10 Jan 2024, 08:40
އެ ހިސާބަށް ބުނެފައި މުނީރު މައާލްއަށް ބަލާލިއެވެ. އެއަށްފަހު އޭނާ ރާދިންއަށް ވެސް އަވަސް ނަޒަރެއް ދިނެވެ.
އެހުރިހާ ވާހަކައެއް ކިޔައިދިން އިރުވެސް މުނީރަށް ހިތްވަރު ނުލިބުނީ މައާލްގެ ޙަޤީޤީ މައިންބަފައިންގެ ވާހަކަ ބުނުމަށެވެ. އެވާހަކަ އެފަދަ ގޮތަކަށް ބުނެފިނަމަ އެންމެންގެ ވަސިއްޔަތަށް ޚިޔާނާތްތެރިވެވުނީކަމުގައި އޭނާގެ ސިކުނޑި ވިސްނައިދެމުން ދިޔައީތީއާވެސް އެކުގައެވެ.
"ކޮން އިރަކު ބަޔާން ދޭން ދާން ޖެހެނީ؟" ތަނަށް ވެރިވި ހަމަހިމޭންކަން ފޫދުއްވާލީ މައާލްގެ އަޑެވެ.
"އެމީހުން ގުޅާނެކަމަށް ބުނީ." މުނީރު ބުނެލިއެވެ. އިތުރު އެއްޗެއް މައާލް ނުބުނުމުން މުނީރު ރާދިންއަށް ބަލާލިއެވެ.
"އަޅުގަނޑު ގޮސްލާނަން. މާދަމާ ދާނަން ސްޓޭޝަނަށް." ރާދިން އެހެން ބުނެލާފައި ތެދުވެލިއެވެ.
"ގުޑް ނައިޓް" މައާލްއަށް ބަލައިލާފައި، ރާދިން ހިނިތުންވެލާފައި، ފަސްދީ ހިނގައިގަތެވެ. އެންމެ ފަހަރަކުވެސް މައާލް އޭނާ ހުއްޓުވާނެ ނަމައޭ ރާދިންގެ ހިތަށް އެރިއެވެ.
"ސްޓާރ ޕެލެސް" އިން ނުކުތް ރާދިން ފުންނޭވާއެއް ދޫކޮށްލުމަށްފަހު، މައްޗަށް ބަލާލިއެވެ. އުދާސްކަމާއި ހާސްކަމުގެ ނޭވާއެއް ދޫކޮށްލާފައި އޭނާ ގޮސް ކާރަށް އެރީ ޑްރައިވަރު ކާރު ދޮރު ހުޅުވާލަ ދިނުމުންނެވެ. ދާންވީތަން ބުނެލި ރާދިން ގޮނޑީގައި ލެނގިލިއެވެ.
ހޮޓެލަށް ދެވުމާއެކު ފެންވަރާ ތާޒާވެލައިގެން، ނުކުމެ ރާދިން، އެނދުގައި އޮށޯވެލީ ވަރުބަލިވެފައި ހުރިލެއް ބޮޑުކަމުންނެވެ. ހަށިގަނޑުގެ ހަތަކަ ދަށްވެފައި ހުރިނަމަވެސް، ނިދީގެ އެއްވެސް އަސަރެއް އޭނާގެ ލޮލުގައި ނުވެއެވެ. ހީވަނީ ނިދި އެތައް ހާއްމޭލެއްގެ ދުރުގައި ވާހެންނެވެ. ނޫނީ ލިބިފައިވާ ނުތަނަވަސްކަމުގެ ސަބަބުން ނިދަން އޭނާގެ ޒަމީރު ތަން ނުދެނީއެވެ. ނަފްސުގައިވީ ހައިޖާނުގަނޑުގެ ތެރޭގައި މީހާ ޣަރަގުވަމުން ދިޔަ އިޙްސާސް އިތުރަށް ބޮޑުވެގެން ދިޔައީ ވައިބާއިން އައި މެސެޖް ފެނިފައެވެ.
ދުވަސްކޮޅަކަށްފަހު ސަޖާގެ މެސެޖެއް ލިބުމުން ރާދިންގެ ދެބުމަ ގާތްވިއެވެ. ސަޖާގެ މެސެޖުގައި އޮތީ ރާދިން މާލޭގައި ނެތްކަން އެނގޭ ކަމަށާއި، މާލެ އަންނަ ދުވަސް އޮޅުން ފިލުވަން ބޭނުންވާކަމަށް ބުނެފައެވެ.
