10 Jan 2024, 21:13
ނިމިދިޔަ ރިޔާސީ އިންތިޚާބުގެ ދެވަނަ ބުރާ އަޅާ ބަލާއިރު, އަންނަ މާޗު މަހުގެ 17ގައި ބާއްވާ ރައްޔިތުންގެ މަޖިލީހުގެ އިންތިޚާބުގައި އިތުރު 1523 މީހުންނަށް ވޯޓު ލެވޭނެ ކަމަށް އިލެކްޝަންސް ކޮމިޝަން (އީސީ)އިން މިއަދު ބުނެފިއެވެ.
އީސީގެ ނައިބު ރައީސް އިސްމާއީލް ހަބީބް އެކްސްގައި ކުރެއްވި ޕޯސްޓެއްގައި ވިދާޅުވީ، މަޖިލިސް އިންތިޚާބުގައި ވޯޓު ލިބުމުގެ ހައްގު ލިބިފައިވާ މީހުންގެ އަދަދު 284،327 މީހުންނަށް އަރާ ކަމަށެވެ.
އޭގެ ތެރޭގައި ހިމެނެނީ 145162 ފިރިހެނުންނާއި 139165 އަންހެނުން ކަމަށް ހަބީބު ވިދާޅުވިއެވެ.
އީސީން މިރޭ ވަނީ، ވޯޓުލުމުގެ ހައްގު ލިބިފައިވާ މީހުންގެރަޖިސްޓްރީއާންމުކޮށް، ރަޖިސްޓްރީއަށް ޝަކުވާ ހުށަހެޅުމުގެ ފުރުސަތު ވެސް ހުޅުވާލާފައެވެ.
އީސީން އެ ފުރުސަތު ހުޅުވާލީ މިމަހުގެ 21ގެ ނިޔަލަށެވެ. އެގޮތުން ރަސްމީ ބަންދު ނޫން ކޮންމެ ދުވަހަކު ހެނދުނު 08:30 އިން މެންދުރުފަހު 03:00އަށް އަދި ރަސްމީ ބަންދު ދުވަސްތަކުގައި ހެނދުނު 09:00އިން މެންދުރުފަހު 03:00އަށް ޝަކުވާ ހުށަހެޅޭނެ ކަމަށް ކޮމިޝަނުން ބުންޏެވެ.
މީގެއ އިތުރުން ހުކުރު ދުވަހު މެންދުރުފަހު 03:00 އިން ހަވީރު 05:00އަށް ވެސް ޝަކުވާ ހުށަހެޅޭނެ ކަމަށް އީސީން ބުންޏެވެ.
އެ ކޮމިޝަނުން ބުނީ ޝަކުވާ ބަލައިގަންނާނީ މާލެ ފިޔަވައި މީހުން ދިރިއުޅޭ އެހެން ހުރިހާ ރަށަކުން އެރަށެއްގެ ކައުންސިލް އިދާރާއިންނާއި އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުންނާއި ކުޅުދުއްފުށި ސިޓީގެ ކައުންސިލް އިދާރާއިން ކަމަށެވެ. މާލޭގައި ނަމަ، އިންތިޚާބާ ބެހޭ މަރުކަޒު ހުންނަ ދަރުބާރުގެއިން ވެސް ބަލައިގަންނާނެ ކަމަށާއި ޝަކުވާ ފޯމު ކޮމިޝަންގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެ ކަމަށް އީސީން ބުންޏެވެ.
ރިޔާސީ އިންތިޚާބުގެ ފުރަތަމަ ބުރުގައި ވޯޓު ދިނުމުގެ ހައްގު ލިބިފައިވާ މީހުންގެ އަދަދަކީ 282,395 އެވެ. އޭގެ ތެރެއިން އިންތިޚާބުގައި ބައިވެރިވީ 225،486 ނުވަތަ 79.85 ޕަސެންޓް މީހުންނެވެ.
އެ އިންތިޚާބުގެ ދެވަނަ ބުރުގައި ވޯޓު ދިނުމުގެ ހައްގު ލިބިފައިވާ މީހުންގެ އަދަދު 282,804އަށް އިތުރުވިއެވެ. އޭގެ ތެރެއިން ވޯޓު ދިނީ 246،915 މީހުންނެވެ.