11 Jan 2024, 11:16
ރާއްޖެއަށް ސްކޮލާޝިޕްތައް ދީ، ކުޅިވަރާއި އެހެނިހެން ބައެއް ދާއިރާތަކުން އެހީވުމަށް ޗައިނާގެ ބޮޑުވަޒީރު ލީ ޗަންގް މިއަދު ހުށަހަޅުއްވައިފިއެވެ.
ޗައިނާގެ ރައީސް ޝީ ޖިންޕިންގެ ދައުވަތުފުޅަކަށް އެގައުމަށް ވަޑައިގަތް ރައީސް ޑރ. މުޙައްމަދު މުއިއްޒު ވަނީ އެގައުމުގެ ބޮޑުވަޒީރާ ބައްދަލުކުރައްވައިފައެވެ.
ރައީސް އޮފީހުން ބުނީ އެ ބައްދަލުކުރެއްވުމުގައި، އެއް ގައުމުން އަނެއް ގައުމަށް ކުރާ އިހުތިރާމާއި ދެ ގައުމުގެ މެދުގައި އޮތް ތާރީޚީ ގުޅުމާ ގުޅޭ ގޮތުން ދެ ބޭފުޅުން ވާހަކަދެއްކެވި ކަމަށެވެ.
ހަމައެއާއެކު، އީ ކޮމާސްގެ ދާއިރާއިންނާއި މި ސަރުކާރުން ކުރިއަށްގެންދަން ނިންމާފައިވާ މަޝްރޫއުތަކަށް އެއްބާރުލުން ދިނުމާ ގުޅޭ ގޮތުން ވެސް ދެ ގައުމުން މަޝްވަރާ ކުރި ކަމަށް އެ އޮފީހުން ބުންޏެވެ. އޭގެ ތެރޭގައި ފުށިދިއްގަރު ފަޅު ހިއްކައިގެން ތަރައްގީ ކުރާ ރަސްމާލެ މަޝްރޫއާއި ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމާއި އެހެނިހެން މަޝްރޫއުތައް ހިމެނޭ ކަމަށް އެ އޮފީހުން ބުންޏެވެ.
މީގެ އިތުރުން ޗައިނާއާއި ރާއްޖެއާ ދެމެދު ސީދާ ދަތުރުތައް އިތުރުކޮށް ފަތުރުވެރިކަމުގެ ދާއިރާއިން އެއްބާރުލުންދޭ މިންވަރު އިތުރު ކުރުމަށް ވެސް ރައީސާއި ބޮޑުވަޒީރު މަޝްވަރާ ކުރެއްވި ކަމަށް ރައީސް އޮފީހުން ބުންޏެވެ.
އެ އޮފީހުން ބުނީ، ޗައިނާއިން އެހީ ފޯރުކޮށްދެވޭނެ އިތުރު ދާއިރާތަކުގެ ގޮތުގައި ބޮޑުވަޒީރު ފާހަގަކުރެއްވި ދާއިރާތަކުގެ ތެރޭގައި، ވޮކޭޝަނަލް ޓްރެއިނިން އާއި މަސްވެރިކަމާއި މެރިޓައިމް ދާއިރާއާއި ތިމާވެއްޓާއި މެޓްރޮލޮޖިކަލް ޓެކްނޮލޮޖީ ދާއިރާ ހިމެނޭ ކަމަށެވެ.
އެ ބައްދަލުވުމުގައި ރައީސް ވަނީ ދެ ގައުމުގެ މަސްލަހަތު އޮތް ދާއިރާތަކުން ގުޅުން އިތުރަށް ވަރުގަދަ ކުރުމަށާއި އެ މަނިކުފާނުގެ ވެރިކަމުގައި ޗައިނާއާ އޮތް ގުޅުން އާ ހަރުފަތަކަށް ގެންދިޔުމަށް އުއްމީދު ކުރައްވާ ކަމަށް ވިދާޅުވެފައި ކަމަށް ރައީސް އޮފީހުން ބުންޏެވެ.
އިއްޔެ ރައީސް ވަނީ ޗައިނާގެ ރައީސް ޝީއާ ބައްދަލުކުރައްވައިފައެވެ. އެ ބައްދަލުވުމުގައި ރައީސް ޝީ ވަނީ, ރައީސް މުއިއްޒުގެ ދަތުރުފުޅާއެކު ދެ ގައުމުގެ ގުޅުމުގެ އާ ބާބެއް ފެށިފައިވާ ކަމަށް ވިދާޅުވެފައެވެ.
މީގެ އިތުރުން ފަތުރުވެރިކަމާއި މަސްވެރިކަމާއި ދަނޑުވެރިކަން ފަދަ ދާއިރާތަކާ ގުޅުން ހުރި 20 އެއްބަސްވުމެއްގައި އިއްޔެ ދެ ގައުމުން ސޮއިކޮށްފައިވެއެވެ.