"އަހަރެން ދާ ދުވަހާ އަންނަ ދުވަހާ ބަލާކަށް ސަޖާއަކަށް ނުޖެހޭނެ." ޖަޒުބާތުގައި ޖެހުނު ރާދިން މެސެޖް ފޮނުވާލިއެވެ.
"އެ ހައްޤު އަހަންނަށް އޮތްކަމަށް ރާދިން އަދިވެސް އިންކާރު ކުރަނީތަ؟ ކިތަންމެ ވަރަކަށް ދެކޮޅު ހެދިނަމަވެސް، މާލެ އައިހާ އަވަހަކަށް ރާދިން ޖެހޭނީ އަހަންނާ ކައިވެނިކުރަން." ސަޖާގެ ދެވަނަ މެސެޖުގައި އޮތީ އެހެންނެވެ.
"އަހަރެން ކައިވެނި ކުރާނެ މީހަކު އެނގޭނީ އަހަންނަށް. އިތުރު މީހަކަށް އަހަންނަށް މަޖުބޫރެއް ނުކުރެވޭނެ." ރާދިން ވެސް ރައްދު ދިނެވެ.
"އިތުރަށް އެއްވެސް ވާހަކައެއް ދައްކާކަށް ބޭނުމެއް ނޫން. އަހަރެން މިހުރީ އިންތިޒާރުގައި. އަތުން ބީވި އުފަލަކަށްވުރެ ލިބެން އޮތް އުފަލެއް ޚިޔާރުކުރުން ރާދިންއަށްވެސް ބުއްދިވެރިވާނެ. އަދި އެ އުފަލަކީ އަހަންނާ އަހަރެންގެ ބަނޑުގައިވާ ދަރިފުޅު." ސަޖާގެ އެންމެ ފަހު މެސެޖުގައި އޮތީ އެހެންނެވެ. އިތުރަށް ރާދިން ކުރި އެއްވެސް މެސެޖަކަށް ސަޖާ ޖަވާބެއް ނުދެއެވެ. ގުޅުމުން ފޯނެއް ވެސް ނުނަގައެވެ. އެކަމާ ރާދިންގެ ރުޅިގަނޑު ހިލުމާއެކު އޭނާ ފޯނުވެސް އަތުގެ ކޮޅަށް ހޫރާލަން އުޅެފައިވެސް ފަސްޖެހުނެވެ. އަމިއްލަ ނަފްސު ކޮންޓްރޯލް ކުރަމުން ރާދިން، ލޯ މަރާލިއެވެ.
***
އެނދުގައި އޮތް މައާލްއަށް ވެދިޔަ ހުރިހާކަމަކާ މެދު ވިސްނެމުން ދިޔައެވެ. ފުއާދާއި ބައްޕަގެ މާޒީ އެނގުމަށްފަހު، ފުއާދާ މެދު އޭނާގެ ހިތުގައި ވެސް ރުޅިވެރިކަމެއް އުފެދެމުން ދިޔައެވެ. އޭނާގެ މައިންބަފައިންގެ ގާތިލަށް އޭނާ ދުވަހަކުވެސް މާފެއް ނުކުރާނެއެވެ. އޭނާގެ މައިންބަފައިންގެ އިތުރުން ރާދިއުގެ މަރުގެ ޒިންމާ ފުއާދު ނަގަންޖެހޭނެއެވެ. ދެލޯ ފެންކަޅިވި ނަމަވެސް، ނުރޯން މައާލް ހިތްވަރުކުރިއެވެ. ރޮއިގެން ބަލިކަށިވުމަށްވުރެ، ހިތްވަރު ގަދަ އަންހެންކުއްޖަކަށް އޭނާ ވާން އެބަ ޖެހެއެވެ. ތަޤުދީރުގެ ނިންމުމާ ރުހި ގަބޫލުވާން އެބަ ޖެހެއެވެ. ކޮންމެ ކަމެއްގައި ވެސް ހެވެއްވާކަމުގައި ގަބޫލުކުރަން އެބަ ޖެހެއެވެ. މާދަމާ ބަޔާން ދިނުމަށްޓަކައި ފުލުހުންގެ އިދާރާއަށް ދާން ޖެހޭތީ އެކަމާވެސް މައާލް ދިޔައީ ވިސްނަމުންނެވެ. ކުޑަ ނުތަނަވަސްކަމެއް ވީ ނަމަވެސް، އޭނާއާއެކު މުނީރުގެ އިތުރުން ރާދިން ހުންނާނެތީ އެ ހިތަށް ކުޑަ ހަމަޖެހުމެއް ލިބިފައިވެއެވެ. ގަބޫލުކުރަން ބޭނުން ނޫން