11 Jan 2024, 08:58
މީގެ ކުރިން ވެސް ބައެއް ވެބް ސީރީސްތައް ކުޅެފައިވާ ބޮލީވުޑްގެ ބަތަލާ ރަވީނާ ޓަންޑަންގެ ކުރިޔަށް އޮތް ވެބް ސީރީސް "ކަރްމާ ކޯލިންގް"ގެ ޓްރެއިލާ ރިލީޒް ކޮށްފިއެވެ.
ވަރަށް ވަރުގަދަ ބަދަލު ހިފުމުގެ ކުޅިގަނޑެއް ދައްކުވައިދޭ މި ސީރީސް ރިލީޒް ކުރުމަށް ނިންމާފައި ވަނީ މި މަހުގެ 26ވަނަ ދުވަހު ޑިޒްނީ ޕްލަސް ހޮޓް ސްޓާ މެދުވެރިކޮށެވެ.
ރަވިނާ ޓަންޑަން ބޮލީވުޑްގެ ރާނީއެއްގެ ރޯލްއިން ފެންނާނެ "ކަރްމާ ކޯލިންގް"އަކީ ޑައިރެކްޓަރު ރޫޗީ ނަރައިންގެ އުފެއްދުމެކެވެ. މި ވެބް ސީރީސް އަކީ މަޝްހޫރު ލިޔުންތެރިޔާ އެލެކްސޭންޑްރޭ ޑަމަސްގެ ކްލްސިކް ވާހަކަ 'ދަ ކައުންޓް އޮފް މޮންޓެ ކްރިސްޓޯ' އަދި 2011ވަނަ އަހަރު ރިލީޒް ކުރި އެމެރިކަން ޑްރާމާ ސީރީސް "ރިވެންޖް" އަސްލަކަށް ބަލައިގެން އުފައްދާފައިވާ ވެބް ސީރީސް އެކެވެ.
އިންޑިއާގެ އަލީބާގްގައި ބޮޑު ބައެއް ޝޫޓްކޮށް ނިންމާފައިވާ "ކަރްމާ ކޯލިންގް"އަކީ މީގެ ކުރިން ރަވީނާ ފެނިފައި ނުވާފަދަ ރޯލަކުން ބެލުންތެރިންނަށް ފެންނާނެ ވެބް ސީރީސްއެއް ކަމަށާއި މި ސީރީސް ބެލުމަށް ދައުވަތު އަރުވާކަމަށް ބުނަމުން ރަވީނާ ވަނީ ސީރީސްގެ ޓްރެއިލާ އާއްމުންނާ ހިއްސާ ކޮށްފައެވެ.
ބަތަލާ ރަވީނާ ޓަންޑަން ވެބް ސީރީސް "އަރަނައިކް"ގައި-- ފޮޓޯ/ބޮލީވުޑް ހަންގާމާ
ރަވީނާގެ ވެބް ސީރީސްއެއް އެންމެ ފުރަތަމަ ރިލީޒް ވެފައި ވަނީ 2021ވަނަ އަހަރު ނެޓްފްލިކްސްގައެވެ. ނެޓްފްލިކްސްގެ ތުރިލާ ސީރީސް "އަރަނައިކް"ގައި ރަވީނާ ކުޅެފައި ވަނީ ޒިންމާދާރު ފުލުސް އޮފިސަރެއްގެ ރޯލެވެ. މި ސީރީސްއިން ރަވީނާއަށް ލިބުނު ތަރުހީބާ އެކު ކުރިމަގުގައި ވެބް ސީރީސް ތަކަށް ނޫނެކޭ ބުނަންޖެހޭ ސަބަބެއް ނުވިސްނޭ ކަމަށް ބަތަލާ ވަނީ ބުނެފައެވެ.