10 Jan 2024, 08:48
ހުސްވި އަހަރު ދުނިޔޭގެ އެންމެ ނުފޫޒު ގަދަ އަރަބި ލީޑަރުގެ މަގާމު ސައުދީ އަރަބިއާގެ ވަލީ އަހުދު މުޙައްމަދު ބިން ސަލްމާނަށް ލިބިއްޖެއެވެ.
މިއީ ވަލީއަހުދަށް އެ މަގާމު ލިބޭތާ ވިދިވިދިގެން ތިންވަނަ އަހަރެވެ.
ރަޝިޔާ ސަރުކާރުން ހިންގާ ރަޝިޔާ ޓުޑޭ ޓީވީން މިދިޔަ ޑިސެމްބަރު މަހު 15 އިން ޖެނުއަރީ ހަތްވަނަ ދުވަހާ ހަމައަށް ނެގި ޕޯލަކުން ދައްކާ ގޮތުގައި ސައުދީ ވަލީ އަހުދަށް ލިބިފައިވަނީ 69.3 އިންސައްތަ ވޯޓެވެ. އެއީ، ޖުމްލަ 530،399 ވޯޓުން 366،403 ވޯޓު ހޯއްދަވައިގެންނެވެ.
އެ ޕޯލުން ދައްކާ ގޮތުގައި ދުނިޔޭގޭ ދެވަނައަށް އެންމެ ނުފޫޒުގަދަ އަރަބި ލީޑަރަކީ، އެކުވެރި އަރަބި އިމާރާތް (ޔޫއޭއީ)ގެ ރައީސް ޝެއިޚް މުޙައްމަދު ބިން ޒައިދެވެ. އޭނާއަށް ލިބިވަޑައިގެންފައި ވަނީ 95،033 ވޯޓެވެ. އެއީ 17.9 އިންސައްތަ ވޯޓެވެ. 20،645 ވޯޓު ހޯއްދަވައިގެން ތިން ވަނައަށް ހޮވިވަޑައިގަތީ ފަލަސްތީނުގެ ރައީސް މަޙުމޫދު އައްބާސެވެ.
އެންމެ ނުފޫޒުގަދަ އަރަބި ލީޑަރު ހޮވަން އެންމެ ފަހުން ނަގައިފައިވާ ޕޯލުން ވަލީ އަހުދަށް ވަނީ ހަތް މިލިއަން ވޯޓު ލިބިވަޑައިގެންފައެވެ. އެއީ، ޖުމްލަ 12 މިލިއަން މީހުންގެ ވޯޓުންނެވެ. ރަޝިޔާ ޓުޑޭއިން ބުނީ ރަޝިޔާއާ ދެކޮޅަށް ހުޅަނގުން އަޅައިފައިވާ ދަތިކުރުމުގެ ފިޔަވަޅުތަކުގެ ސަބަބުން މިދިޔަ އަހަރު ނެގި ޕޯލުގައި ބައިވެރިވި މީހުންގެ އަދަދަށްވުރެ މި އަހަރު ނެގި ޕޯލުގައި ބައިވެރިވި މީހުންގެ އަދަދު ވަނީ ވަރަށް ބޮޑަށް ދަށްވެފައެވެ.