09 Jan 2024, 14:14
އިނގިރޭސި އެފްއޭ ކަޕްގެ ހަތަރު ވަނަ ބުރުން މެންޗެސްޓާ ޔުނައިޓެޑް ޖާގަ ހޯދައިފިއެވެ.
ޔުނައިޓެޑުން މި މުބާރާތުގެ ހަތަރު ވަނަ ބުރުން ޖާގަހޯދީ ތިން ވަނަ ބުރުގައި ލީގް ވަންގެ ވިގަން އެތްލެޓިކް އާ ބައްދަލު ކުރި މެޗު ދެ ލަނޑު ސުން ލަނޑުން ކާމިޔަބު ކޮށްގެންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޔުނައިޓެޑުންނެވެ. ބާރަ ފަހަރަށް މި މުބާރާތް ކާމިޔާބު ކޮށްފައިވާ ޔުނައިޓެޑުން މި މެޗުގައި ކާމިޔާބު ކުރި ފުރަތަމަ ލަނޑު ޖަހާފައިވަނީ މެޗުގެ 22 ވަނަ މިނެޓްގައެވެ. މި ލަނޑު އެ ޓީމަށް ޖަހައިދިނީ ޑިއޮގޯ ޑާލޮޓްއެވެ.
މި މެޗުގެ ފުރަތަމަ ހާފްގައި ޔުނައިޓެޑަށް ވަނީ ލަނޑު ޖަހާނެ ގިނަ ފުރުސަތު ތަކެއް ލިބި ބޭކާރުވެގެން ގޮސްފައެވެ. މި މެޗުގައި ވިގަންއަށް މެޗުގެ ނަތީޖާ ހަމަހަމަ ކުރާނެ ރަނގަޅު ދެ ފުރުސަތެއް ލިބިގެން ގޮސްފައެވެ. ނަމަވެސް އެ ޓީމަށް މި ފުރުސަތު ތަކުގެ ބޭނުން ހިފޭގޮތެއް ނުވިއެވެ. މި މެޗުގައި ޔުނައިޓެޑުން ކާމިޔާބުކުރި ދެވަނަ ލަނޑު މެޗުގެ 74 ވަނަ މިނެޓްގައި ލިބުނު ޕެނަލްޓީ އަކުން ކާމިޔާބު ކޮށްދިނީ ކެޕްޓަން ބްރޫނޯ ފެނާންޑޭޒްއެވެ.
މެޗަށް ފަހު ވާހަކަ ދައްކަމުން ޔުނައިޓެޑްގެ ކޯޗް އެރިކް ޓެން ހާގް ހާމަކުރިގޮތުގައި މިފަދަ މެޗުތަކުގައި މުހިންމީ މޮޅުވުން ކަމަށާއި އަދި މި މެޗުގެ ފުރަތަމަ ހާފުގައި އޭނާގެ ކުޅުންތެރިންގެ ފަރާތުން ފެނިގެންދިޔަ ކުޅުމާމެދު ވަރަށް ހިތްހަމަ ޖެހޭ ކަމަށެވެ.
މި މެޗުގައި ޔުނައިޓެޑަށް މިއަށް ވުރެ ގިނަ ލަނޑު ޖެހެން ވާނެކަން ފާހަގަ ކުރަމުން ޓެން ހާގް ހާމަކުރިގޮތުގައި އޭނާގެ ކުޅުންތެރިން ގިނަ ހަމަލާތަކެއް އުފެއްދުން އެއީ ރަނގަޅު ކަމެއް ކަމަށް ފާހަގަ ކުރާ ކަމަށެވެ. އަދި އެފް އޭ ކަޕަކީ އޭނާ ވަރަށް ސީރިއަސް ކޮށް ނަގާ މުބާރާތެއް ކަމަށާއި އެހެން ކަމުން މި މުބާރާތުގައި ރަނގަޅު ކުޅުމެއް ދެއްކުމަށް އޭނާގެ ކުޅުންތެރިންގެ ކިބައިން އަބަދުވެސް އެދޭ ކަމަށެވެ.
ވިގަންގެ ކޯޗް ޝޯން މެލޮނީ ހާމަކުރިގޮތުގައި އޭނާގެ އެއްވެސް ޝަކުވާއެއް ނެތް ކަމަށާއި އޭނާގެ ކުޅުންތެރިންގެ ފަރާތުން ފެނުނު ކުޅުމާމެދު ހިތްހަމަ ޖެހޭ ކަމަށާއި މި މެޗުގައި އޭނާގެ ކުޅުންތެރިންނަށް ވުރެ ހުރިހާ ގޮތަކުންވެސް ޔުނައިޓެޑް ވަރުގަދަ ކަމަށެވެ.
މި ކާމިޔާބީ އާއެކު ޔުނައިޓެޑް މި މުބާރާތުހެ ހަތަރު ވަނަ ބުރުން ޖާގަހޯދާފައިވާއިރު ހަތަރު ވަނަ ބުރުގައި ވާދަކުރަން ޖެހޭނީ ލީގް ޓޫގެ ނިއުޕޯޓް އާއި ނޮން ލީގް ޓީމެއް ކަމަށްވާ އީސްޓްލެއި ބައްދަލުކުރާ ދެވަނަ މެޗުން މޮޅުވާ ޓީމަކާއެވެ. މި ދެ ޓީމުގެ މެދުގައި ކުޅުނު ފުރަތަމަ މެޗުވަނީ އެއްލަނޑު އެއްލަނޑުން އެއްވަރު ވެފައެވެ.