ނަމަވެސް، ރާދިން ފެނުމުންވެސް އޭނާއަށް ބުނެދޭން ނޭނގޭ އިޙްސާސްއެއް ކުރުވައެވެ. ރާދިން އޭނާއަށް ހިމާޔަތް ދޭނެކަމުގައި އޭނާގެ އަމިއްލަ ނަފްސު ވެސް ޔަޤީން ކުރެއެވެ. ފެންނަ ހިސާބުގައި އެކަނި ރާދިން ހުރިނަމަވެސް، އޭނާގެ ހިތަށް އެ ލިބޭ ތަސައްލީ ބަޔާނެއް ނުކުރެވޭނެއެވެ. ރާދިންއާ ދުރުވާން ކިތަންމެ ވަރަކަށް މައާލް އޭނާގެ ބަސްނާހާ ހިތަށް ވިސްނައިދޭން މަސައްކަތް ކުރިނަމަވެސް، ރާދިންގެ ލޮލުން ފެންނަ އަސަރުތައް އެއިން ހުރިހާކަމަކަށް ހުރަސްއަޅަނީ އޭނާވެސް އަޖައިބުކުރުވާ ފަދަ ގޮތަކަށެވެ.
"އައި މިސް ޔޫ…" ބޭއިޚްތިޔާރުގައި މައާލްގެ ތުންފަތް ފޫއަޅުވާލާފައި ނުކުތީ އޭނާގެ ހިތުގެ އަޑެވެ. އެ އަޑުން ވޭނާ ކެކުޅުން ހާމަވަމުން ދިޔައިރު، އެ ދެމީހުންގެ ޙަޔާތް އެފަދަ ގޮތަކަށް ބަދަލުވެގެން ދިޔައީ ކީއްވެގެން ބާއޭ މައާލްގެ ހިތަށް އެރިއެވެ. ގޮތްދޫކުރަން ބޭނުންނުވަނީ ކީއްވެގެންކަމެއް ނޭނގެއެވެ. މިއިން ދުވަހަކު އެ ހިތަށް ތަދުނުވާވަރަށް ރާދިންގެސަބަބުން ވޭން ލިބުނީމަ ހެއްޔެވެ؟ ނޫނީ އޭނާ ތަޙައްމަލް ކުރި ފަދަ ވޭނެއް ރާދިންވެސް ތަޙައްމަލް ކުރަން ބޭނުންވާތީހެއްޔެވެ؟ ކޮންމެ ގޮތަކަށް ކޮންމެ ކަމެއް ވީނަމަވެސް، ގަބޫލުކުރަން ޖެހޭ ހަޤީގަތެއް އެބަ އޮތެވެ. އެއީ ރާދިންގެ ދެލޮލުން އެ ފެންނަ ވޭނީ އަސަރުތައް ފެންނަ ކޮންމެ ފަހަރަކު، އޭނާގެ ހިތަށް ވެސް އުނދަގޫ ވާކަމެވެ. އެހިތަށްވެސް ތަދުވާކެމެވެ. ރާދިންގެ ހިތުގައި އަޅާ ކޮންމެ ވޭނެއްގައި އޭނާގެ ހިތްވެސް ހިއްސާވަމުން ދާ ފަދައެވެ. ލޯތްބަކީ މީ ހެއްޔެވެ؟ އެކަކު އަނެކަކަށް ލިބޭ ވޭން އިޙްސާސްކުރެވުން ހެއްޔެވެ؟ އަނެކަކު ތަކުލީފުގައި ވާތަން ދެކެން ކެތް ނުކުރެވުން ހެއްޔެވެ؟
*****
ސަޖާގެ ޚަބަރެއް ނުވެ ރަޒާން ހުރީ މޮޔަވާން ކައިރިވެފައެވެ. އެގޮތަށް އޭނާއާ މެދު އަމަލުކުރަން ސަޖާ ޖެހުނު އެއްވެސް ސަބަބެއް ރަޒާންއަކަށް ނުވިސްނެއެވެ. ވަރަށް އުނދަގުލުން ރަޒާން ސަޖާ އުޅޭ ގެ ހޯދިއެވެ. އޭނާއަށް އެނގުނު ގޮތުގައި މިހާރު ސަޖާ އުޅެމުން ދަނީ ހުޅުމާލޭން އެޕާރޓްމެންޓެއްގައެވެ. ރަޒާން ކާރުގައި ހުޅުމާލެއަށް ދިޔައެވެ. ހެނދުނުގެ ވަގުތަކަށްވީ ނަމަވެސް، އުޑުމަތި އޮތީ ބަނަކޮށް ކަމުން ފަޒާގައި ތެތްފިނިކަން ވެއެވެ. ސަޖާ އުޅޭގެއަށް ގޮސް ބެލްއަޅާލާފައި ރަޒާން މަޑުކޮށްލިއެވެ.
