09 Jan 2024, 20:52
ސަރުކާރުން މަސްވެރިންނަށް ދޭންޖެހޭ ފައިސާގެ ތެރެއިން 100 މިލިއަން ރުފިޔާ މާދަމާ މަސްވެރިންނަށް ދޭނެ ކަމަށް ފިޝަރީސް މިނިސްޓްރީން މިރޭ ބުނެފިއެވެ.
ފިޝަރީސް މިނިސްޓްރީގެ އިތުރުން މިފްކޯއިން ވެސް ވަނީ މަސް އޮޑިފަހަރަށް މާދަމާ ފައިސާ ދިނުމަށް ހަމަޖެހިފައިވާ ކަމަށް ބުނެފައެވެ.
މިދިޔަ މަހުގެ 10ގައި މަސްވެރިންގެ ދުވަސް ފާހަގަކުރުމަށް ބޭއްވި ޖަލްސާގައި ރައީސް ޑރ. މުޙައްމަދު މުއިއްޒު ވަނީ މަސްވެރިންނަށް ސަރުކާރުން ނުދީ އެތައް ދުވަހެއް ވެފައިހުރި ފައިސާ، މި ސަރުކާރު ވެރިކަމާ ހަވާލުވި ފަހުން ދޭން ފަށާފައިވާ ކަމަށް ވިދާޅުވެފައެވެ.
އެ މަނިކުފާނު ވިދާޅުވީ އެހާތަނަށް މަސްވެރިންނަށް ނުދެވި ހުރީ 140 މިލިއަނެއްހައި ރުފިޔާ ކަމަށާއި އެ ފައިސާ ވީ އެންމެ އަވަހަކަށް މަސްވެެރިންނަށް ދޫކުރުމުގެ މަސައްކަތް ސަރުކާރުގެ ކަމާބެހޭ އިދާރާތަކުން ކުރާ ކަމަށެވެ.
ރައީސް އެފަދައިން ވިދާޅުވުމުގެ ކުރިންނާއި ފަހުން ވެސް މަސްވެރިންނަށް ފައިސާ ދީފައިވެއެވެ.
މަސްވެރިން ވިއްކާފައި ހުރި މަހަށް ފައިސާ ނުލިބޭތާ މަސްތަކެއް ވެއްޖެ ކަމަށް ބުނެ، ސޯޝަލް މީޑިއާގައި ބައެއް މަސްވެރިން ކަންބޮޑުވުން ފާޅުކޮށްފައިވެއެވެ. އޭގެ ސަބަބުން ބައެއް އޮޑިފަހަރަށް ނުފުރި، މަސްވެރިކަން ނުކުރެވޭ ހިސާބަށް ގޮސްފައިވާ ކަމަށް އެ މަސްވެރިން ބުނެފައިވެއެވެ.