11 Jan 2024, 00:37
ސަރުކާރުން މަސްވެރިންނަށް ދޭންޖެހޭ ފައިސާގެ ތެރެއިން 267 މިލިއަން ރުފިޔާ ދީފައިވާ ކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.
ރައީސް ޑރ. މުޙައްމަދު މުއިއްޒު ޗައިނާއަށް ކުރައްވަމުން ގެންދަވާ ދަތުރުފުޅުގައި ބައިވެރިވެވަޑައިގެން، އެ ގައުމުގައި ހުންނަވައި ޕީއެސްއެމް ނިއުސްއަށް ދެއްވި އިންޓަވިއުއެއްގައި ޝިޔާމް ވިދާޅުވީ، މަސްވެރިންނަށް ދޭންޖެހޭ ފައިސާ ވީ އެންމެ އަވަހަކަށް ދިނުމުގެ މަސައްކަތް ސަރުކާރުން ކުރަމުން އަންނަ ކަމަށެވެ.
އޭނާ ވިދާޅުވީ ދައުލަތުން ބަޖެޓްކޮށްގެން އާންމުކޮށް މަސްވެރިންނަށް ފައިސާދޭ ކަމަށާއި މިދިޔަ އަހަރު މަސްވެރިންނަށް ދިނުމަށް ބަޖެޓްކޮށްފައިވަނީ 250 މިލިއަން ރުފިޔާ ކަމަށެވެ.
ނަމަވެސް މަހުގެ އަގަށް ގެނެވުނު ބަދަލާއެކު މަސްވެރިންނަށް އިތުރު 250 މިލިއަން ރުފިޔާ ދޭން ޖެހޭ ކަމަށް ޝިޔާމް ވިދާޅުވިއެވެ.
މަސްވެރިން މަސް ވިއްކުމުގެ މަސައްކަތުގައި ހަރަކާތްތެރިވަނީ: މަސްވެރިންނަށް ދޭންޖެހޭ ފައިސާގެ ތެރެއިން 276 މިލިއަން ރުފިޔާ ދީފައިވާ ކަމަށް ފިޝަރީސް މިނިސްޓަރު ޝިޔާމް ވަނީ ވިދާޅުވެފަ-- ސަން ފޮޓޯ/ ފަޔާޒު މޫސާ
އޭނާ ވިދާޅުވީ ރައީސް ވެރިކަމާ ހަވާލުވެވަޑައިގަތުމަށް ފަހު މަސްވެރިންނަށް 276 މިލިއަން ރުފިޔާ މިހާތަނަށް ދޫކޮށްފައިވީ ނަމަވެސް އަދިވެސް ނުދެވޭ ފައިސާ ހުރި ކަމަށެވެ.
ޝިޔާމް ވިދާޅުވީ ކުރީ ސަރުކާރުން އެންމެ ފަހުން މަސްވެރިންނަށް ފައިސާ ދޫކޮށްފައި އޮތީ 11 ނޮވެމްބަރާ ހިސާބަށް ކަމަށެވެ. އަދި މި ސަރުކާރުން މިހާތަނަށް މަސްވެރިންނަށް ދޫކޮށްފައި ވަނީ 30 ނޮވެމްބަރާ ހިސާބަށް ދޭން ޖެހޭ ފައިސާ ކަމަށް އޭނާ ވިދާޅުވިއެވެ.
ނިމިދިޔަ ރިޔާސީ އިންތިޚާބުގެ ދެވަނަ ބުރު ނިމުނު ހިސާބުން މަހުގެ އަގަށް ބޮޑު ބަދަލެއް ގެނެސްފައިވާކަން ޝިޔާމް ފާހަގަކުރެއްވިއެވެ.
"ކުރީގައި 17 ރުފިޔާއަށް ވިއްކަމުން އައި މަހުގެ އަގު މިވަނީ 25 ރުފިޔާއަށް ބަދަލުކުރެވިފައި. މި އަގަށް ބަދަލު ކުރުމާއެކީ ވަރަށް އުނދަގޫ ހާލަތަށް ގޮސް ސަރުކާރަށް ލިބެންޖެހޭ އާމްދަނީ ނުލިބި އަދި ޚާއްޞަކޮށް މިފްކޯގެ އާމްދަނީ އިތުރު ކުރެވޭނެ ގޮތްތަކެއް ނުހޯދޭ މި ބަދަލާއެކު،" ޝިޔާމް ވިދާޅުވިއެވެ.
"އަންނަ އަހަރު 25 ރުފިޔާގައި އަގު ހުރެއްޖެ ނަމަ، ގާތްގަނޑަކަށް އެއް ބިލިއަން ރުފިޔާ ސަބްސިޑީގެ ގޮތުގައި މަސްވެރިންނަށް ދޭންޖެހޭ."
ޝިޔާމް ވިދާޅުވީ، ދައުލަތަށް އާމްދަނީ އިތުރުކުރެވޭނެ ގޮތެއް ނެތި އެކަން ކުރަން ވަރަށް އުނދަގޫ ވާނެ ކަމެއް ކަމަށެވެ.
މިދިޔަ މަހުގެ 10ގައި މަސްވެރިންގެ ދުވަސް ފާހަގަކުރުމަށް ބޭއްވި ޖަލްސާގައި ރައީސް ޑރ. މުޙައްމަދު މުއިއްޒު ވަނީ މަސްވެރިންނަށް ސަރުކާރުން ނުދީ އެތައް ދުވަހެއް ވެފައިހުރި ފައިސާ، މި ސަރުކާރު ވެރިކަމާ ހަވާލުވި ފަހުން ދޭން ފަށާފައިވާ ކަމަށް ވިދާޅުވެފައެވެ.
މަސްވެރިން ވިއްކާފައި ހުރި މަހަށް ފައިސާ ނުލިބޭތާ މަސްތަކެއް ވެއްޖެ ކަމަށް ބުނެ، ސޯޝަލް މީޑިއާގައި ބައެއް މަސްވެރިން ކަންބޮޑުވުން ފާޅުކޮށްފައިވެއެވެ. އޭގެ ސަބަބުން ބައެއް އޮޑިފަހަރަށް ނުފުރި، މަސްވެރިކަން ނުކުރެވޭ ހިސާބަށް ގޮސްފައިވާ ކަމަށް އެ މަސްވެރިން ބުނެފައިވެއެވެ.