"ޔެސް" އެތެރެއިން ދޮރު ހުޅުވި އަންހެން ކުއްޖާ ހުރީ ކުރު ސޯޓަކާއި އަތް ކެނޑި ޓީޝާޓެއްގައެވެ. އޭރުވެސް އެއް އަތުގައި ރޯކޮށްފައި ސިގިރެޓްއެއް އޮތެވެ. އެ އަންހެން ކުއްޖާގެ ފައިން ފަށައިގެން ބޮލާ ހިސާބަށް ބަލައިލި އިރު އޭނާއަށް އަނެއްކާ އެ އާދެވުނީ ރަނގަޅު ތަނަށްބާއޭ ރަޒާންގެ ހިތަށް އެރިއެވެ.
"ހެލޯ…" ރަޒާން ބަލަން ފެށުމުން އެ އަންހެން ކުއްޖާ ކުޑަކޮށް ދަމާލާފައި ރަޒާންއަށް ގޮވާލިއެވެ.
"ސަޖާ… އުޅޭތަ؟" ރަޒާން ސުވާލުކޮށްލިއެވެ.
"ސަޖާ… ކާކުތީ؟ މަޑުކުރޭ… މި ގޮވަނީ…" އެއްފަހަރާ އެތަކެއް ވާހަކައެއް ދެއްކިފަދައަކުން އެ އަންހެން ކުއްޖާ އެހެން ބުނެލާފައި ސަޖާއަށް ގޮވާލައިފިއެވެ.
"ކާކު؟ އަހަރެން ހޯދަންތަ؟" ސަޖާ އިސްތަށިގަނޑު ހުޅިއަކަށް ޖަހަމުން ކޮޓަރިން ނުކުމެލިއެވެ.
"ޔެސް…. " އަންހެން ކުއްޖާ ބުނެލިއެވެ.
"ކާކުބާ؟" ސަޖާ ގޮސް ބަލާލުމާއެކު އޭނާއަށް ސިހުން ލިބުނެވެ.
"ރަޒާ.. ރަޒާން… ކީކުރަނީތި؟" ސަޖާއަށް ސުވާލުކޮށްލެވުނެވެ.
"އަހަންނަށް ފިލައިގެން ތިއުޅެނީ ކީއްވެ؟" ސަޖާގެ މޫނުމަތިން ފެނުނު އަސަރުތަކުން އެއީ އޭނާ ގަސްތުގައި ކުރިކަމެއްކަން ރަޒާންއަށް އެނގުމާއެކު ސުވާލުކޮށްލިއެވެ.
"ރަޒާން ކީކުރަނީތަ ތީ؟" އެ ސުވާލަށް ޖަވާބު ދިނުން ސަޖާއަށް މުހިންމު ނޫންފަދައެވެ.
