08 Jan 2024, 23:48
ޕީއެންސީގެ ޓިކެޓްގައި މާލޭ ސިޓީ މޭޔަރު ކަމަށް ވާދަކުރައްވާ އައިޝަތު އާޒިމާ ޝަކޫރު، ރައީސް ޑރ. މުޙައްމަދު މުޢިއްޒުގެ ފަހަތްޕުޅުގައި ހުންނަވާނަމަ މާލޭގެ ރައްޔިތުން ނުދެކޭ ފަދަ ތަރައްގީއެއް ފެންނާނެ ކަމަށް ނައިބު ރައީސް ޙުސައިން މުޙައްމަދު ލަތީފް މިރޭ ވިދާޅުވެއްޖެއެވެ.
މިރޭ ގަލޮޅު ކަންމަތީގައި އޮތް ކެމްޕެއިނު ޖަލްސާގައި ވާހަކަ ދައްކަވަމުން ނައިބު ރައީސް ވިދާޅުވީ، ރައީސްގެ ފަހަތްޕުޅުގައި، މާލޭ ސިޓީގެ މޭޔަރަކަށް އާޒިމާ ހުންނަވާ ނަމަ މާލޭ ސިޓީއަކީ އަމާން ތަނަކަށްވެ، ރައްޔިތުން ދިރިއުޅެވޭ ފަދަ ފެންވަރުގެ ތަނަކަށް ވާނެ ކަމަށެވެ.
އެ މަނިކުފާނު ވިދާޅުވީ، ރައީސް މުއިއްޒު މާލޭގެ މޭޔަރުކަން ކުރެއްވި ދުވަސްތަކުގައި ތަފާތު ދައްކަވާފައިވާ ކަމަށެވެ.
މިރޭ އޮތް ކެމްޕެއިން ޖަލްސާގެ ތެރެއިން-- ސަން ފޮޓޯ: އިންފިނިޓް މޮމެންޓްސް/ އަހުމަދު އަމަން ލަތީފް
"ވައުދުވެ ވަޑައިގެންނެވި ގޮތަށް މާލޭގެ ރައްޔިތުންނަށް ގިނަގުނަ ކަންތައްތަކެއް، އެ ބޭފުޅާއަށް ކޮށްދެވެން އޮތް ނިސްބަތަކުން، ގާނޫނީ އިމުގެ ތެރެއިން ސަރުކާރަށް ނުފޫޒު ނުފޮރުވޭ ގޮތަށް ކަންކަން ވަނީ ރައްޔިތުންނާ ހަމައަށް ތަންފީޒުކޮށްދެއްވައިފަ،" ނައިބު ރައީސް ވިދާޅުވިއެވެ.
އެހެން ނަމަވެސް ސަރުކާރުގެ ނުފޫޒާއި މަޖިލީހުގައި އޮތް ބާރުގެ ސަބަބުން ރައީސަށް މޭޔަރުކަމުގައި ގިނަ ކަންތައްތަކެއް ނުކުރެވި ހުރިކަން އެމަނިކުފާނު ފާހަގަކުރެއްވިއެވެ.
ނައިބު ރައީސް ވިދާޅުވީ، ކުރިއަށް އޮތް މާލޭ ސިޓީ ކައުންސިލް އިންތިޚާބަކީ، މޭޔަރެއްގެ ގޮތުގައި ހުންނަވައި ރައީސް ގެންނަން ބޭނުންފުޅުވި ތަރައްގީ ގެންނަން ލިބިފައި އޮތް ރަނުގެ ފުރުސަތެއް ކަމަށެވެ.
މިރޭ އޮތް ކެމްޕެއިން ޖަލްސާގެ ތެރެއިން-- ސަން ފޮޓޯ: އިންފިނިޓް މޮމެންޓްސް/ އަހުމަދު އަމަން ލަތީފް
އާޒިމާއަކީ ރައީސާއެކު އެ ތަރައްގީ ގެނެވޭނެ ފެންވަރުގެ ކެންޑިޑޭޓެއް ކަމަށް އެމަނިކުފާނު ވިދާޅުވިއެވެ.
މިއަންނަ ހޮނިހިރު ދުވަހު މާލޭ މޭޔަރު ހޮވުމުގެ އިންތިޚާބު އޮންނައިރު މި މަގާމަށް ފަސް ކެނޑިޑޭޓަކު ވާދަ ކުރައްވައެެވެ. އެއީ އާޒިމާގެ އިތުރުން އެމްޑީޕީގެ ކެންޑިޑޭޓް އާދަމް އާޒިމާއި ދަ ޑިމޮކްރެޓްސްގެ ކެންޑިޑޭޓް ސައިފް ފާތިހާއި ކުރީގެ ރައީސް އަބްދުﷲ ޔާމީން އުފައްދާ ޕީޕަލްސް ނެޝަނަލް ފްރޮންޓްގައި އިސްކޮށް ހަރަކާތްތެރިވާ ކުރީގެ ފުލުސް ކޮމިޝަނަރު ހުސައިން ވަހީދުގެ އިތުރުން އަމިއްލަ ގޮތުން ވާދަ ކުރައްވާ ޝުއައިބު އަލީ (ފުރަހަނި ޝުއައިބު) އެވެ.