11 Jan 2024, 09:42
ރާއްޖެއިން ގައުމު ތަރައްގީ ކުރާނެ ގޮތާއި އެ މަސައްކަތުގައި ބައިވެރިވާނެ ފަރާތްތައް ޚިޔާރު ކުރާނީ އަމިއްލައަށް ކަމަށާއި އެ ހައްގަށް ޗައިނާއިން އިހުތިރާމު ކުރާނެ ކަމަށް އެގައުމުގެ ވެރިކަން ކުރާ ކޮމިއުނިސްޓް ޕާޓީގެ ޕްރޮޕަގަންޑާ ޑިޕާޓްމެންޓުން ހިންގާ ޗައިނާ ޑެއިލީން ރިޕޯޓުކޮށްފިއެވެ.
ރައީސް ޑރ. މުޙައްމަދު މުއިއްޒު ރަސްމީ ދަތުރުފުޅެއްގައި ޗައިނާގައި ހުންނެވި ދަނޑިވަޅެއްގައި ޗައިނާ ޑެއިލީން ޝާއިއުކުރި އެޑިޓޯރިއަލްގައިވާ ގޮތުން، ޗައިނާއާއި ރާއްޖެއަކީ ސައިޒުން ތަފާތު ދެ ގައުމު ކަމަށްވީ ނަމަވެސް، މި ދެ ގައުމުން ވަނީ ހަމަހަމަކަމާއި ދެ ފަރާތަށް ވެސް ފައިދާވާ ފަދަ ޕާޓްނާޝިޕެއްގެ މިސާލު ދައްކުވައިދީފައެވެ.
ނަމަވެސް ޗައިނާއިން ރާއްޖެއަށް ލޯނު ދިނުމަކީ 'ދަރަނި ދަންތުރަ'އެއްގައި ޖެއްސުމުގެ ގޮތުގައި ސިފަކޮށް، އޭގެ ސަބަބުން ދުރު ރާސްތާގައި ރާއްޖޭގެ ކުރިއެރުމަށް ނޭދެވޭ އަސަރު ކުރާނެ ކަމަށް ހުޅަނގުގެ ބައެއް މީޑިއާތަކުން އަދިވެސް ބުނަމުން އަންނަ ކަމަށް އެ ނޫހުގައިވެއެވެ.
އެ ތުހުމަތު ދޮގު ކުރަމުން އެ އެޑިޓޯރިއަލްގައިވަނީ, ރާއްޖެއިން މިހާރު ދަރަނީގެ ބޮޑު ބަޔެއް ދައްކަން ޖެހެނީ ތަފާތު ގައުމުތައް ހިމެނޭ ބައިނަލްގުވާމީ މާލީ މުއައްސަސާތަކަށް ކަމަށާއި، ޗައިނާއަކަށް ނޫންކަން ފާހަގަކޮށްފައެވެ. އަދި ޗައިނާއަކީ ރާއްޖޭގެ ތަރައްގީގައި މުހިންމު ބައިވެރިއަކަށް ވެފައިވާ ކަމަށް ރައީސް މުއިއްޒު, އެގައުމުގައި ހުންނަވައި ވިދާޅުވިކަން ވެސް އެ ނޫހުން ފާހަގަކުރިއެވެ.
އެ ދަތުރުފުޅުގެ ސަބަބުން، ފަތުރުވެރިކަމާއި ދަނޑުވެރިކަމާއި މަސްވެރިކަމާއި އުމްރާނީ ތަރައްގީ ފަދަ ދާއިރާތަކުން ދެ ގައުމުން ގުޅިގެން އިތުރަށް މަސައްކަތް ކުރެވޭނެ ގޮތްތައް ދެނެގަނެވި، ރާއްޖެ އާއި ޗައިނާގެ ގުޅުން މިހާރަށް ވުރެ ވަރުގަދަ ކުރެވޭނެ ކަމަށް އެ އެޑިޓޯރިއަލްގައިވެއެވެ.
ރައީސް ޑރ. މުޙައްމަދު މުއިއްޒަށް ޗައިނާގެ ރައީސް ޝީ ޖިންޕިން ރަސްމީކޮށް މަރުހަބާ ދެންނެވުން -- ފޮޓޯ/ ރައީސް އޮފީސް
މިއީ ދިވެހި ރައީސަކު އިންޑިއާއަށް ވަޑައިގަތުމުގެ ކުރިން ޗައިނާއަށް ވަޑައިގެންނެވި ފުރަތަމަ ފަހަރަކުން ފާހަގަކޮށް އެ ނޫހުގައި ވަނީ، އެއީ ޗައިނާއިން އިންޑިއާ ކަނޑުގެ ސަރަހައްދުގައި ނުފޫޒުގަދަ ކުރަން މަސައްކަތް ކުރުމުގެ ނިޝާނެއްގެ ގޮތުގައި ބަޔަކު ސިފަކުރަމުންދާ ކަމަށް ބުނެފައެވެ.
