08 Jan 2024, 23:26
ރާއްޖެ ތަރައްގީއަށް ކުރާ މަސައްކަތުގައި ޗައިނާއަކީ މުހިންމު ބައިވެރިއެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ޗައިނާގެ ރައީސް ޝީ ޖިން ޕިންގެ ރަސްމީ ދައުވަތުފުޅަކަށް، އެގައުމަށް ވަޑައިގެންނެވި ރައީސް މުއިއްޒުގެ އަރިހަށް ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ ލިމިޓެޑް (ސީސީސީސީ)ގެ އިސްވެރިން ވަނީ އިހުތިރާމުގެ ޒިޔާރާތެއް ކޮށްފައެވެ.
ސިނަމާލެ ބުރިޖު އެޅި ކުންފުނި ކަމަށްވާ ސީސީސީސީގެ ވެރިންނާއެކު ބޭއްވެވި ބައްދަލުވުމުގައި ރައީސް ވަނީ، ދެ ފަރާތުން އިސްކަންދޭ މުހިންމު ދާއިރާތަކުން އިތުރަށް ގުޅުން ބަދަހިކުރުމާ ގުޅޭގޮތުން މަޝްވަރާކުރައްވާފައި ކަމަށް ރައީސް އޮފީހުން ބުންޏެވެ.
މީގެ އިތުރުން ދެ ގައުމުގެ ދެމެދު ވިޔަފާރިއާއި އިގުތިސާދީ ދާއިރާއިން އޮތް ގުޅުންތައް އިތުރަށް ބަދަހިކުރުމަށް މަސައްކަތް ކުރައްވާނެ ކަމަށް ރައީސް ވިދާޅުވި ކަމަށް އެ އޮފީހުން ބުންޏެވެ.
އެ ބައްދަލުވުމުގައި ސީސީސީސީގެ އިސްވެރިން ވަނީ ރާއްޖެއިން ޗައިނާއަށް ލިބެމުން އަންނަ އެއްބާރުލުމަށް ޝުކުރުއަދާކޮށްފައެވެ. އަދި ރާއްޖޭގެ ތަރައްގީއަށް ކުރިއަށް ރާވާފައިވާ މަސައްކަތްތަކުގައި ބައިވެރިވެ، މަސައްކަތް ކުރުމުގެ ޝައުގުވެރިކަން ހުރިކަން އެ ބޭފުޅުން ފާހަގަކުރި ކަމަށް ރައީސް އޮފީހުން ބުންޏެވެ.
މީގެ އިތުރުން ސަރުކާރުން ކުރަމުންދާ މަސައްކަތްތަކާއެކު، ރާއްޖޭގެ ކުރިމަގު އުޖާލާ ވާނެ ކަމުގެ ޔަގީން އޮތް ކަން ވެސް އެ ބޭފުޅުން ފާހަގަކުރެއްވި ކަމަށް ރައީސް އޮފީހުން ބުންޏެވެ.
އެ ބައްދަލުވުމުގައި ރައީސާއެކު ތިއްބެވި ބޭފުޅުންގެ ތެރޭގައި ޓުއަރިޒަމް މިނިސްޓަރު އިބްރާހީމް ފައިސަލާއި ފިޝަރީސް މިނިސްޓަރު އަހުމަދު ޝިޔާމާއި ޑިފެންސް މިނިސްޓަރު ޣައްސާން މައުމޫނާއި ފޮރިން މިނިސްޓަރު މޫސާ ޒަމީރާއި ރައީސްގެ ޓްރޭޑް އެންޑް އިންވެސްޓްމެންޓް ޕްރިންސިޕަލް އެޑްވައިޒަރި މުޙައްމަދު އަލީ ޖަނާހު ހިމެނެއެވެ.