09 Jan 2024, 09:47
އަލުން، ޗައިނާއަކީ ރާއްޖެއަށް އެންމެ ގިނައިން ޓޫރިސްޓުން އަންނަ އެއްވަނަ ގައުމަށް ހަދައިދިނުމަކީ އެ މަނިކުފާނު އެދިވަޑައިގަންނަވާ ކަމެއް ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އެ މަނިކުފާނު މިފަދައިން އެދިވަޑައިގަތީ މިހާރު ޗައިނާއަށް ކުރައްވާ ރަސްމީ ދަތުރުފުޅުގެ ތެރެއިން އެ ގައުމުގައި އޮތް އިންވެސްޓް މޯލްޑިވްސް ފޯރަމްގައި ވާހަކަފުޅުދައްކަވަމުންނެވެ.
އެ މަނިކުފާނު ވިދާޅުވީ ޗައިނާއަކީ ރާއްޖެއަށް މީގެ ކުރިން އެންމެ ގިނައިން ފަތުރުވެރިން ޒިޔާރަތްކުރި ގައުމު ކަމަށެވެ. ނަމަވެސް ކޮވިޑް19 ބަލިމަޑުކަމާއެކު އަދަދުތައް ދަށްވި ނަމަވެސް އަލުން އެ މަގާމު ޗައިނާއިން ހޯދުމަށް އެދިވަޑައިގަތެވެ.
"ޗައިނާއަކީ ކޮވިޑުގެ ކުރިން ރާއްޖޭގެ އެއްވަނަ މާކެޓު. އެހެންވެ، އަޅުގަނޑުގެ އެންމެ ބޮޑު އެދުމަކީ އަލުން ޗައިނާއަކީ ރާއްޖޭގެ އެއްވަނަ މާކެޓަށް ހެދުން،" ރައީސް ވިދާޅުވިއެވެ.
އެ މަނިކުފާނު ވިދާޅުވީ ސަރުކާރުން، ރާއްޖޭގެ ތަރައްގީގެ އެޖެންޑާގައި އެންމެ ޚާއްސަ އިސްކަމެއް ދެނީ މިހާރު ރާއްޖޭގައި ހުރި ސިނާއަތްތައް ކުރިއެރުވުމަށް އިންވެސްޓުކުރުމަށް ކަމަށެވެ. އޭގެ ތެރޭގައި ޓޫރިޒަމަށް ޚާއްސަ އިސްކަމެއް ދެއްވާ ކަމަށް ވިދާޅުވިއެވެ.
އެގޮތުން ސްޕޯޓްސް ޓޫރިޒަމާއި، މެޑިކަލް ޓޫރިޒަމާއި، ސަގާފީ ޓޫރިޒަމް ފުޅާކޮށް ކުރިއަށް ގެންދިއުން ހިމެނޭކަމަށް ވިދާޅުވިއެވެ.
ހަމައެއާއެކު އެހެން ދާއިރާތަކަށް އިންވެސްޓުކޮށް އެ ކަންކަން ރާއްޖެއަށް ތައާރަފްކުރުމަށް ވެސް ޚާއްސަ އިސްކަމެއް ދެއްވާ ކަމަށް އެ މަނިކުފާނު ފާހަގަކުރެއްވިއެވެ.
އެ މަނިކުފާނު ވިދާޅުވީ، އެ މަނިކުފާނުގެ އަމާޒަކީ ރާއްޖޭގެ އިގްތިޞާދު ކުރިއަށް އޮތް 10 އަހަރާއި 15 އަހަރާ ދެމެދު މުޅިން ބަދަލުކޮށްލުންކަމަށެވެ.
ރާއްޖެއަށް މިހާރު އެންމެ ގިނަ ފަތުރުވެރިން އަންނަނީ އަވަށްޓެރި އިންޑިއާއިންނެވެ. ނަމަވެސް މިދުވަސްކޮޅު އިންޑިއާގެ ފަތުރުވެރިން ރާއްޖެ ނައުމަށް ގޮވާލާ ދަނީ ކެމްޕެއިންނެއް ކުރަމުންނެވެ.
އިންޑިއާއަށް ފަހު ދެން އެެންމެ ގިނައިން ފަތުރުވެރިން އަންނަ ގައުމުތަކުގެ ތެރޭގައި ރަޝިއާއާއި، ޖަރުމަނާއި، އިނގިރޭސިވިލާތް ހިމެނެއެވެ.