10 Jan 2024, 06:39
އެއްކާފު ޕްރޮޑަކްޝަން ސްޓޫޑިއޯގެ ވަރުގަދަ އިންވެސްޓިގޭޝަން ތުރިލާ ޝޯ "ގަރީނާ"ގެ ވަރުގަދަ އެޕިސޯޑު ތަކަކަށް ފަހު ޝޯގެ ފުރަތަމަ ސީޒަން ނިމުމާ ގާތް ކޮށްލައިފިއެވެ.
މީޑިއާނެޓް އޮރިޖިނަލް ޝޯ މިދިޔަ މަހުގެ ތެރޭގައި ޕްރިމިއާ ކޮށްފައިވާއިރު މި ޝޯގެ ދެވަނަ ބައި ނޮވެމްބަރު މަހުގެ ފަހުކޮޅުން ފެށިގެން ދައްކަން ފަށާފައިވެއެވެ. ޖުމްލަ 14 އެޕިސޯޑު ހިމެނޭ ސީޒަން ދެބަޔަކަށް ބަހާލައިގެން ކުރިއަށް ގެންދިޔައިރު މިހާރު މުޅި ސީޒަންގެ ފިނާލޭ ދެއްކުމަށް ތައްޔާރު ވެއްޖެއެވެ.
މި ޝޯގެ ފިނާލޭ ރިލީޒް ކުރާނީ މާދަމާ ރެއެވެ. ސީޒަން ފިނާލޭ އާއެކު ސީޒަންގައި ޖަވާބު ނުލިބި ހުރި ހުރިހާ ސުވާލުތަކެއްގެ ޖަވާބު ލިބެން ފަށާނެއެވެ. އަދި ފޮރުވިފައިވާ ހުރިހާ ސިއްރުތަކެއް ވެސް މާދަމާ ރޭގެ އެޕިސޯޑުން ފަޅާ އަރާނެއެވެ.
އިންްވެސްޓިގޭޝަން ތްރިލާއެއްގެ ގޮތުގައި ތައްޔާރުކޮށްފައިވާ މި ވާހަކައިގައި ދައްކުވައިދޭނީ އިންވެސްޓިގޭޓިވް ނޫސްވެރިއެއް ކަމަށްވާ ޝިމްލާ ރާއްޖޭގެ ރަށަކަށް ގޮސް މަރުގެ ކޭހެއް ތަހުގީގުކުރަން އުޅޭތަނެވެ. ނޫސްވެރިކަމުގެ ދާއިރާއިން އެކި ކަހަލަ އެވޯޑުތައް ލިބިފައިވާ ޝިމްލާ އަތޮޅުގެ ރަށަކަށް ދަނީ ކުޑަ ކުއްޖެއްގެ މަރާ ގުޅިގެން އެކަމުގެ ހަގީގަތް ހޯދުމަށެވެ.
ޝިމްލާގެ ދަތުރުގައި ޕޮލިސް އިންވެސްޓިގޭޝަން އޮފިސަރެއް ކަމަށްވާ ރިލްވާން އެހީތެރިވެދެއެވެ. ނަމަވެސް ކޭހުގެ މައުލޫމާތު އެއްކުރަމުންދާ މިންވަރަކަށް މިއީ ޝިމްލާގެ ކެރިއަރުގައި ވެސް އެންމެ އުނދަގޫ މަސައްކަތަކަށް ވާން ފަށައެވެ. އަދި، ކޮންމެ ހަގީގަތަކާ އެކު އިތުރު ސިއްރުުތަކެއް ތެރެއަށް ޝިމްލާ ދަތުރުކުރާ މަންޒަރު މި ޝޯއިން ފެންނާނެއެވެ.
ޝިމްލާގެ ރޯލުން މި ޝޯގައި ފެނިގެންދާނީ މަރިޔަމް މަޖުދާއެވެ. ޝޯގެ އިތުރު ރޯލުތަކުން ފެނިގެންދާނީ މުހައްމަދު ފައިސަލާއި އަލީ ފާރޫގާއި އަލީ މުޝަރައްފުގެ އިތުރުން އައިޝާ އަލީއާއި މަރިޔަމް ހަމީދާއި އަންޝާމް މުހައްމަދާއި މަރިޔަމް ވަހީދު އަދި އަލީ ޝަޒްލީމެވެ.
މުހައްމަދު ފައިސަލް ޑައިރެކްޓުކުރާ މި ޝޯ ލިޔެފައިވަނީ އަހުމަދު ޒަރީރެވެ. ހަސަން ޝާޒިލް އާއި އަހްމަދު ޒަރީރު ޕްރޮޑިއުސް ކުރާ މި ޝޯގެ ސިނެމެޓޮގްރަފީގެ މަސައްކަތް ކޮށްފައިވަނީ އިބްރާހީމް ޝުޖާއު (ޖަންކީ)އެވެ.