09 Jan 2024, 15:56
ޖަރުމަނުވިލާތުގައި އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ކުރީގެ ތަޖުރިބާކާރު ކުޅުންތެރިޔާ ފްރާންޒް ބެކެންބައުއާ މަރުވެއްޖެއެވެ.
ބެކެންބައުއާ މަރުވިއިރު އޭނާގެ އުމުރަކީ 78 އަހަރެވެ. ބެކެންބައުއާ މަރުވިކަން އޭނާގެ އާއިލާއިން ހާމަކޮށްފައިވަނީ ޖަރުމަނުވިލާތުގެ ނިއުސް އެޖެންސީއެއް ކަމަށްވާ ޑީޕީއޭ މެދުވެރިކޮށް އާންމު ކުރި ބަޔާނެއްގައެވެ.
ބެކެންބައުއާއަކީ ޖަރުމަނުވިލާތުގެ އިތުރުން ދުނިޔޭގެ ފެންވަރުގައިވެސް އެންމެ މަތީ ފެންވަރުގައި ގުނާލެވުނު އެއް ކުޅުންތެރިޔާއެވެ. އޭނާގެ ކެޕްޓަން ކަމުގެ ދަށުން 1974 ވަނަ އަހަރު ހުޅަނގު ޖަރުމަނުން ފީފާ ވޯލްޑް ކަޕް ކާމިޔާބު ކޮށްފައިވާއިރު 1990 ވަނަ އަހަރު އޭނާގެ ކޯޗް ކަމުގެ ދަށުންވެސް ހުޅަނގު ޖަރުމަނުން ވަނީ ތަށި އުފުލާލާފައެވެ.
އޭނާ ވަނީ ހުޅަނގު ޖަރުމަނަށް 103 މެޗު ކުޅެދީފައެވެ. ޑިފެންޑަރެއްގެ މަގާމަށް ކުޅުނު ބެކެންބައުއާ ކްލަބް ލެވެލްގައިވަނީ ޖަރުމަނު ބުންޑަސްލީގާގެ ބަޔާން މިޔުނިކަށް 582 މެޗު ކުޅެދީ އެ ކުލަބާއެކު ކުޅުންތެރިއެއްގެ އިތުރުން ކޯޗެއްގެ ގޮތުގައިވެސް ލީގު ކާމިޔާބު ކޮށްފައެވެ.
ޑާ ކައިސާގެ ނަމުން މަޝްހޫރުވެފައިވާ ބެކެންބައުއާ ވަނީ 1972 ވަނަ އަހަރު ޔޫރަޕިއަން ޗެމްޕިއަންޝިޕް ކާމިޔާބު ކުރުމުގެ އިތުރުން ބެލޮން ޑި އޯ އިނާމް ދެފަހަރެއްގެ މަތިން ހޯދާފައެވެ.
ޖަރުމަނުވިލާތުގައި އެންމެ ފާހަގަ ކޮށްލެވޭ ކްލަބް ކަމަށްވާ ބަޔާންއިން ހާމަކުރިގޮތުގައި ބަޔާންގެ ދުނިޔެ ދެން ކުރިއެކޭ އެއްގޮތް ނުވާނެ ކަމަށާއި މިއަދަކީ އެ ކުލަބަށް އަނދިރި، މަޑުމައިތިރި އަދި ފަގީރު ދުވަހެއް ކަމަށެވެ. އަދި ބަކެންބައުވާ އާ ނުލާ އެ ކުލަބު މިއަދު އޮތް ފެންވަރުގައި ނުފެނުނީސް ކަމުގައިވެސް ބަޔާންއިން ހާމަކުރިއެވެ.
ބެކެންބައުއާ ވެފައިވަނީ ކުޅުންތެރިއެއްގެ އިތުރުން ކޯޗެއްގެ ގޮތުގައި ވޯލްޑް ކަޕްގެ ތަށި އުފުލާލި ތިން މީހުންގެ ތެރެއިން އެކަކަށެވެ. އަނެއް ދެމީހުންނަކީ ދާދިފަހުން މަރުވި ބްރެޒިލްގެ މާރިއޯ ޒަގަލޯ އާއި ފަރަންސޭސި ޤައުމީ ޓީމުގެ މިހާރު ކޯޗު ޑިޑީއާ ޑޭޝޯންޕްއެެވެ.
ޖަރުމަނު ޤައުމީ ޓީމުގެ މިހާރު ކޯޗު ޖޫލިއަން ނާގެލްސްމަން ހާމަކުރިގޮތުގައި އޭނާއަށް ބެކެންބައުއާ އަކީ ޖަރުމަނު ދުށް އެންމެ މޮޅު ކުޅުންތެރިޔާއެވެ. ބެކެންބައުއާ މަރުވުމާއި ގުޅިގެން ގިނަ ފަރާތްތަކަކުން އަންނަނީ އޭނާއަށް އިހުތިރާމު އަދާ ކުރަމުންނެވެ.