11 Jan 2024, 12:29
ޣައްޒާ (10 ޖަނަވަރީ 2024): ފަލަސްތީނުގެ މިނިވަންކަމަށް ޓަކައި ޔަހޫދީ އިސްރާއީލުގެ އަނިޔާވެރިކަމާއި އިސްތިއުމާރާ ދެކޮޅަށް ޖިހާދުކުރާ ފަލަސްތީނުގެ "ހަމާސް" ޖަމާއަތަށް އަރަބި ގައުމުތަކުގެ އާންމު ރައްޔިތުންގެ 90 އިންސައްތަ މީހުން ތާއީދުކުރާކަން ކަމާބެހޭ ސާވޭއަކުން ހާމަވެއްޖެއެވެ.
އާންމު ޚިޔާލު ހޯދުމުގެ ސާވޭތައް ކުރާ އަރަބި ރިސާޗް ސެންޓަރެއް ކަމަށްވާ "ޢަރަބް ސެންޓަ ފޯ ރީސާޗް އެންޑް ޕޮލިސީ ސްޓަޑީޒް"އިން އަރަބި 16 ގައުމެއްގެ އަށް ހާސް މީހުންގެ ޚިޔާލު ހޯދައިގެން ކުރި މިސާވޭގެ ނަތީޖާ ދައްކާގޮތުން އަރަބި ގައުމުތަކުގެ އާންމުންގެ 90 އިންސައްތަ މީހުން "ހަމާސް"އިން މިދިޔަ އޮކްޓޯބަރު ހަތެއްގައި ދިން ކުއްލި ހަމަލާތަކަށް ތާއީދުކުރެއެވެ. އަދި "ހަމާސް" ޖަމާއަތުން ކުރާ ޖިހާދުގެ ހަރަކާތްތަކުން ނޫން އެހެން ގޮތަކަށް އިސްރާއީލުގެ އަތްދަށުން ފަލަސްތީނު މިނިވަން ނުކުރެވޭނެކަމަށްވެސް އަރަބި ރައްޔިތުންގެ 90 އިންސައްތައަށް ވުރެ ގިނަ މީހުން ދެކެއެވެ.
މީގެއިތުރުން އިސްރާއީލަކީ ފަލަސްތީނުގެ ބިމުގައި ހުޅަނގުގެ އިސްތިއުމާރީ ބާރުތަކުން އިސްތިއުމާރީ ބޭނުމަށް އުފައްދާފައިވާ ވަގުތީ އެންޓިޓީ އެއްކަމަށާއި އިސްރައީލަކީ ދިގުމުއްދަތަކަށް ފަލަސްތީނުގެ ބިމުގައި އޮންނާނެ ގައުމެއް ނޫންކަމަށްވެސް އަރަބި ރައްޔިތުންގެ 90 އިންސައްތަ މީހުން ދެކޭކަން މިސާވޭން ހާމަވެފައިވެއެވެ.
"ޢަރަބް ސެންޓަ ފޯ ރީސާޗް އެންޑް ޕޮލިސީ ސްޓަޑީޒް"އިން ނެރުނު ރިޕޯޓެއް ބުނާގޮތުން މިދިޔަ އޮކްޓޯބަރު މަހުގެ 7 ވަނަ ދުވަހު ހަމާސްއިން އިސްރާއީލަށް ދިން ކުއްލި ހަމަލާތަކަކީ އިސްރާއީލުގެ ޣައިރު ގާނޫނީ ވުދޫޖަށް މިހާތަނަށް އެރި އެންމެބޮޑު ލޮޅުމެވެ. އެހަމަލާގެ ސަބަބުން ފަލަސްތީނުގެ މައްސަލައިގެ ހަގީގަތާއި އިސްރާއީލުގެ ޣައިރު ގާނޫނީ ހަގީގަތް ހުޅަނގުގެ އާންމުންނަށް ވަރަށް ބޮޑަށް އެނގިގެން ހިނގައްޖެއެވެ.
