11 Jan 2024, 14:32
ދުނިޔޭގެ ފުރަތަމަ މަލްޓިސްކޯޕް މެޑިކަލް ސްކޭނަރު ނުވަތަ އެއް ޑިވައިސްއަކުން ގިނަ ސްކޭންތަކެއް ހެދޭ އުފެއްދުމެއް ފަރަންސޭސިވިލާތުގެ މަޝްހޫރު ކުންފުނި ވިތިންގްސްއިން ދައްކާލައިފިއެވެ.
ސިއްހީ ދާއިރާގެ އުފެއްދުންތަކުގެ ލީޑަރެއްގެ ގޮތުގައި މަޝްހޫރުވެފައިވާ ވިތިންގްސްއިން ތައާރަފުކުރި އެ ޑިވައިސްއަށް ކިޔާފައިވާ ނަމަކީ "ބީމޯ"އެވެ.
އެ ޑިވައިސްއިން ބަލައިލެވޭ ކަންތައްތަކުގެ ތެރޭގައި ހަށިގަނޑު ފިނިހޫނުމިނާއި ލޭގައި އޮކްސިޖެން ހުންނަ މިންވަރާއި ހިތުގެ ވިންދާއި ނޭވާލާ ނިޒާމު ހިނގަމުންދާ ހާލަތު ހިމެނެއެވެ.
ވިތިންގްސްއިން ބުނީ، ބީމޯ އުފެއްދުމުގެ އަމާޒަކީ ގޭގައި ތިބެގެން ސިއްހީ ހާލަތު ބެލުމުގެ ފުރުސަތު މީހުންނަށް ދިނުން ކަމަށެވެ.
ބީމޯ ޑިވައިސް، ވައިފައި ނުވަތަ ބްލޫޓޫތު މެދުވެރިކޮށް ފޯނާ ގުޅާލެވޭ: ބީމޯއިން ހޯދާ މައުލޫމާތު ވިތިންގްސްގެ ފޯން އެޕްގައި ރައްކާކުރެވޭނެ -- ފޮޓޯ/ ވިތިންގްސް
"މުސްތަގުބަލުގެ ތާމޯމީޓަރު"ގެ ގޮތުގައި ސިފަކޮށްފައިވާ ބީމޯއިން ސްކޭނެއް ހެދުމަށް ނަގަނީ 60 ސިކުންތެވެ. އެ ޑިވައިސް ޔޫއެސްބީސީ ކޭބަލަކުން ޗާގު ކުރެވެއެވެ.
ބީމޯއިން މައުލޫމާތު އެއްކުރަނީ ޑިވައިސް ދީމާކުރާ ގުނަވަނަކަށް ބަލައިފައެވެ. އެގޮތުން ނިއްކުރީގައި ޖެއްސުމުން ފިނިހޫނުމިން ބަލައިދޭނެއެވެ. އަދި މޭމަތީގައި ޖެއްސުމުން ފުއްޕާމެއާއި ހިތުގެ ހާލަތު، އަޑުތަކުން ދެނެގަންނާނެއެވެ. ބީމޯގެ ޔޫއެސްބީސީ ޕޯޓަށް ހެޑްސެޓް ޖަހައިގެން އެ އަޑުތައް އެހޭނެއެވެ.
މީގެ އިތުރުން ހިތުގެ ވިންދު މާ އަވަސްވެއްޖެ ނަމަ ނުވަތަަ މާ ލަސްކޮށް ހުންނަ ނަމަ އެ ޑިވައިސްއިން އަންގައިދޭނެއެވެ. ނަމަވެސް، ހިތާއި ފުއްޕާމޭގެ އަޑުތަކުން ދޭހަވާ އެއްޗެއް ކިޔައިދެވޭނީ ޑޮކްޓަރަކަށްކަން ވިތިންގްސްއިން ފާހަގަކުރެއެވެ. އަދި ބީމޯއިން އެއްކުރާ މައުލޫމާތުން އެ މީހެއްގެ ނޭވާހިއްލުން ފަދަ މައްސަލަތައް ހުންނަތޯ ޑޮކްޓަރުންނަށް ބެލޭނެ ކަމަށް އެ ކުންފުނިން ބުނެއެވެ.
ހިތުގެ ވިންދު މާ އަވަސްވެއްޖެ ނަމަ ނުވަތަަ މާ ލަސްކޮށް ހުންނަ ނަމަ ބީމޯއިން އެކަން އަންގައިދޭނެ -- ފޮޓޯ/ ވިތިންގްސް
އެ ޑިވައިސް ވައިފައި މެދުވެރިކޮށް ނުވަތަ ބްލޫޓޫތުއިން ފޯނާ ގުޅައިލެވޭނެއެވެ. އަދި ވިތިންގްސްގެ އެޕް ޑައުންލޯޑް ކުރުމުން، ބީމޯއިން ހޯދާ މައުލޫމާތު އެ އެޕްގައި ރައްކާ ކުރާނެއެވެ.
ވިތިންގްސްގެ ބާނީ އަދި ރައީސް އެރިކް ކެރީލް ބުނި ގޮތުގައި، އަމިއްލަ މީހާގެ ނުވަތަ އާއިލާގެ މެންބަރުންގެ ސިއްހީ ހާލަތު ބެލުމުގެ މަސައްކަތަށް ބީމޯއިން އިންގިލާބީ ބަދަލުތަކެއް ގެންނާނެއެވެ.
ވިތިންގްސްއިން އުންމީދު ކުރަނީ މި އަހަރު ބީމޯ ނެރުމަށް ހުއްދަ ލިބި، އޮސްޓްރޭލިއާގައި ނެރެވޭނެ ކަމަށެވެ. އެ ޑިވައިސްގެ އަގު ގާތްގަނޑަކަށް 450 ޑޮލަރަށް އަރާނެ ކަމަށް އެ ކުންފުނިން ބުނެއެވެ.