10 Jan 2024, 11:17
ފަރުމަސް އާލާކުރުމުގެ ހުނަރު އުނގަންނައިދިނުމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއާއި މޯލްޑިވްސް މެރިން ރިސާޗް އިންސްޓިޓިއުޓު ގުޅިގެންކޯހެއްކުރިއަށް ގެންދަން ނިންމައި، ބައިވެރިވުމުގެ ފުރުސަތު އިއްޔެ ހުޅުވާލައިފިއެވެ.
މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމްގެ ދަށުން ހިންގާ މި ކޯހުގެ މައިގަނޑު މަގުސަދަކީ މި ދާއިރާއިން މީހުން ބިނާކުރުން ކަމަށް ފިޝަރީޒް މިނިސްޓްރީން ބުނެއެވެ.
މި ކޯސް ކުރިއަށް ދާނީ މި ފެށޭ ފެބްރުއަރީ މަހުގެ އަށްވަނަ ދުވަހުން 21 ވަނަ ދުވަހުގެ ނިޔަލަށް ޖުމުލަ 15 ބައިވެރިންނާ އެކުގައި ކ. މަނިޔަފުށީގައެވެ. މި ކޯހުގައި ބައިވެރިވުމުގެ ފުރުސަތު މި މަހުގެ 31 ވަނަ ދުވަހުގެ 14.00ގެ ނިޔަލަށް އޮންނާނެއެވެ.
އަދި، ބައިވެރިވާން ޝައުގުވެރިވާ ފަރާތްތަކުން ބައިވެރިވުމަށް ފުރިހަމަ ކުރަން ޖެހޭ ފޯމު ފުރިހަމަ ކުރުމަށް ފަހު އައިޑީކާޑުގެ ކޮޕީއެއް ހުށައެޅުމަށް އެ މިނިސްޓްރީއިން ވަނީ އެދިފައެވެ. ނުވަތަ ފޯމު އީމެއިލް ކުރައްވާނަމަ ކުރައްވާނީ[email protected]އަށް ކަމަށް ވެސް ބުނެފައިވެއެވެ.
މިނިސްޓްރީން ކުރި އިއުލާނުގައި ވަނީ ތަމުރީނު ޕްރޮގްރާމްގައި ބައިވެރިވުމަށް 15 މީހުންނަށް ވުރެ އިތުރަށް ފޯމު ހުށަހަޅާފައިވާނަމަ، ބައިވެރިން ހޮވާނީ ފޯމު ހުށަހަޅާ ތަރުތީބުން ކަމަށެވެ.
ކޯހުގެ ބޭނުމަށް މާލެއާއި މަނިޔަފުއްޓާ ދެމެދު ކުރާ ދަތުރުތަކާއި ބައިވެރިންގެ ހުރުމާއި ކެއުމުގެ އިންތިޒާމް އެ އިންސްޓިޓިއުޓްގެ ފަރާތުން ހަމަޖައްސައިދޭނެއެވެ. ކޯހާ ގުޅޭ އިތުރު މައުލޫމާތު ހޯދަން ބޭނުންވާ ފަރާތްތަކުން 3028730 ނުވަތަ 3322242 ގުޅައިގެން މައުލޫމާތު ސާފުކުރުމަށް މިނިސްޓްރީން ވަނީ އެދިފައެވެ.