"އަހަރެން ކުރި ސުވާލަށް ޖަވާބެއް ނުދެމެއްނު. ކީއްވެހޭ ފިލައިގެން ތިއުޅެނީ؟" އައި ރުޅީގައި ރަޒާންގޮސް ސަޖާގެ އަތުގައި ހިފެއްޓިއެވެ. ރަޒާންގެ އަޑު ގަދަވާން ފެށުމުން ސޯފާގައި އިން އަންހެން ކުއްޖާ ވާހަކަ ދެއްކިއެވެ.
"ޢޭތް. ކިހާ ދެރަކަމެއް. ކަލޭމެން ޒުވާބު ކުރަންޏާ ދޭބަލަ ކޮޓަރިއަށް. ނޫނީ ބޭރަށް ދޭ!" އޭނަ ބުނެލިއެވެ.
"ދޫކުރޭ ރަޒާން. ނޭނގޭތަ ކީއްވެގެންކަމެއް އަހަރެން މިހެން މިއުޅެނީ. އަހަރެން ރަޒާންއާ ގުޅުން ބާއްވަން ބޭނުން ނުވާތީ…" ސަޖާ ބާރަށް ބުނެލިއެވެ.
"ކީއްވެގެން؟ އަހަރެން އަތުން އެ ހުރިހާ ހަރަދެއް ކުރުވާފައި ސަޖާ ބޭނުންވީމަ ބޭނުންހާ ގޮތަކަށް ހުރިހާކަމެއް ކުރެވޭތަ؟ އަހަރެން ކީއް ނުކޮށްދީގެން ތިއުޅެނީ އޭތް." ރަޒާން ވެފައި ހުރި ދެރަ އޭނާއަށް ފާޅުކުރެވެމުން ދިޔައީ ރުޅިވެރިކަމުގެ ސިފައިގައެވެ.
"އަޖައިބެއްނު. ބޭރަށް ގޮސް ޒުވާބު ކުރޭ. ނޫނީ ކޮޓަރިއަށް ވަންނާށޭ. ބޮލަށް އުނދަގޫވެޔޭ…" ދެމީހުންގެ ވާހަކަ ހުއްޓުނީ އަންހެން ކުއްޖާގެ އަޑަށެވެ.
"ހިނގާ ދާން." ސަޖާ އުޅުނީ ބޭރަށް ނުކުންނަން ނަމަވެސް، އެކަމަށް ރަޒާން ތަނެއް ނުދިނެވެ.
"ކޮބާ ސަޖާގެ ކޮޓަރި؟" ރަޒާން ސަޖާގެ އަތް ފޮޅޫވާލާފައި އެތެރެއަށް ވަދެލުމާއެކު، ދުވި ސިނގިރެޓްގެ ވަހާއެކު އޭނާވެސް ކޮށި ނޭރީ ކިރިޔާއެވެ. ސަޖާއަށް ބަލާލާފައި އެއްވެސް ވިސްނުމެއް ނެތް ފަދަ ގޮތަކަށް އެ އަންހެން ކުއްޖާ އެޕާރޓްމެންޓުގައި ހުރި ދެ ކޮޓަރީގެ ތެރެއިން ސަޖާގެ ކޮޓަރި ދައްކާލައިފިއެވެ.
"އާޝާ…" ސަޖާ، ބާރަށް ގޮވާލިއެވެ.
"ކަލޭ އޭނައާ އެކީ އުޅެން ބޭނުން ނުވަންޏާ ބުނީމަ ވީނުން. ސަބަބާ އެކީ. ބުނެބަލަ ކަލޭ ކުރީގެ ބިޓު ބޭނުންވެގެންނޭ…" އާޝާ އޭނާ ހިތަށް އައި ގޮތަކަށް ވާހަކަ ދައްކަމުން ދިޔައެވެ. ޒުވާބު ކުރާ އަޑަކީ އޭނާއަށް ވަރަށް އުދަގޫވާ އަޑެކެވެ. ކުޑަ އިރުއްސުރެ ބޮޑުވަމުން އައީ އެފަދަ މާހައުލެއްގައިކަމުން އޭނާއަށް އެކަންތައްތައް ތަކުން އުނދަގޫވަނީއެވެ. ރަޒާން ގޮސް ކޮޓަރިއަށް ވަނުމުން އާޝާއާ ދިމާލަށް ލޯ އަޅާލާފައި ސަޖާ ވެސް ހިނގައިގަތެވެ.
