08 Jan 2024, 22:21
އިންޑިއާއިން ރާއްޖެއަށް އަންނަން ޓިކެޓް ނަގާފައިވާ ގިނަ އަދަދެއްގެ މީހުން ޓިކެޓް ކެންސަލް ކުރަމުންދާ ކަމަށް ބުނެ ފަތުރާ ވާހަކަތައް، އިންޑިއާގެ އެންމެ ބޮޑު އެއާލައިން ކަމަށްވާ އިންޑިގޯއިން ދޮގުކޮށްފިއެވެ.
އިންޑިއާގެ ވިއޯން ނޫހުން އިންޑިގޯގެ މަސްދަރަކާ ހަވާލާދީ ރިޕޯޓުކޮށްފައިވާ ގޮތުގައި، ރާއްޖެއަށް އަންނަން ނަގާފައި ހުރި ގިނަ އަދަދެއްގެ ޓިކެޓް ފާއިތުވި ދުވަސްތަކުގައި ކެންސަލްކުރާ ކަމަށް ވާހަކަ ފެތުރުނު ނަމަވެސް، އެފަދަ ކަމެއް އެ އެއާލައިނަށް ފާހަގަވެފައެއް ނުވެއެވެ. ނަމަވެސް އެކަމާ ގުޅޭ އިތުރު ތަފުސީލެއް އިންޑިގޯއިން ނުދޭ ކަމަށް އެ ނޫހުގައިވެއެވެ.
ވިއޯންގައިވާ ގޮތުން އެ ނޫހުން އެޔާ އިންޑިއާއާ ވެސް ސުވާލުކުރި ނަމަވެސް އެ އެއާލައިނުން ޖަވާބެއް ދީފައެއް ނުވެއެވެ.
އެކަމާ ގުޅޭ ގޮތުން ވިސްތާރާ އެއާލައިންގެ ޗީފް ކޮމާޝަލް އޮފިސަރު ދީފަކް ރަޖަވާތު ވިދާޅުވީ، އެ އެއާލައިނުން ރާއްޖެއަށް ދާން އޮތް އެއްވެސް ފްލައިޓެއް ކެންސަލްކޮށްފައި ނުވާ ކަމަށާއި ދަތުރުތަކަށް އޮތް ޑިމާންޑު މޮނިޓާ ކުރަމުންދާ ކަމަށެވެ.
އިންޑިއާގެ ބޮޑުވަޒީރު ނަރެންދުރަ މޯދީ އެގައުމުގެ ލަކްޝަދުވީޕްއަށް ވަޑައިގެން އެ ރަށްތައް އިޝްތިހާރު ކުރެއްވުމުން، އެ ސަރުކާރަށް ތާއިދު ކުރާ ބައެއް ފަރާތްތަކުން ވަނީ އެއީ ރާއްޖޭގެ ބަދަލުގައި އެ ރަށްތަކަށް އިންޑިއާގެ މީހުން ޒިޔާރަތް ކުރުމަށް ބޮޑުވަޒީރު ގޮވާލެއްވުމުގެ ގޮތުގައި ސިފަކޮށްފައެވެ. އެއާއެކު، ޔޫތު މިނިސްޓްރީގެ ނައިބު ވަޒީރުންތަކެއް ހިމެނޭ ގޮތަށް ބައެއް ދިވެހިން ވަނީ އިންޑިއާގެ ރައްޔިތުންނާއި މޯދީއަށް ކުޑައިމީސްކޮށް މީސްމީޑިއާގައި ވާހަކަދައްކައިފައެވެ.
އެކަމާ ނުރުހުންވެ އިންޑިއާގެ ބައެއް ރައްޔިތުން މިހާރު އަންނަނީ ރާއްޖެ ބޮއިކޮޓް ކުރުމަށް މީސްމީޑިއާގައި ގޮވާލަމުންނެވެ.
އިންޑިއާއަކީ ރާއްޖެއަށް އަބަދުވެސް އެންމެ ގިނައިން ފަތުރުވެރިން އަންނަ އެއް ގައުމެވެ. އެގޮތުން މިދިޔަ އަހަރު ވެސް ދެ ލައްކައަށް ވުރެ ގިނަ ފަތުރުވެރިން އައި އިރު މިއަހަރުގެ ފުރަތަމަ ކްރޫޒްލައިނާ ވެސް އައީ އިންޑިއާއިންނެވެ.