09 Jan 2024, 00:16
އަނިޔާގައި ގިނަ ދުވަސްތަކެއް ހޭދަކޮށްފައިވާ ބެލްޖިއަމްގެ ކެވިން ޑިބްރުއިނާގެ އެނބުރި އައުން އޭނާ ކުޅޭ އިންގްލިޝް ޕްރިމިއާ ލީގުގެ ޗެމްޕިއަން މެންޗެސްޓާ ސިޓީއިން ކާމިޔާބީއަކުން ފާހަގަކޮށްފިއެވެ.
ސިޓީއިން ކާމިޔާބު ކޮށްފައިވަނީ އިނގިރޭސި އެފް އޭ ކަޕްގެ ތިންވަނަ ބުރުގައި ޗެމްޕިއަންސްޝިޕްގެ ހަޑަސްފީލްޑް ޓައުންއާ ބައްދަލުކުރި މެޗް ފަސް ލަނޑު ސުން ލަނޑުންނެވެ. އެންމެ ފަހުގެ ޗެމްޕިއަން ސިޓީގެ މެދުތެރެއަށް ކުޅޭ އެޓީމްގެ އެންމެ މުހިންމު އެއް ކުޅުންތެރިޔާ ކަމަށްވާ ޑި ބްރުއިނާއަށް އަނިޔާ ވެފައިވަނީ މިސީޒަންގެ ފުރަތަމަ މެޗްގައެވެ.
އެ މެޗަށްފަހު އޭނާ ފުރަތަމަ ފަހަރަށް ކުޅުމުގެ ތެރެއިން ފެނުނީ މިމެޗްގެ 57 ވަނަ މިނެޓްގައި ބަދަލު ކުޅުންތެރިއެއްގެ ގޮތުގައެވެ. މިމެޗްގެ ދެވަނަ ހާފްގައި އޭނާ ވޯމް އަޕް ކުރަން ފެށުމާއެކު ސިޓީ ސަޕޯޓަރުންގެ އަޑު ގަދަވެ އޭނާއަށް އެސަޕޯޓަރުންގެ ހިތުގައި އޮތް ލޯބި ހާމަކުރަން ފެށިއެވެ.
ސިޓީގެ ކޯޗް ޕެޕް ގާޑިއޯލާ ހާމަކުރިގޮތުގައި އޭނާއަކީ އެންމެ ލޯބި ލިބޭ އެންމެ މަޤްބޫލު ކުޅުންތެރިއާއެވެ. އަދި އޭނާ އެނބުރި އައުމުން މުޅި ޓީމު އުފާކުރާ ކަމަށް އޭނާ ހާމަކުރިއެވެ. ހަޑަސްފީލްޑްއާ ދެކޮޅަށް ކުޅުނު މެޗްގައި ސިޓީއިން ކާމިޔާބުކުރި ފަސް ލަނޑުގެ ތެރެއިން ހަތަރު ވަނަ ލަނޑު ޖެހުމަށް އުފެއްދި ހަމަލާގައި ބައިވެރިވުމުގެ އިތުރުން ފަސް ވަނަ ލަނޑު ޖަހާފައިވަނީ އޭނާ ތަނަވަސްކޮށްދިން ފުރުސަތަކުންނެވެ.
ނަމަވެސް ޕެޕް ބުނީ ޑި ބްރުއިނާ ކުރީގެ ފެންވަރަށް އެނބުރި ދިއުމަށްޓަކައި އަދި ދުވަސް ނަގާނެ ކަމަށާއި އޭނާއަށް ގިނަ ފަރިތަކުރުންތަކެއް ލިބުން މުހިންމު ކަމަށެވެ.
ޑި ބްރުއިނާ ހާމަކުރިގޮތުގައި އޭނާއަށް އަނިޔާވުމުން އެންމެ ފުރަތަމަ ގިނަ ދުވަސްތަކަކަށް ކުޅުމާ ދުރަށްދާން ޖެހުމުން ދެރަވި ކަމަށާއި ނަމަވެސް ފަހުން އޭނާއަށް ކުޅުމާއި ދުރުގައި ހޭދަކުރަން ލިބުނު ދުވަސް ތަކުގެ ބޭނުން ވަރަށް ރަނގަޅަށް ހިފިފައިވާކަމަށެވެ. މިގޮތުން ކުރިން ކުޅުމާހެދި އާއިލާ އާއި ރައްޓެހިންނާއެކު ހޭދަނުކުރެވި ދިޔަ ވަގުތު އެފަރާތްތަކަށް ދެވުނު ކަމަށް އޭނާ ބުންޏެވެ. ނަމަވެސް މިހާރު މިއީ އަނެއްކާ ކުޅުމަށް ސަމާލުކަން ދޭން ޖެހޭ ވަގުތު ކަމަށާއި އެހެން ކަމުން ކުރިއަށް އޮތް ދުވަސްތަކުގައި އޭނާ ކުރީގެ ފެންވަރަށް ދިއުމަށް ގިނަ މަސައްކަތް ތަކެއް ކުރާނެކަމަށް އޭނާ ހާމަކުރިއެވެ.