އިލިއާނާގެ ބަދަލުގައި އަޖޭއާ އެކު ވާނީ ކަޕޫރު

09 Jan 2024, 06:46

މި ހަފުތާގެ ތެރޭ މަސައްކަތް ފެށިފައިވާ އަޖޭ ދޭވްގަންގެ ފިލްމު "ރެއިޑް2"ގެ ބަތަލާގެ ރޯލަށް އިލިއާނާ ޑިކްރޫޒްގެ ބަދަލުގައި ވާނީ ކަޕޫރު ހަމަޖައްސައިފިއެވެ.

މި އަހަރުގެ ނޮވެމްބަރު މަހުގެ 15ވަނަ ދުވަހު ސިނަމާތަކަށް ގެންނަން ނިންމާފައިވާ މި ފިލްމަކީ، ވާނީއާއި އަޖޭ އެކީގައި މަސައްކަތް ކުރާނެ ފުރަތަމަ ފިލްމު ވެސް މެއެވެ.

މިދިޔަ އަހަރު ރަންބީރު ކަޕޫރު ލީޑު ރޯލު ކުޅުނު ފިލްމު "ޝަމްޝޭރާ"އިން އެންމެ ފަހުން ފެނުނު ބަތަލާއަކީ ޔަޝް ރާޖު ކުންފުނީގެ ހިޔާ ދަށުން ފިލްމީ ދުނިޔެއަށް ތަޢާރަފުވި ބަތަލާ އެކެވެ. ޔަޝް ރާޖްގެ ގިނަ ފިލްމުތަކުން ފެނިފައިވާ ބަތަލާ "ރެއިޑް2"ގައި ކުޅެން ހަމަޖެހިފައި ވަނީ ފުރަތަމަ ފިލްމުގައި ބަތަލާ އިލިއާނާ ޑިކްރޫޒް ކުޅުނު އަޖޭގެ އަންހެނުންގެ ރޯލެވެ.

މިހާތަނަށް ފިލްމީ ކެރިއަރުގައި މާ ބޮޑު ކާމިޔާބީއެއް ލިބިފައިނުވާ ބަތަލާއަށް ވަރުގަދަ ސީކުއަލްއަކުން ފުރުސަތު ލިބުމަކީ ބަތަލާގެ ކެރިއަރަށް ލިބޭނެ އިތުރު ކުރިއެރުމެއް ކަމަށް ގިނަ ބަޔަކު ވަނީ ބުނެފައެވެ.

ޓީ-ސީރީސްއާއި ޕެނޮރާމާ ކުންފުނި ގުޅިގެން ގެނެސްދޭ މި ފިލްމުގެ ޑައިރެކްޓަރަކީ ކުރީގެ ފިލްމު ވެސް ޑައިރެކްޓް ކުރި ރާޖް ކުމާރު ގުޕްތާއެވެ. ފުރަތަމަ ފިލްމުގައި ބަތަލާގެ ރޯލު ކުޅުނު އިލިއާނާއަށް "ރެއިޑް2" ގެއްލުނީ އަލަތު ދަރިފުޅު ވިހެއުމާ ގުޅިގެން ދުވަސްކޮޅަކަށް ފިލްމީ މަސައްކަތާ ދުރުގައި ހުރުމުން ކަމަށް ރިޕޯޓު ތަކުން ވަނީ ބުނެފައެވެ.

އަޖޭ ދޭވްގަން އިންކަމް ޓެކްސް އޮފިސަރެއްގެ ރޯލުން ފެންނަ ފިލްމު "ރެއިޑް" އަކީ ވަރަށް ކުޑަ ބަޖެޓަކުން އުފެއްދި ނަމަވެސް ބޮކސް އޮފީހުގެ 100 ކްރޯރް ކްލަބުން ޖާގަ ހޯދި ފިލްމެކެވެ.