10 Jan 2024, 12:27
މި އަހަރު ބާއްވަން ހަމަޖެހިފައިވާ 20 ވަނަ ރައްޔިތުންގެ މަޖިލީހުގެ އިންތިޚާބު އަންނަ މާރިޗު 17 ބާއްވަން މިއަދު އިލެކްޝަންސް ކޮމިޝަން (އީސީ)ން ނިންމައިފިއެވެ.
މިހާތަނަށް މަޖިލީސް އިންތިޚާބު ބާއްވާނެ ދުވަހެއް ކަނޑަނޭޅި ލަސްވެފައިވަނީ ރޯދަ މަހާ ދިމާވާތީ ހުރި ދަތިތަކުގެ ސަބަބުންނެވެ.
އިލެކްޝަންސް ކޮމިޝަނުން މިއަދު ނިންމާފައިވަނީ މި އަހަރުގެ މަޖިލީސް އިންތިޚާބު މާރިޗު މަހުގެ 17ވާ، އާދިއްތަ ދުވަހު ބާއްވާށެވެ. އެ ދުވަސް ދިމާވަނީ މި އަހަރުގެ ރޯދަ މަހުގެ ފުރަތަމަ ހަފުތާއާއެވެ.
އީސީން މިއަދު ބުނީ، ރޯދަ މަހުގެ ފަހުގެ ތާރީޚެއްގައި އިންތިޚާބު ބާއްވަން އިދާރީގޮތުން ބޮޑެތި ގޮންޖެހުންތަކެއް އެބަހުރި ކަމަށެވެ. އަދި، ދިރާސީ ކަލަންޑަރުގައިވާގޮތުން ޢީދު ބަންދަށް ފަހު ފެށޭ ހަފުތާއަކީ ސްކޫލުތަކުގެ އިމްތިހާނު ދުވަސްތަކަކަށް ވާތީ، އެކަށިގެންވާ އަދަދަށް ވޯޓުލާ މަރުކަޒުތައް ހޯދުމުގައި ވެސް ދަތިތައް ކުރިމަތިވާނެ ކަމަށެވެ.
މީގެ އިތުރުން، ރޯދަ މަހުގެ ފަހު 10 އަކީ ސަރުކާރުގެ ބަންދު ދުވަސްތަކެއް ގޮތުގައި މިހާރު ސަރުކާރުން ކަނޑައަޅާފައިވާތީ އިދާރާތަކާ ގުޅިގެން ނިންމަން ޖެހޭ މަސައްކަތްތައް ނިންމުމުގައި ދަތިތައް ކުރިމަތިވެދާތީ މާޗު 17ވާ އާދިއްތަ ދުވަހު މަޖިލީސް އިންތިޚާބު ބާއްވަން ނިންމީ ކަމަށެވެ.
މީގެ ކުރިން އިދިކޮޅު އެމްޑީޕީން ވަނީ މަޖިލިސް އިންތިޚާބު ރޯދައިގެ ފަހުން ބާއްވަން އެދި އީސީއަށް ސިޓީއެއް ވެސް ފޮނުވައިފައެވެ. އެމްޑީޕީން ބުނެފައިވަނީ ރޯދަ މަހުގެ ތެރޭ މަޖިލީސް އިންތިޚާބު ބާއްވަން ސަރުކާރުން އީސީއަށް ޕްރެޝަރުކުރަމުންދާ ކަމަށެވެ.
އީސީގެ ނައިބު ރައީސް އިސްމާއިލް ހަބީބު މީގެ ކުރިން ވިދާޅުވީ، ރޯދައިގެ ފަހަށް ބާއްވާ ކަމަށް ވާނަމަ އެ ދިމާވަނީ ޢީދު ބަންދާކަމަށެވެ. އަދި، ރޯދަ މަސް ނިމޭއިރަށް އެކި މީހުން އެކި ދިމަ ދިމާލަށް ފުރާނެ ކަމަށް އޭނާ ވިދާޅުވިއެވެ.