"ވަޓް… ކަލޭއަށް ރަނގަޅަކަށް ދޯ މަ މި ބުނީ…" އާޝާ ބުނެލިއެވެ. އެއަށްފަހު އޭނާ ބަލަން އިން ފިލްމަށް ނަޒަރު ހުއްޓާލިއެވެ.
"ކިހިނެއް ވެގެން ތިއުޅެނީ އޭތް…" ސަޖާ ގޮސް ހިފީ ރަޒާންގެ ގިރުވާނުގައެވެ. އޭނާ ހަޅޭއްލަވައިގަތުމާއެކު ރަޒާންވެސް ދޫދޭކަށް ބޭނުމެއް ނުވިއެވެ.
"ދޫކުރޭ.. ކީކޭ އޭނަ އެކިޔަނީ؟ އެ ރާދިންގެ ވާހަކަތަ އެ ދައްކަނީ؟" ރަޒާން ސުވާލުކޮށްލިއެވެ.
"އަހަރެން ރަޒާންއާ އެކީ އުޅެން ބޭނުން ނުވީމަ އޭގެ މާނައަކީ ބޭނުމެއް ނުވެޔޭ. ނުގުޅީމަ އޭގެ މާނައަކީ ގުޅާކަށް ބޭނުމެއް ނޫނޭ. ފޯނު ނުނެގީމަ އޭގެ މާނައަކީ ވާހަކަ ދައްކާކަށް ބޭނުމެއް ނޫނޭ. ނިއްވާލީމަ އޭގެ މާނައަކީ އިތުރަށް އެއްވެސް ގުޅުމެއް ބާއްވާކަށް ބޭނުމެއް ނޫނޭ. އިނގިއްޖެ." ސަޖާ ވެސް ހަޅޭއްލަވައިގަތެވެ. އެ ދެމީހުން އަޑު ގަދަކަމުން އެންމެ ފަހުން ކޮޓަރިއަށް ދާށޭ ބުނެވުނު މޮޔަ ހިތަށް އަރާފައި އިން އާޝާ ޓީވީ ނިއްވާލާފައި ސޯފާ މައްޗަށް ރިމޯޓް ޖަހާފައި ގޮސް ބޭރަށް ނުކުމެ ބަންލާފައި ދޮރު ޖެހި އެވެ.
އެ ތެދެއް ދޯ އެހެންވީމަ؟" ރަޒާން ހުރީ ދޫދޭ ގޮތަކަށް ނޫނެވެ. އޭނާ އައިސް ސަޖާގެ އަތުގައި ހިފާ އޭނާއާ ދިމާލަށް ދަމާލަމުން ނުރުުހުމާއެކު، ސުވާލުކޮށްލިއެވެ.
"އާ. އެ ތެދެއް. ދެން ދިޔައިމަ ވީނުން." ސަޖާ ރަޒާން ކޮށްޕާލިއެވެ. ކުއްލިއަކަށް ސަޖާގެ އެ އަމަލާއެކު ނުވިސްނާ ހުރި ރަޒާން އަރި އަޅާލިއެވެ. އޭނާއަށް ހުރެވުނީ ޑްރެސިންޓޭބަލް ކައިރީގައި ކަމުން އޭގައި ހިފާލެވުނު ކަމަކީ ނަސީބެކެވެ. އެކަމަކު އޭރު އެތަނުގައި އޮތް ފައިލެއްގައި ހުރި ގަނޑުތަކެއް ވެރިއްޖެއެވެ. އެއްލި ކަޅިއަކުން އޭގައި އޮތް ލިޔުން އަޅައިގަތުމާއެކު އޭނާ އަށް ސަޖާއަށް ބަލާލެވުނެވެ. ސަޖާ އަވަސް އަވަހަށް އެ ގަނޑުތައް ނަގަން ފެށިނަމަވެސް، ރަޒާޏް ހުށިއާރުކަމާއެކު ސަޖާގެ އަތުން އެ އަތުލިއެވެ.
"ސަޖާ… ޔޫ އާ ޕްރެގް…" ރަޒާންއަށް ހައިރާންކަމާއެކު ބުނެވުނެވެ.
"ރަޒާންއާށް ކޮން ކަމެއް؟" ސަޖާ އެ ގަނޑު ރަޒާން އަތުން އަތުލިއެވެ.
