09 Jan 2024, 09:02
ޗައިނާގެ ދައުލަތުގެ ޝިޕިން ކުންފުނި އަދި އެ ގައުމުގެ އެންމެ ބޮޑު ޝިޕިން ކުންފުނި ކޮސްކޯއިން އިސްރާއީލަށް މުދާ އެތެރެކުރުން ހުއްޓައިލައިފިއެވެ.
އިސްރާއީލަށް މުދާ އެތެރެކުރުން ކޮސްކޯއިން ހުއްޓައިލީ ރަތް ކަނޑުން އިސްރާއީލުގެ ރަށްތަކަށް ދަތުރުކުރާ ބޯޓުތަކަށް އީރާނުގެ ތާއީދު އޮންނަ ޙޫޘީންގެ ހަމަލާތައް އަމާޒުވާތީއެވެ.
އިސްރާއީލުގެ މާލީ ކަންކަމާ ބެހޭ ނޫހެއް ކަމަށްވާ، ގްލޯބަސްއިން ބުނާ ގޮތުން ރަތްކަނޑުގައި ދަތުރުކުރަން ކޮސްކޯއިން ޖެހިލުންވަނީ ޗައިނާގެ ކުންފުންޏަކަށްވެގެން ނުވަތަ ޗައިނާއާއި އީރާނާ އޮންނަ ގުޅުމުގެ ސަބަބަކުން ނޫނެވެ. ނަމަވެސް އެއީ ޙޫޘީންގެ ޙަމަލާތަކުން އެ ކުންފުނީގެ ބޯޓުތައް ރައްކާތެރި ކުރުމަށް ނިންމި ނިންމުމެއް ކަމަށް ކޮސްކޯއިން ބުނެއެވެ.
އިސްރާއީލުގެ އުތުރުގައި އޮންނަ މެޑިޓެރޭނިއަން ކަނޑުގެ އައްސޭރީގައި އޮންނަ ހައިފާ ބަނދަރަކީ ޗައިނާ ދައުލަތުގެ ކުންފުންޏަކުން ހިންގާ ބަނދަރެކެވެ. ބަނދަރު ވަރަށް ބޮޑަށް ބަރޯސާވެފައި އޮންނަނީ ކޮސްކޯ ބޯޓުތަކަށެވެ.
ކޮސްކޯ އަކީ ދުނިޔޭގެ ވިޔަފާރީގެ ގާތްގަނޑަކަށް 11 އިންސައްތަ ހިއްސާކުރާ ދުނިޔޭގެ ހަތަރުވަނައަށް އެންމެ ބޮޑު ކޮންޓެއިނަރު ޝިޕިން ކުންފުންޏެވެ.
ރަތް ކަނޑުގެ ހުރަސްކޮށް އިސްރާއީލުގެ ރަށްތަކަށް ދަތުރުކުރާ ކޮންމެ ބޯޓަކަށް ވެސް ހަމަލާދޭނެ ކަމަށް ޙޫޘީން ވަނީ ބުނެފައެވެ. ޙޫޘީން އެގޮތަށް ކަންތައް ކުރަނީ އޮކްޓޫބަރު މަހުގެ ހަތްވަނަ ދުވަހުން ފެށިގެން އިސްރާއީލުން ފަލަސްތީނުގެ ޣައްޒާއަށް ދެމުންގެންދާ އުދުވާނީ ހަމަލާތަކުގައި ފަލަސްތީނަށް ތާއީދުކުރުމުގެ ގޮތުންނެވެ.
ހޫޘީންގެ ހަމަލާތަކުގެ ސަބަބުން ޑެންމާކުގެ ޝިޕިން ކުންފުނި އަދި ދުނިޔޭގެ އެންމެ ބޮޑު ޝިޕިންގް ކުންފުނި، މާސްކާއި އެ ނޫން ވެސް ދުނިޔޭގެ ބޮޑެތި ޝިޕިން ކުންފުނިތަކުން ވަނީ ރަތް ކަނޑުން ދަތުރުކުރުން ހުއްޓައިލައިފައެވެ. ރަތް ކަނޑުގެ ބަދަލުގައި ބޯޓުތައް ދަތުރުކުރަމުން ދަނީ އެފްރިކާގެ ވަށައިގެން އޮންނަ ކޭޕް އޮފް ގުޑް ހޯޕް މަގުންނެވެ.