09 Jan 2024, 12:49
ޗައިނާއާއި ރާއްޖެއާ ދެމެދު ހަދައިފައިވާ މިނިވަން ވިޔަފާރި ނުވަތަ ފްރީ ޓްރޭޑު އެއްބަސްވުމުގެ ސަބަބުން މަސްވެރިކަމުގެ ދާއިރާއިން އިތުރު ފުރުސަތުތައް ފަހިވާނެކަމަށް ފޮރިން މިނިސްޓަރު މޫސާ ޒަމީރު މިއަދު ވިދާޅުވެއްޖެއެވެ.
މިއަދު އެކްސްގައި ކުރެއްވި ޕޯސްޓެއްގައި ޒަމީރު ވިދާޅުވީ، މި އެއްބަސްވުމުގެ ސަބަބުން ވިޔަފާރިއާއި އިންވެސްޓްމަންޓާއި ޚާއްސަކޮށް މަސްވެރިކަމުގެ ދާއިރާއަށް އިތުރު ފުރުސަތުތައް ލިބޭނެ ކަމަށެވެ.
ޒަމީރު ވިދާޅުވީ، ޗައިނާގެ ބެލްޓް އެންޑް ރޯޑް އިނިޝިއޭޓިވްގެ ސަބަބުން ރާއްޖޭގެ އިގްތިޞާދަށް ބޮޑެތި ފައިދާތަކެއް ކޮށްފައިވާ ކަމަށެވެ.
"ބެލްޓް އެންޑް ރޯޑް އިނިޝިއޭޓިވްގެ ސަބަބުން އަޅުގަނޑުމެންގެ އިންފްރާސްޓްރަކްޗާ އާއި އިގްތިޞާދަށް ބޮޑެތި ފައިދާތަކެއް ލިބިއްޖެ،" ޒަމީރު ވިދާޅުވިއެވެ.
ހަމައެއާއެކު ޗައިނާއާއި ރާއްޖެއާއި ދެމެދު އޮތް ގުޅުން އިތުރަށް ބަދަހިކޮށް، ދެ ގައުމުގެ ފައިދާއަށް އާ ފުރުސަތުތައް ހޯދުމަށް މަސައްކަތް ކުރެއްވުމަށް އުންމީދުކުރައްވާ ކަމަށް ޒަމީރު ވިދާޅުވިއެވެ.
އަދި ސަރުކާރާއި ވިޔަފާރިއާއި އެހެނިހެން ދާއިރާތަކުން ޗާއިނާއިން ރާއްޖޭގެ ތަރައްގީއަށް ދެމުންދާ އެއްބާރުލުމަށް ޒަމީރު ވަނީ ޝުކުރު އަދައިކުރައްވައިފައެވެ.
"ސަރުކާރާއި، ވިޔަފާރިއާއި، ސަގާފަތުގެ ދާއިރާއިން ރާއްޖެއާއި ޗައިނާއާ ދެމެދު ކުރިއަށްދާ ވަރުގަދަ އަދި ނަތީޖާ ނެރެދޭ އެއްބާރުލުމަށް އަޅުގަނޑުމެން ޝުކުރުވެރިވަން،" ޒަމީރު ވިދާޅުވިއެވެ.
އިންވެސްޓް މޯލްޑިވްސް ބިޒްނަސް ފޯރަމްގައި މިނިސްޓަރުން ބައިވެރިވެވަޑައިގަންނަވަނީ --- ފޮޓޯ/ ރައީސް އޮފީސް
ޗައިނާގައި މިއަދު ހެނދުނު އޮތް އިންވެސްޓް މޯލްޑިވްސް ބިޒްނަސް ފޯރަމްގައި ރާއްޖޭގެ ތަރައްގީއަށް ރައީސް ޑރ. މުޙައްމަދު މުއިއްޒުގެ ތަޞައްވުރު ހިއްސާކުރައްވާފައިވާ ކަމަށް ޒަމީރު ވަނީ ވިދާޅުވެފައެވެ.
ހަމައެއާއެކު، މި ފޯރަމާއި ގުޅޭ ގޮތުން އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު މިއަދު ވިދާޅުވީ، މި ފޯރަމަކީ މިހާތަނަށް އެންމެ ގިނަ ވިޔަފާރިވެރިން ބައިވެރިވާ، އެންމެ ކާމިޔާބު ވިޔަފާރި ފޯރަމަށްވާނެ ކަމަށެވެ.
އަދި ފޮރިން އިންވެސްޓްމެންޓުގެ އަލީގައި ފަތުރުވެރިކަން ކުރިއަރުވައި އިގުތިސާދު ސިންދަފާތު ކުރުމަކީ ސަރުކާރުގެ އަމާޒެއް ކަމަށް ސައީދު ވަނީ ވިދާޅުވެފައެވެ.
އިންޑިއާއާ އެކު ގުޅުން ގޯސްވެފައިވާ ދަނޑިވަޅެއްގައި ރައީސް މުއިއްޒު ގެންދަވަނީ އެ މަނިކުފާނުގެ ފުރަތަމަ ފުރަމާނަ ދަތުރުފުޅު ޗައިނާއަށް ކުރައްވަމުންނެވެ.
އެ ފޯރަމްގައި ރައީސް ޑރ. މުހައްމަދު މުއިއްޒު ވެސް ވަނީ ވިޔަފާރިތަކާ މުޚާތަބުކުރައްވައި ވާހަކަފުޅުދައްކަވައިފައެވެ. އެގޮތުން، ރާއްޖޭގައި ހުރި އިންވެސްޓްމެންޓު ފުރުސަތުތަކަށް ވެސް އެ މަނިކުފާނު އަލިއަޅުއްވައިލެއްވިއެވެ.
މިހާރު ރައީސް ޗައިނާއަށް ކުރައްވާ ރަސްމީ ދަތުރުފުޅުގެ ތެރެއިން، އިގްތިޞާދީ ގޮތުންނާއި އެހެން ދާއިރާތަކުން ވެސް ގިނަ މަޝްވަރާތަކެއްް ކުރައްވާނެއެވެ. އަދި ގިނަ އެއްބަސްވުންތަކެއްގައި ވެސް ސޮއިކުރައްވާނެއެވެ.