09 Jan 2024, 06:54
ދާދި ފަހުން ކުރިއަށް ގެންދިޔަ 81 ވަނަ ގޯލްޑެން ގްލޯބްސްގެ އެންމެ ބޮޑެތި އެވޯޑުތައް އެޗްބީއޯގެ ޑްރާމާ ޝޯ "ސަކްސެޝަން"އާ މިދިޔަ އަހަރުގެ ހިޓް ފިލްމު "އޮޕެންހައިމާ" ހޯދައިފިއެވެ.
ތަފާތު އެކި މައްސަލަތައް ފެންމަތިވަމުން ދިޔަ ދަނޑިވަޅެއްގައި މި އަހަރުގެ އިވެންޓު ކުރިއަށް ދިޔައީ އެއިން އެއްވެސް ކަމަކަށް އަލިއަޅުވައިލުމެއްނެތިއެވެ. މީގެ ކުރިން މިފަދަ ބޮޑެތި އިވެންޓުތަކުގައި ދުނިޔޭގެ ބޮޑެތި މައްސަލަތަކަށް ވާހަކަ ދައްކައި ހަދައި އުޅެއެވެ.
މި ފަހަރުގެ ގޯލްޑެން ގްލޯބްސްގައި އެންމެ ބޮޑު ކާމިޔާބީއެއް ހޯދާފައިވަނީ އެޗްބީއޯއިން ދާދިފަހުން ނިންމާލައިފައިވާ ޑްރާމާ ޝޯ ސަކްސެޝަންއެވެ. މުޅި ހަފުލާއަށް ވެސް ސަކްސެޝަން ގޮސްފައިވަނީ އެންމެ ގިނަ ނޯމިނޭޝަންއާ އެކުއެވެ. މި ޝޯ ވަނީ 27 ކެޓަގަރީއަކުން ނޯމިނޭޓް ވެފައެވެ.
ނަމަވެސް އިވެންޓު ނިމިގެން ދިޔައީ ހަތަރު އެވޯޑު ކާމިޔާބު ކޮށްގެންނެވެ. މި ހަތަރު އެވޯޑަކީ އެންމެ ވަރުގަދަ އެވޯޑުތަކެވެ. އޭގެ ތެރެއިން ޑްރާމާ ކެޓަގަރީގެ އެންމެ މޮޅު އެކްޓަރާއި އެކްޓްރެސްގެ އެވޯޑު ވަނީ މި ޝޯ ހޯދާފައެވެ. އަދި އެންމެ މޮޅު ޑްރާމާާ ޝޯގެ އެވޯޑު ވެސް ވަނީ މި ޝޯ ހޯދާފައެވެ.
ފިލްމުތަކުގެ ކެޓަގަރީން އެންމެ ބޮޑު ކާމިޔާބީއެއް ހޯދާފައިވަނީ އޮޕެންހައިމާއެވެ. މި ފިލްމަށް ވެސް ވަނީ ހަތަރު އެވޯޑެއް ލިބިފައެވެ. އޭގެ ތެރޭގައި އެންމެ މޮޅު ފިލްމުގެ އެވޯޑުން ފެށިގެން އެންމެ މޮޅު އެކްޓަރުގެ އެވޯޑު މި ފިލްމު ހޯދިއެވެ.
މިދިޔަ އަހަރު ބޮކްސް އޮފީހުގައި އެންމެ ބޮޑު ކާމިޔާބީއެއް ހޯދާފައިވާ ފިލްމު "ބާބީ"އަށް ވެސް ވަނީ އެވޯޑު ލިބިފައެވެ. އެގޮތުން ފިލްމުން އެކްޓްރެސް މާގޯ ރޮބީއަށް ވަނީ އެވޯޑު ލިބިފައެވެ. އަދި ޑައިރެކްޓަރު ގްރެޓާ ގާވިގްއަށް ވެސް ވަނީ އެވޯޑެއް ލިބިފައެވެ.