10 Jan 2024, 14:49
ގދ. ތިނަދޫއަކީ ސިޓީއެއްކަމަށް ކުރީގެ ރައީސް އިބްރާހިމް މުހައްމަދު ޞާލިޙް ނިންމެވި ނަމަވެސް، ގާނޫނު އަސާސީ އޮތްގޮތުން ލޯކަލް ކައުންސިލްތަކުގެ އިންތިޚާބު ބޭއްވެއްދެން އެ ސިޓީގައި ދެމިއޮންނާނީ ރަށު ކައުންސިލެއް ކަމަށް ލޯކަލް ގަވަރުމަންޓު އޮތޯރިޓީ (އެލްޖީއޭ)އިން މިއަދު ނިންމައިފިއެވެ.
ކުރީ ސަރުކާރުގައި ތިނަދޫއަށް ސިޓީއެއްގެ ދަރަޖަ ދިން ނަމަވެސް އެ ރަށު ކައުންސިލްގެ ހައިސިއްޔަތާ މެދު ސުވާލު އުފެދިގެން އެ ކައުންސިލުން ވަނީ މަޖިލީހަށް އެ މައްސަލަ ހުށަހަޅައިފައެވެ. އެހެންވެ، މަޖިލީހުގެ ލާމަރުކަޒީ ކޮމިޓީން ވަނީ ގާނޫނު އިސްލާހުކުރަން ވެސް ނިންމައިފައެވެ.
މިއަދު އޮތް އެލްޖީއޭގެ މި އަހަރުގެ ފުރަތަމަ ބޯޑު ބައްދަލުވުމަށް ވަނީ އެ ސިޓީގެ ކައުންސިލަށް ފޮނުވާ ސިޓީތައް ކައުންސިލްގެ ރައީސްގެ ބަދަލުގައި މޭޔަރަށް އެޑްރެސްކުރަން އަންގަމުންދާ މައްސަލައެއް ބަލައިފައެވެ.
އެލްޖީއޭއިން ފާހަގަކޮށްފައިވާ ގޮތުގައި ގާނޫނު އަސާސީގެ 231 ވަނަ މާއްދާގައި ވާގޮތުން، ސިޓީ ކައުންސިލެއް އުފެއްދުމުގެ ޖާގަ ރައީސުލްޖުމްހޫރިއްޔާއަށް ލިބުނަސް އެ ކައުންސިލުގައި ތިބެންވާނީ އެ ސިޓީއެއް ނުވަތަ ރަށެއްގެ ރައްޔިތުން އިންތިޚާބުކުރާ މެންބަރުން ކަމަށް ބަޔާންކޮށްފައިވެއެވެ. އަދި، ކައުންސިލަށް އިންތިޚާބު ކުރާ މީހުން ފަނޑިޔާރެއްގެ ކުރިމަތީގައި މަގާމުގެ ހުވާ ކުރަންޖެހޭނެކަން ވެސް ބަޔާންކުރާކަން ވަނީ ފާހަގަކޮށްފައެވެ.
އަދި، ދައުރު ހަމަވުމުކުގެ ކުރިން ސިޓީއަކަށް ބަދަލުކޮށްފި ނަމަ ކައުންސިލުގެ ދައުރު ހަމަވަންދެން އެ ސިޓީއެއް ހިންގާނީ އެންމެ ފަހުން އިންތިޚާބުކުރި ރަށު ކައުންސިލަކުން ކަމަށް ގާނޫނުގައި ބަޔާންކުރާ ކަމަށް އެލްޖީއޭއިން ވަނީ ފާހަގަކޮށްފައެވެ. މަޖިލީހުގެ ލާމަރުކަޒީ ކޮމިޓީއަށް މަޖިލީހުގެ ކައުންސެލާ ޖެނެރަލް ފާތިމަރު ފިލްޒާ ދެއްވި ލަފާގައި ވެސް އެކަން އެގޮތަށް އޮތްކަން ވަނީ ފާހަގަކުރައްވައިފައެވެ.
މީގެ އިތުރުން، 2020 ވަނަ އަހަރު ހދ. ކުޅުދުއްފުއްޓަށް ސިޓީއެއްގެ ދަރަޖަ ދިނުމާ ގުޅިގެން ވެސް އަމަލުކޮށްފައިވަނީ އެގޮތަށް ކަމަށް އެލްޖީއޭއިން ވަނީ ފާހަގަކޮށްފައެވެ. މިގޮތުން، ޖެހިގެން އައި 2021 ވަނަ އަހަރުގެ މޭ މަހުގެ 17 ވަނަ ދުވަހުގެ ނިޔަލަށް ކުޅުދުއްފުށީ ސިޓީ ވެސް ހިންގަމުން އައި ރަށު ކައުންސިލަކުންނެވެ.
"އެހެންކަމުން، ހިނގަމުންދާ ތިނަދޫ ރަށު ކައުންސިލުގެ ދައުރު ހަމަވެ، ސިޓީ ކައުންސިލެއް އިންތިޚާބުވަންދެން، އެ ކައުންސިލްގެ ހައިސިއްޔަތަށް އެއްވެސް ބަދަލެއް ނައިސް ރަށު ކައުންސިލު ދެމިއޮންނާނެ ކަމަށް ދެކެމެވެ،" އެލްޖީއޭގެ ނިންމުމާ ގުޅިގެން ނެރުނު ބަޔާނުގައި ބުނެފައިވެއެވެ.
އެހެންވެ، ތިނަދޫ ކައުންސިލަށް ފޮނުވާ ސިޓީތައް އެޑްރެސްކުރަންވާނީ، އެ ރަށު ކައުންސިލްގެ ރައީސަށް ކަމަށާއި މޭޔަރަށް ނޫން ކަމަށް އެލްޖީއޭއިން ވަނީ ނިންމަިއފައެވެ.
އޭރުގެ ރައީސް އިބްރާހިމް މުހައްމަދު ޞާލިޙްގެ ވައުދުފުޅާ އެއްގޮތަށް ތިނަދޫއަށް ސިޓީއެއްގެ ދަރަޖަ ދީފައިވަނީ ނިމުނު 2023 ވަނަ އަހަރުގެ އޮގްސްޓު މަހުގެ 30 ވަނަ ދުވަހުއެވެ.