09 Jan 2024, 06:51
ބޮލީވުޑްގެ އުއްމީދީ ބަތަލާ ޖާންވީ ކަޕޫރުގެ ކެރިއަރުގެ ފުރަތަމަ ތެލުގޫ ފިލްމު "ދެވާރާ:ޕާޓް1"ގެ ޓީޒާ އާއްމުންނަށް ދައްކާލައިފިއެވެ.
ބަތަލާ ޖާންވީއާ އެކު މި ފިލްމުގެ ލީޑް ރޯލުން ފެންނާނީ ތެލުގޫގެ ކާމިޔާބު އެކްޓަރު ޖޫނިއަ އެންޓީއާރެވެ. މީގެ ތިން އަހަރު ކުރިން އިއުލާނު ކުރި މި ފިލްމު ގެންނަން ނިންމާފައި ވަނީ ދެ ބަޔަކަށް ބަހާލައިގެންނެވެ.
ވަރަށް ވަރުގަދަ ހަމަލާ ތަކެއްގެ މަންޒަރާ އެކު ނިންމާލި އެއް މިނެޓާ 20 ސިކުންތުގެ ޓީޒާގެ މަންޒަރުތައް ފުރިހަމަވެފައި ބެލުންތެރިން ބޭނުންވާ ކަހަލަ ރަހަތަކެއް ހުރުމުން ވަރަށް ގިނަ ބަޔަކު ވަނީ ފިލްމުގެ ޓީޒާއަށް ތައުރީފު ކޮށްފައެވެ. ކަނޑުމަތީގައި ހިންގާ ވައްކަމާއި ފޭރުމުގެ ހާދިސާތަކެއް ދައްކުވައިދޭ މި ފިލްމަކީ އެންޓީއާރްގެ އާއިލީ ފިލްމު ކުންފުނީގެ ދަށުން ގެނެސްދޭ ފިލްމެކެވެ.
އިންޑިއާއަށް އޮސްކާ އެވޯޑް ކާމިޔާބު ކޮށްދިން "އާރްއާރްއާރް"ގެ އެކްޓަރުގެ އިތުރުން ބަތަލާ ޖާންވީ މުހިއްމު ރޯލްއިން ފެންނާނެ މި ފިލްމުން ބޮލީވުޑްގެ އެކްޓަރު ސައިފް އަލީ ޚާން ވެސް ވަރަށް މުހިއްމު ރޯލަކުން ފެންނާނެއެވެ. ތަޖުރިބާ ހުރި ގިނަ ފިލްމީ ތަރިންނާ އެކު މަސައްކަތް ކުރެވުމަކީ ވަރަށް ގިނަ އާ ކަންތައް ތަކެއް ދަސްކުރުމަށް ހުޅުވުނު މަގެއްގެ ގޮތުގައި ޖާންވީ ވަނީ ސިފަކޮށްފައެވެ.
ފިލްމު "އާރްއާރްއާރް"ގެ މަންޒަރެއްގައި އެކްޓަރު އެންޓީއާރު ޖޫނިއާ-- ފޮޓޯ/ ބޮލީވުޑް ހަންގާމާ
މީގެ އިތުރުން، ސައުތު ސިނަމާގެ ވަރަށް ގިނަ ފިލްމު ތަކުގައި ޖާންވީގެ މަންމަ، ކުރީގެ ބަތަލާ ސްރީ ދޭވީ މަސައްކަތް ކޮށްފައިވާކަން ފާހަގަކޮށް ސައުތު ސިނަމާގެ ފިލްމު ތަކުގައި މަސައްކަތް ކުރުމުގެ ޝައުގުވެރިކަން ޖާންވީ ވަނީ ފާޅު ކޮށްފައެވެ.
މީގެ ތިން އަހަރު ކުރިން އިއުލާނު ކުރެވުނު ފިލްމު "ދެވާރާ: ޕާޓް1" ސިނަމާއަށް ގެންނަން ނިންމާފައި ވަނީ އިންޑިއާގައި އާއްމުކޮށް މީހުން ވާހަކަ ދައްކައި އުޅޭ ހިންދީ، ތެލުގޫ، ތަމަޅަ، މަޅަޔާލަމް އަދި ކަންނާޑާ ބަހުރުވައިންނެވެ. މި ފިލްމު ސިނަމާތަކަށް ގެންނަން ތާވަލު ކޮށްފައި ވަނީ މި އަހަރުގެ އޭޕްރިލް މަހުގެ ފަސްވަނަ ދުވަހުއެވެ.