ނަމަވެސް އެއީ ހަގީގަތެއް އެކުލެވޭ ވާހަކައެއް ނޫން ކަމަށާއި ރާއްޖޭގެ ތަރައްގީއާ ގުޅޭ ގޮތުން އަމިއްލައަށް ގޮތް ނިންމުމުގެ ހައްގަށް ޗައިނާއިން އިހުތިރާމު ކުރާ ކަމަށް އެ ނޫހުގައިވެއެވެ.
މީގެ އިތުރުން، ޗައިނާގެ އެހީގެ ސަބަބުން ދިވެހީންނަށް ފައިދާތައް ލިބޭކަން އެ އެޑިޓޯރިއަލްގައި ފާހަގަކުރިއެވެ. އަދި ޗައިނާއިން ލޯނުގެ އިންޓްރެސްޓް ރޭޓުތަކާއި ފައިސާ އަނބުރާ ދައްކަން ޖެހޭ މުއްދަތުތަކާއި ފައިސާ ދައްކަން ނުޖެހޭ މުއްދަތުތައް ވެސް ކަނޑައަޅާފައި ވަނީ ރާއްޖެއަށް އެންމެ އެކަށީގެންވާ ގޮތެއް ބަލައިފައި ކަމަށް އެ ނޫހުގައިވެއެވެ.
ހަމައެއާއެކު، ޗައިނާގެ ބެލްޓް އެންޑް ރޯޑް އިނިޝިއެޓިވްގައި 2014 ވަނަ އަހަރު ރާއްޖެއިން ބައިވެރިވުމުންނާއި އެ ގައުމުން އަޅައިދިން ސިނަމާލެ ބުރިޖުގެ ސަބަބުން ދިވެހީންނަށް އިގުތިސާދީ ގޮތުން ގިނަ ފައިދާތަކެއް ލިބިފައިވާ ކަމަށް އެ އެޑިޓޯރިއަލްގައިވެއެވެ. އަދި ޗައިނާގެ އެހީއާއެކު ސޯޝަލް ހައުސިން ޔުނިޓުތައް އަޅައި، ވެލާނާ އިންޓަނޭޝަނަލް އެއާޕޯޓު ތަރައްގީކޮށްފައިވާކަން ވެސް އެ ނޫހުން ފާހަގަކުރިއެވެ.
މީގެ އިތުރުން 2019 ވަނަ އަހަރު ރާއްޖެއަށް އެންމެ ގިނަ ފަތުރުވެރިން އައީ ޗައިނާއިން ކަމަށާއި އެގައުމުގެ ބޯޑަރު މިހާރު ހުޅުވާލާފައިވުމުން، ރާއްޖެ އަންނަ ފަތުރުވެރިންގެ އަދަދު އަނެއްކާވެސް އިތުރު ވާނެ ކަމަށް އެ ނޫހުގައިވެއެވެ. އަދި ކޮވިޑް-19ގެ ކުރިން ރާއްޖެއަށް ޗައިނާއިން ފަތުރުވެރިން އައި މިންވަރަށް, ދެން އަދަދުތައް އިތުރުވާނެ ކަމަށް ޗައިނާ ޑެއިލީން ލަފާކޮށްފައިވެއެވެ.
ޗައިނާގެ ރައީސް ޝީ ޖިންޕިންގެ ދައުވަތުފުޅަކަށް ރައީސް އެގައުމަށް ވަޑައިގެން, ދެ ބޭފުޅުން ވަނީ ބައްދަލުކުރައްވައިފައެވެ. އެ ބައްދަލުވުމުގައި ރައީސް ޝީ ވަނީ, ރައީސް މުއިއްޒުގެ ދަތުރުފުޅާއެކު ދެ ގައުމުގެ ގުޅުމުގެ އާ ބާބެއް ފެށިފައިވާ ކަމަށް ވިދާޅުވެފައެވެ.
މީގެ އިތުރުން ފަތުރުވެރިކަމާއި މަސްވެރިކަމާއި ދަނޑުވެރިކަން ފަދަ ދާއިރާތަކާ ގުޅުން ހުރި 20 އެއްބަސްވުމެއްގައި އިއްޔެ ދެ ގައުމުން ސޮއިކޮށްފައިވެއެވެ.