10 Jan 2024, 13:20
ޖުމުލަ 198 ބައިވެރިންނާ އެކު 36 ވަނަ ފުލުހުންގެ އަސާސީ ތަމުރީނު ކޯސް އައްޑޫ ސިޓީގައި ހޯމަ ދުވަހު ފަށައިފިއެވެ.
މި ކޯހަކީ ފުލުހުންގެ ވަޒީފާއަށް ބޭނުންވާ ތަމުރީނާއި ތަރުބިއްޔަތު އުގަންނައިދީ ފުލުހުންގެ މަސައްކަތަށް ބޭނުންވާ އިލްމީ ގާބިލުކަމާއި ތަޖުރިބާ ލިބިދިނުމަށް އަމާޒުކޮށް ދިވެހި ފުލުހުންގެ ޚިދުމަތުގެ ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްޓްމަންޓުން ހިންގާ ކޯހެކެވެ.
މި ކޯސް ފަށައިފައިވަނީ މި ހަފުތާގެ ހޯމަ ދުވަހު އައްޑޫ ސިޓީ ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްޓްމަންޓުގައެވެ.
މި ކޯސް ކުރިއަށް ގެނދަން ހަމަޖެހެފައިވަނީ 16 ހަފުތާގެ މުއްދަތަކަށެވެ. މި ކޯހުގައި 48 އަންހެން ފުލުހުންނާއި 150 ފިރެހެން ފުލުހުން ހިމެނޭހެން ޖުމްލަ 198 ފުލުހުން ބައިވެރިވެފައިވެއެވެ.
ކޯސް އިފުތިތާހުކުރުމުގެ ތެރެއިން -- ފޮޓޯ/ފުލުހުން
މި ތަމުރީން ކޯސް އިފްތިތާޙު ކޮށްދެއްވައި ޝަރަފުވެރިކޮށް ދެއްވީ ނޭޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓްގެ އެގްޒެކެޓިވް ޑިރެކްޓަރު އެސިސްޓެންޓް ކޮމިޝަނާ އޮފް ޕޮލިސް ޔޫނުސް ސޮބާހެވެ.
މި ރަސްމިއްޔާތުގައި މުއައްސަސާގެ ވެރިންނާއި ފުލުހުންގެ ސީނިއަރު ބައެއް އޮފިސަރުންނާއި އައްޑޫ ސިޓީ ޕޮލިސް ސްޓޭޝަންތަކުގެ އިސްވެރިންނާ އަދި ޓްރެއިނިން ކޯހުގެ މުދައްރިބުންނާއި ދަރިވަރުން ބައިވެރިވެލެއްވިއެވެ.
މި ކޯހުގައި ކިޔަވައިދޭ މޮޑިއުލްތަކުގެ ތެރޭގައި ފިޒިކަލް ޓްރެއިނިން، އޮޕަރޭޝަނަލް ސޭފްޓީ އެންޑް ޓެކްޓިކްސް، ގާނޫނާއި ގަވާއިދުތަކުގެ އިތުރުން ފުލުހުންގެ މަސައްކަތްތަކާ ގުޅުންހުރި ގިނަ މޮޑިއުލްތަކެއް ހިމެނެއެވެ.