އަދި ހުޅަނގުގައި ބާރުގަދަ ޔަހޫދީން ލޮބީ ގްރޫޕްތަކާއި ޔަހޫދީން ކޮންޓްރޯލްކުރާ ހުޅަނގުގެ މީޑީއާއިން އިސްރާއީލުގެ ހަގީގަތް ހުޅަނގުގެ އާންމުންނަށް އޮޅުވާލާފައިވާ މިންވަރާއި ހުޅަނގުގެ މީޑީއާއިން އިސްރާއީލު ކޮޅަށްޖެހި ހުސްވެފައިވާ މިންވަރާއި ފަލަސްތީނު މައްސަލައިގެ ހަގީގަތް ހުޅަނގުގެ މީޑީއާއިން އޮޅުވާލާ މިންވަރުވެސް މިދިޔަ އޮކްޓޯބަރު މަހުގެ ހަތް ވަނަ ދުވަހު ހަމާސްއިން އިސްރާއީލަށް ދިން ކުއްލި ހަމަލާތަކަށްފަހު އިސްރާއީލުން ޣައްޒާގެ އާންމުންނާ ދެކޮޅަށް ހިންގާ ގަތުލުއާންމުތަކާއި ނަސްލު ނައްތާލުމުގެ ޖަރީމާތަކާއެކުވަނީ ހާމަވެފައެވެ.
މި ސާވޭގައި ބައިވެރިވި އަރަބި އާންމުންގެ 95 އިންސައްތައަށްވުރެވެސް ގިނަމީހުން ދެކޭގޮތުގައި އަމިއްލަ ނަފްސު ދިފާއު ކުރުމުގެ ހައްގު އިސްރާއީލަށް ނޯންނާނެއެވެ. އެއީ އިސްރާއީލަކީ ފަލަސްތީނުގެ ބިމަށް ގަދަބާރުން ވެރިވެގަނެގެން އުޅޭ އިސްތިއުމާރީ ބާރަކަށް ވާތީއެވެ.
އޮކްޓޯބަރު މަހުގެ ހަތް ވަނަ ދުވަހު ހަމާސްއިން އިސްރާއީލަށް ދިން ކުއްލި ހަމަލާތަކާ ދެކޮޅުކަން ހާމަކޮށްފައި ވަނީ މި ސާވޭގައި ބައިވެރިވި އަރަބި ރައްޔިތުންގެ ތެރެއިން އެންމެ 5 އިންސައްތަ މީހުންނެވެ.
ހަމާސްގެ ހަމަލާތަކަށް ތާއީދުކުރާ އަރަބި ރައްޔިތުން ބުނެފައިވަނީ ހަމާސް އިން އިސްރާއީލަށް ދިން ކުއްލި ހަމަލާތަކަކީ އިސްރާއީލުން ކޮންމެ ދުވަހަކު ފަލަސްތީނުގެ އެކިތަންތަނަށް ހަމަލާދީ ފަލަސްތީނުގެ އާންމުން މަރައި އެމީހުންގެ ގެދޮރު ތަޅައި ސުންނާފަތިކޮށް މާތްވެގެންވާ މަސްޖިދުލްއަގްސާއަށް ހުއްޓުމެއްނެތި ކުރަމުން ގެންދާ ގޯނާތަކުގެ ނަތީޖާ ކަމަށް އަރަބި އާންމުންގެ 95 އިންސައްތަ ދެކޭ ކަމަށެވެ.
މިގޮތުން ހަމާސްގެ ކުއްލި ހަމަލާތަކަކީ އދ.ގެ ގަރާރުތަކުގައި ބުނާ ހިފާފައިވަ ބިންތަކުން އިސްރާއީލު ފައިބަން ދެކޮޅު ހެދުމާއި ފަލަސްތީނުގެ މިނިވަން ދައުލަތެއް އުފައްދައި ދިނުމުގައި ބައިނަލްއަގްވާމީ މުޖްތަމައު ނާކާމިޔާބުވުމާއި އިސްރާއީލުގެ އަޅުވެތިކަމުގައި ފަލަސްތީނު ރައްޔިތުން އުޅެންޖެހުމުގެ ނަތީޖާ ކަމަށް އަރަބި އާންމުން ދެކެއެވެ. މި ސާވޭގައި ބައިވެރި މީހުންގެ ތެރެއިން 92 އިންސައްތަ މީހުންވަނީ ފަލަސްތީނުގެ ރައްޔިތުންނަށް ވާގިވެރިވުމުގައި ދެމިތިބޭނެކަން ހާމަކޮށްފައެވެ.
