09 Jan 2024, 00:29
އެންބީއޭ ބާސްކެޓްބޯޅަ މުބާރާތުގައި އެންމެ ފަހުގެ ޗެމްޕިއަން ޑެންވާ ނަގެޓްސް އާއި ޑެޓްރޮއިޓް ޕިސްޓަންސް ބައްދަލުކުރި މެޗު ނަގެޓްސް ކާމިޔާބުކޮށްފިއެވެ.
ޑެންވާގެ ބޯލް އެރީނާގައި ކުޅުނު މިމެޗު ނަގެޓްސް ކާމިޔާބު ކޮށްފައިވަނީ 131 ޕޮއިންޓް 114 ޕޮއިންޓުންނެވެ. މިމެޗުގައި ނަގެޓްސްގެ ޖަމާލް މަރީވަނީ 37 ޕޮއިންޓް ހޯދައިދީ ފަސް ރީބައުންޑް ނަގައިދީ ހަތަރު އެސިސްޓް ކޮށްފައެވެ. އަދި ޕިސްޓަންސްއަށް އެންމެ ރަނގަޅު ކުޅުމެއް ދެއްކީ 20 ޕޮއިންޓް ހޯދައިދީ ފަސް ރީބައުންޑް ނަގައިދީ ހަތަރު އެސިސްޓް ދިން ޖަލެން ޑުރެންއެވެ.
މިމުބާރާތުގައި ނިއުއޯލިއަންސް ޕެލިކަންސް އާއި ސެކްރެމެންޓޯ ކިންގްސް ބައްދަލުކުރިމެޗު ރަށުން ބޭރުގައި 133 ޕޮއިންޓް 100 ޕޮއިންޓުން ކާމިޔާބު ކޮށްފައިވަނީ ޕެލިކަންސްއެވެ. މިމެޗުގައި ޕެލިކަންސްގެ ސީޖޭ މެކްކޮލަމް ވަނީ 30 ޕޮއިންޓް ހޯދައިދީ ހަތް ރީބައުންޑް ނަގައިދީ ހަތަރު އެސިސްޓް ކޮށްފައެވެ. އަދި ކިންގްސްއަށް އެންމެ ރަނގަޅު ކުޅުމެއް ދެއްކީ 17 ޕޮއިންޓް ހޯދައިދީ 10 ރީބައުންޑް ނަގައިދީ ހަ އެސިސްޓް ދިން ޑޮމާންޓާސް ސަބޮނިސްއެވެ.
މީގެ އިތުރުން ޑެލަސް މެވްރިކްސް އާއި މިނެސޯޓާ ޓިމްބާވުލްވްސް ބައްދަލުކުރިމެޗު 115 ޕޮއިންޓް 108 ޕޮއިންޓުން ކާމިޔާބުކުރީ މެވްރިކްސްއެވެ. މިމެޗުގައި މެވްރިކްސްގެ ކައިރީ އާވިންވަނީ 35 ޕޮއިންޓް ހޯދައިދީ އަށް ރީބައުންޑް ނަގައިދީ ފަސް އެސިސްޓް ކޮށްފައެވެ. އަދި ވުލްވްސްއަށް އެންމެ ރަނގަޅު ކުޅުމެއް ދެއްކީ 36 ޕޮއިންޓ ހޯދައިދީ 10 ރީބައުންޑް ނަގައިދީ ތިން އެސިސްޓް ދިން އެންތަނީ އެޑްވާޑްސްއެވެ.
މި މުބާރާތުގައި ކުޅުނު އެހެން މެޗުތަކަށް ބަލާލައިރު ކްލީވްލަންޑް ކެވެލިއާސް އާއި ސެން އެންޓޯނިއޯ ސްޕާސް ބައްދަލުކުރިމެޗު 117 ޕޮއިންޓް 115 ޕޮއިންޓުން ކެވެލިއާސް ކާމިޔާބު ކޮށްފައިވާއިރު ޕޯޓްލަންޑް ޓްރެއިލް ބްލޭޒާސް އާއި ބްރޫކްލިން ނެޓްސް ބައްދަލުކުރިމެޗު ރަށުން ބޭރުގައި އޯވާ ޓައިމް ކުޅެ 134 ޕޮއިންޓް 127 ޕޮއިންޓުން ކާމިޔާބު ކޮށްފައިވަނީ ޓްރެއިލް ބްލޭޒާސްއެވެ. އޯލާންޑޯ މެޖިކް އާއި އެޓްލާންޓާ ހޯކްސް ބައްދަލުކުރިމެޗު 117 ޕޮއިންޓް 110 ޕޮއިންޓުން މެޖިކް ކާމިޔާބު ކުރިއިރު މެމްފިސް ގްރިޒްލީސް އާއި ފީނިކްސް ސަންސް ބައްދަލުކުރި މެޗު 121 ޕޮއިންޓް 115 ޕޮއިންޓުން ކާމިޔާބު ކޮށްފައިވަނީ ގްރިޒްލީސްއެވެ.
މީގެ އިތުރުން ޓޮރޮންޓޯ ރެޕްޓާސް އާއި ގޯލްޑަން ސްޓޭޓް ވޮރިއާސް ބައްދަލުކުރި މެޗު 133 ޕޮއިންޓް 118 ޕޮއިންޓުން ރެޕްޓާސް ކާމިޔާބު ކުރިއިރު ލޮސް އެންޖަލިސްއަށް ނިސްބަތްވާ ދެޓީމް ކަމަށްވާ ލޭކާސް އާއި ކްލިޕާސްގެ ކުރިމަތިލުން 106 ޕޮއިންޓް 103 ޕޮއިންޓުން ކާމިޔާބުކުރީ ލޭކާސްއެވެ.