"ކާކުގެ ދަރިއެއް؟ އަހަރެންގެ ދޯ…" ސަޖާއާއެކު އެފަދަ ގުޅުމެއް ހިނގާފައިވާތީ ރަޒާންއަށް ބުނެވުނެވެ. އޭނާ ދެން ހުރި ރިޕޯޓްތައްވެސް ބަލަން ފެށިއެވެ. ސަޖާ އެ އެއްޗެހި އަތުލަން މަސައްކަތް ކުރިއެވެ. އައިސްފައި ހުރި ރުޅިއާއެކު ރަޒާން ސަޖާ ކޮށްޕާލިއެވެ. އެނދުމައްޗަށް ޖެހުނު ސަޖާއަށް ނުތެދުވިފައި އިރުކޮޅަކު އޮވެވުނީ ތަދުވީވަރުންނެވެ. އެވަގުތު ރަޒާން އެ ހުރިހާ ރިޕޯޓްތައް ބަލައިފިއެވެ. އެންމެ ފަހު ލިޔުންތައް ބަލާލުމާއެކު އޭނާއަށް އަނެއްކާވެސް ހައިރާންކަން ލިބުނެވެ.
"މީ…" އޭނާއަށް ސަޖާއަށް ބަލާލެވުނެވެ.
*****
ރޭގަނޑު ނުނިދުނު މައާލް ފަތިސް ނަމާދަށް ގޮވިއިރުވެސް އޮތީ ހޭލައެވެ. އޭނާއަށް ނިދުނީ ނަމާދުކޮށްލައިގެން އޮށޯވެލިތަނާއެވެ. ފަތިހުނުގެ ފިނިކަމާއެކު އޭނާއަށް އަރާމުވެ ނިދި ސަވާރުވާގޮތްވީއެވެ. އެލާރމްކޮށްލަންވެސް ހަނދާންނެތުނު މައާލްއަށް ދެން ހޭލެވުނީ ދިހައެއް ޖަހާ ބޮޑުވީފަހުންނެވެ. ފޯނުން ގަޑި ބަލާލުމާއެކު ފުންމައިގެން އޭނާއަށް ތެދުވެވުނެވެ. އަވަސް އަވަހަށް ފެންވަރާލައިގެން ނުކުތްއިރު، ގޭތެރެއިން އެއްވެސް މީހަކު ފެންނާކަށް ނެތެވެ.
"ކޮބާ ބައްޕަ؟" މައާލް ސުވާލުކޮށްލީ އެމާ އާއެވެ. އެމާ ބުނީ ބޭރުގައި ހުރި ކޮފީ މޭޒު ދޮށުގައި އެބަ އިން ކަމުގައެވެ. މައާލް އެ ދިމާލަށް ދިޔައިރު އޭނާއަށް ދެމީހަކު ދައްކާ ވާހަކަ އަޑު އިވުނެވެ. މުނީރުގެ އިތުރުން ދެން އެތަނުގައި އިނީ ރާދިންކަން ވެސް އޭނާއަށް ޔަޤީންވިއެވެ.
"އެ ހަޤީގަތް މައާލްއަށް އެނގުމަކީ މުހިންމުކަމެއް." އިވުނީ މުނީރުގެ އަޑާއެކު މައާލް މަޑުކޮށްލިއެވެ. ބައްޕަ އެ ދައްކަނީ ކޮން ހަޤީގަތެއްގެ ވާހަކަ ހެއްޔެވެ؟
"އަޅުގަނޑަށް އެނގޭ މައާލްގެ އެ ހަޤީގަތަކާ ކުރިމަތި ގާބިލްކަން ނުހުންނާނެކަން. އެކަމަކު ޝާކިރު އަންކަލްމެންނަކީ މައާލްގެ އަސްލު މައިންބަފައިން ނޫންކަން ބުނަން ޖެހޭނެއެއްނު ކޮންމެވެސް ދުވަހަކުން. ވަސިއްޔަތުގައި ވާގޮތަށް އެކަން ކުރަން ކިތަންމެ ބޭނުންވިޔަސް ޙާލަތުގެ ސަބަބުން އެކަމަށް ފުރުސަތު ނެތީތީ އަޅުގަނޑުވެސް ޖެހިލުންވަނީ…"
(ނުނިމޭ)