10 Jan 2024, 21:43
ޓެކްނިކަލް ދާއިރާއިން ތައުލީމް ހާސިލްކުރަން ބޭނުންވާ ޒުވާނުންނަށް ސްޓެލްކޯއިން ސްކޮލާޝިޕްގެ ފުރުސަތު ލިބޭނެ ސްކީމެއް މި އަހަރުގެ ތެރޭގައި ހުޅުވާލާން ނިންމާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު ޙުސައިން ފަހުމީ މިއަދު ވިދާޅުވެއްޖެއެވެ.
ފަހުމީ މިހެން ވިދާޅުވީ، ދޮންއަދަރާދަ ހިނގުން ހުޅުވުމާއި މާލޭ އިންޖީނުގޭގައި ކުރިއަށްދާ ބައެއް މަސައްކަތްތައް ނޫސްވެރިންނަށް ދެއްކުމަށް ބޭއްވި ޓުއާއެއްގައި ވާހަކަފުޅު ދައްކަވަމުންނެވެ.
އޭނާ ވިދާޅުވީ ޒުވާނުން ރާއްޖެއިން ބޭރަށް ފޮނުވައިގެން ނަމަވެސް ޓެކްނިކަލް ދާއިރާއަށް މީހުން ތަމްރީނުކޮށް މި ދާއިރާގެ މުސްތަގުބަލް ރަނގަޅުކުރަން ބޭނުންވާކަމަށެވެ.
''މި ދާއިރާއިން ކިޔަވައިގެން ތިބި މީހުން ބޭނުންވަނީ. އަޅުގަނޑުމެންގެ ތެރެއިން ނެތެކޭ ނޫން. އެހެންނަމަވެސް ޒުވާނުން ބޭނުންވޭ މި ދާއިރާއަށް،'' ފަހުމީ ވިދާޅުވިއެވެ.
މީގެއިތުރުން، މިހާރުވެސް ސްޓެލްކޯގެ ވަޒީފާތަކުގައި އަންހެނުން މަސައްކަތް ކުރަމުންދާކަން ފާހަގަކޮށް އޭނާ ވިދާޅުވީ، އެ ކުންފުނިން އަންހެނުންނަށް ތަމްރީނުވުމުގެ ފުރުސަތު ފަހިކޮށްދޭނެ ކަމަށެވެ.
އެ ކުންފުނީގައި މަސައްކަތް ކުރަނީ މުޅިން ވެސް ދިވެހި މުވައްޒަފުން ކަމަށް ފަހުމީ ވިދާޅުވިއެވެ. އެގޮތުން ސްޓެލްކޯއަކީ ދިވެހިން މުޅިން މަސައްކަތް ކުރާ ދައުލަތުގެ ހަމައެކަނި ކުންފުނި ކަމުގައި އޭނާ ވިދާޅުވިއެވެ.
މިއަހަރު ސެޕްޓެމްބަރު މަހު ސްޓެލްކޯއަށް 75 އަހަރު ފުރުން ފާހަގަކުރުމަށް ޚާއްޞަ ހަރަކާތްތަކެއް ބޭއްވުމަށް އެ ކުންފުނިން ވަނީ ނިންމައިފައެވެ.