އޮކްޓޯބަރު މަހުގެ ހަތެއްގެ ހަމަލާތަކަށްފަހު އިސްރާއީލު ވަނީ ހަމާސް ނައްތާލުމުގެ ނަމުގައި ޣައްޒާގައި ދިރިއުޅޭ ފަލަސްތީނުގެ އާންމުންނާ ދެކޮޅަށް ގަތުލުއާންމުތައް ހިންގައި އެމީހުންގެ ނަސްލު ނައްތާލުމުގެ ޖަރީމާތަކެއް ފަށާފައެވެ.
މިޖަރީމާތަކުގައި އިސްރާއީލުން ވަނީ ޣައްޒާގެ އާންމުންގެ 23 ހާހަށްވުރެ ގިނަ މީހުން ޝަހީދުކޮށް 60 ހާހަށްވުރެ ގިނަމީހުން ޒަޚަމްކޮށްލާފައެވެ. ނަމަވެސް ހަމާސް ޖަމާއަތް ބަލިކުރުމުގައާއި ހަމާސްގެ އަތްދަށުގައިވާ އިސްރާއީލުގެ އަސީރުން މިނިވަންކުރުމުގައި އިސްރާއީލަށް އެއްވެސް ކާމިޔާބެއް ނުލިބެއެވެ.
ޣައްޒާއަށް އަރައި ހަނގުރާމަ ކުރަމުންގެންދާ އިސްރާއީލު ސިފައިންގެ އެތައް ހާސް ބަޔަކު ހަމާސްގެ ރައްދު ހަމަލާތަކުގައި މަރުވެފައިވާނެކަމަށް އެޖަމާއަތުން ބުނެއެވެ.
ނަމަވެސް އިސްރާއީލު އެއްބަސްވެފައިވާ ގޮތުގައި އޮކްޓޯބަރު ހަތެއްގެ ހަމަލާތަކާއި ޣައްޒާގައި ކުރަމުންގެންދާ ހަނގުރާމައިގައި މިހާތަނަށް މަރުވެފައިވަނީ އިސްރާއީލު ސިފައިންގެ 530 ވަރަކަށް މީހުންނެވެ. ޒަޚަމްވެފައިވަނީ 12 ވަރަކަށް ހާސް ސިފައިންނެވެ.
އިސްރާއީލުން ޣައްޒާއަށް އެއްގަމު މަގުން އެރިނަމަވެސް ޣައްޒާގައި ފައިހަރުކޮށްލުމުގައާއި ހަމާސްގެ އަސްކަރީ އިންފްރާސްޓްރަކްޗަރ ބަލިކޮށްލުމުގައި އިސްރާއީލުވަނީ މުޅިން ނާކާމިޔާބުވެފައެވެ. މީގެއިތުރުން ހަމާސްގެ ބިންގަރާސްތައް ހަލާކުކޮށްލުމުގައިވެސް އަދި ހަމާސްގެ އަތްދަށުގައިވާ ޔަހޫދީ އަސީރުން ބާރުގެ ބޭނުންކޮށްގެން މިނިވަން ކުރުމުގައިވެސް އިސްރާއީލަށް އެއްވެސް ކާމިޔާބެއް މިހާތަނަށް ލިބިފައެއް ނުވެއެވެ.
ޙަމާސްގެ ކުއްލި ހަމަލާތަކުގައި އިސްރާއީލުގެ އެތައް ސަތޭކަ ބަޔަކު މަރުވިއެވެ. އަދި ޔަހޫދީންގެ އެތައް ސަތޭކަ ބަޔަކު އަސީރުންގެ ގޮތުގައި ހައްޔަރުކޮށްފައިވެއެވެ. އިސްރާއީލުން އަސީރު ކޮށްފައިވާ ފަލަސްތީނުގެ އެތައް ހާސް ބައެއްގެ ތެރެއިން ގިނަބަޔަކު މިނިވަން ކުރުމުން ހަމާސް އިންވަނީ އެޖަމާއަތުގެ އަތްދަށުގައިވާ ޔަހޫދީންގެ ބައެއް މީހުން މިނިވަންކޮށްފައެވެ.