10 Jan 2024, 21:49
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސްކަމަށް ވާދަކުރައްވާ އެ އިދާރާގެ ކުރީގެ ރައީސް އަދި މަހިބަދޫ ދާއިރާގެ މަޖިލިސް މެންބަރު އަހުމަދު ތާރިގު (ޓޮމް)ގެ ކެންޑިޑަސީ ބާތިލުވެއްޖެއެވެ.
އެފްއޭއެމްގެ އޮފިޝަލަކު "ސަން"އަށް މައުލޫމާތުދިން ގޮތުގައި، އެފްއޭއެމްގެ ރައީސްކަމަށް ވާދަކުރައްވާ ޓޮމް އާއި މުފާވިޒް ހާޝިމް (މުފާ) ވެސް ކްލަބު ވެލެންސިއާގެ ތާއީދު ސިޓީއެއް ހުށަހަޅުއްވާފައިވާ މައްސަލަ ބަލައި، އެ އެސޯސިއޭޝަންގެ އިލޮކްޓޯރަލް ކޮމިޓީން ނިންމާފައިވަނީ ޓޮމްއަށް ދީފައިވާ ވެލެންސިއާގެ ތާއީދު ސިޓީ ބަލައިނުގަތުމަށެވެ.
އެފްއޭއެމްގެ އަސާސީ ގަވާއިދު ބުނާގޮތުން އިންތިޚާބުގައި ވާދަކުރުމަށް މަދުވެގެން ތިން ކްލަބެއްގެ ތާއީދު ބޭނުންވާނެއެވެ. ޓޮމް ފޯމު ހުށަހެޅުއްވީ ތިން ކްލަބެއްގެ ތާއީދާއެކުގައި ކަމަށްވެފައި، އޭގެ ތެރެއިން ވެލެންސިއާގެ ތާއީދު ސިޓީ ބަލައިނުގަތުމަށް ނިންމުމުން މިހާރު އެ އަދަދު ވަނީ ދެ ކްލަބަށް މަދުވެފައެވެ.
އެފްއޭއެމްގެ އިންތިޚާބުގައި ވާދަކުރައްވާ ޓޮމްއަށް ވެލެންސިއާއިން ދީފައިވާ ތާއީދު ސިޓީ ބަލައިނުގަތުމަށް އެފްއޭއެމްގެ އިލެކްޓޯރަލް ކޮމިޓީން ނިންމި ނަމަވެސް، ޓޮމްގެ ކެންޑިޑަސީ ބާތިލުވީ ކަމެއް އެ އިދާރާއިން އަދި ރަސްމީކޮށް އިއުލާންކޮށްފައެއް ނުވެއެވެ.
އެފްއޭއެމްގެ އިލެކްޓޯރަލް ކޮމިޓީން އެ ނިންމުން ނިންމާފައިވަނީ ވެލެންސިއާއިން ދެ ކެންޑިޑޭޓުންނަށް ވެސް ތާއީދު ސިޓީ ދީފައިވާ މައްސަލައިގައި އަމަލުކުރާނެ ގޮތަކާ މެދު ފީފާ އާއި އޭއެފްސީގެ ލަފައެއް ހޯދުމަށްފަހުއެވެ.
އެފްއޭއެމްގެ ހިންގާ ކޮމިޓީގެ މެންބަރެއްގެ ގޮތުގައި މިހާރު ވެސް ހުންނެވި މުފާ، އިންތިޚާބުގައި ވާދަކުރެއްވުމަށް ފޯމު ހުށަހެޅުއްވީ ވެލެންސިއާ ހިމެނޭގޮތަށް ހަ ކްލަބެއްގެ ތާއީދާއެކުއެވެ.
ވެލެންސިއާއިން ދެ ކެންޑިޑޭޓުންނަށް ވެސް ތާއީދު ސިޓީ ދީފައިވާ މައްސަލަ އެ ކްލަބުގެ އެތެރޭގައި ވެސް ވަނީ ބޮޑުވެފައެވެ. އެ މައްސަލައިގެ ތެރެއިން ވެލެންސިއާގެ ޗެއާމަންކަމުގެ މަގާމުގައި ހުންނެވި ކުރީގެ ކުޅިވަރު ނޫސްވެރިޔާ އަބްދުﷲ އަޒްމީންގެ އިތުބާރު ނެތް ކަމަށް ވެސް އެ ކްލަބުގެ ބޯޑުން މިހާރު ވަނީ ނިންމައިފައެވެ.