11 Jan 2024, 13:18
ފަލަސްތީނުގެ ރައީސް، މަޙްމޫދު އައްބާހާއި އެމެރިކާގެ ޚާރިޖީ ވަޒީރު އެންތޮނީ ބްލިންކެން ބައްދަލުކުރައްވައިފިއެވެ.
އިސްރާއީލުން ހިފާފައިވާ ހުޅަނގު އައްސޭރީގެ ރާމައްﷲގައި ދެ ބޭފުޅުން ބައްދަލުކުރައްވައިފައި ވަނީ އިސްރާއީލުގެ ފައުޖުތަކާއި ޣައްޒާގެ ވެރިކަންކުރާ ހަމާސް ޖަމާއަތާ ދެމެދު ކުރަމުންދާ ހަނގުރާމައިގެ ސަބަބުން ހިނގަމުންދާ ސަރަހައްދީ ހަމަނުޖެހުންތަކާ ދެ ގައުމުގެ މުސްތަގުބަލާމެދު އިސްރާއީލުގެ ރައީސް ބެންޖަމިން ނަތަންޔާހޫއާއި ހަނގުރާމައިގެ ކަންކަން ބެލެހެއްޓުމަށް އިސްރާއީލުން އެކުލަވައިލައިފައިވާ ކޮމެޓީ އާއެކު އެކު ބްލިންކެން ބޭއްވި މަޝްވަރާތަކަކަށްފަހުއެވެ.
އައްބާސްއާއެކު މަޝްވަރާކުރައް ވާނީ ހުޅަނގު އައްސޭރީގައި ވެރިކަންކުރާ ފަލަސްތީނު އޮތޯރިޓީ (ޕީއޭ) ވެރިކަން ހަރުދަނާކުރުމުގެ މުހިންމު ކަމާ ބެހޭގޮތުން ކަމަށް މި މަހުގެ ނުވަ ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ބްލިންކެން ވަނީ ވިދާޅުވެފައެވެ.
އެމެރިކާއިން ގަބޫލުކުރާ ގޮތުގައި މިހާރު ހިނގަމުންދާ ހަނގުރާމައަށްފަހު ފަލަސްތީނުގެ މިނިވަން ދައުލަތެއް ގާއިމު ކުރުމަށް ޕީއޭއިން އިސް ދައުރެއް އަދާކުރަންޖެހެއެވެ. ނަމަވެސް ޕީއޭގެ އަތްދަށުގައި އޮތީ ވެރިކަމުގެ މަދު ބާރުތަކެކެވެ. އަދި ޕީއޭގެ ބާރު ހިނގަނީ ހުޅަނގު އައްސޭރީގެ ކުޑަ ސަރަހައްދެއްގައެވެ.
ޣައްޒާގައި ޔަހޫދީން ހިންގަމުންދާ ޢުދުވާނުގައި ސަރަޙައްދީ ބާރުތަކުން ބައިވެރިވެ، މެދުއިރުމަތީގައި ބޮޑު ހަނގުރާމައެއް ފެށުމަކީ އެމެރިކާއިން ކަންބޮޑުވާ ކަމެކެވެ. އެއީ، ޔަހޫދީންގެ ކުރިމަގަށް އޮތް ބޮޑު ނުރައްކަލެއްގެ ގޮތުގައި އެމެރިކާއިން ދެކެއެވެ. އެ ފަދަ ހަނގުރާމައެއް ފެށުމުގެ ކޮޅުމަތި މިހާރު ވެސް ފެންނަމުންދާ ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.
ހުޅަނގު އައްސޭރިއަށް ވަޑައިގެންނެވުމުގެ ކުރިން ބްލިންކަން ވަނީ ޢަރަބި ބައެއް ޤައުމުތަކަށް ވަޑައިގަންނަވައި އެ ޤައުމުތަކުގެ އިސްވެރިންނާ މަޝްވަރާ ކުރައްވައިފައެވެ.
އޮކްޓޫބަރު ހަތް ވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް އިސްރާއީލުން ދެމުންގެންދާ ލާއިންސާނީ އުދުވާނީ ހަމަލާތަކުގައި މިހާތަނަށް 23،357 ފަލަސްތީނު މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ. ހަމަލާތަކުގައި ޒަހަމު ކޮށްލާފައިވާ މީހުންގެ އަދަދު 59,410 އަށް އަރައެވެ.