަށް ފުލުހުން ބުނެ، އެކަމަށް ސަމާލުވާން މިއަދު އިލްތިމާސްކޮށްފިއެވެ.
ފުލުހުން މިއަދު ބުނީ، ވަގު ޑޮލަރުގެ 100، 50 އަދި 20ގެ ނޫޓުތަކެއް ދައުރުވަމުންދާ ކަމަށެވެ. އަދި އެފަދަ ޑޮލަރު ބޭނުންކޮށްގެން އެކި ތަންތަނުން ވިޔަފާރީގެ މުއާމަލާތްތައް ކޮށްފައިވާ މައްސަލަތަކެއް ވެސް ފުލުހުންނަށް ހުށަހަޅާފައިވާތީ މިހާރު ތަހުގީގު ކުރަމުން އަންނަ ކަމަށް ފުލުހުން ބުންޏެވެ.
އެފަދަ މައްސަލައެއްގައި ގދ. ގައްދޫއަށް ނިސްބަތްވާ 57 އަހަރުގެ ފިރިހެނަކު ހައްޔަރުކޮށްފައިވާ ކަމަށް ވެސް ފުލުހުން ބުންޏެވެ.
އެ މައްސަލައިގައި އޭނާ ކްރިމިނަލް ކޯޓަށް ހާޒިރުކުރުމުން އޭނާގެ ބަންދަށް 15 ދުވަހުގެ މުއްދަތަށް ޖަހާފައިވާ ކަމަށް ވެސް ފުލުހުން ހާމަކޮށްފައިވެއެވެ.
ފުލުހުން ވަނީ، ޑޮލަރުން މުއާމަލާތް ކުރުމުގައި މިހާރަށްވުރެ ބޮޑަށް ސަމާލުވެ، ޑޮލަރުގެ ސައްހަކަން ކަށަވަރުކުރުމަށްފަހު ނޫނީ އެފަދަ މުއާމަލާތް ނުކުރުމަށް އެދިފައެވެ.