09 Jan 2024, 00:10
ބިންވެރިޔާ ސްކީމުގެ ދަށުން މާލެ ސަރަހައްދުން ގޯއްޗަށް އެދި ހުށަހަޅާފައިވާ ފަރާތްތަކުގެ ތެރެއިން މިހާތަނަށް ގޯތީގެ އެއްބަސްވުން ހަވާލުކޮށް، ގޯތި ހަވާލު ނުކުރެވިވާ ފަރާތްތަކަށް ގޯތި ހަވާލުކުރުމުގެ މަސައްކަތް އަލުން ފަށައި މިއަދު 18 ގޯއްޗެއް ހަވާލުކޮށްފިއެވެ.
ކުރީގެ ސަރުކާރުން ކުރިއަށްގެންދިޔަ ބިންވެރިޔާ ސްކީމްގެ ދަށުން މާލެ ސަރަހައްދުން ދޫކުރަން ނިންމާފައިވާ ގޯތީގެ ރަޖިސްޓަރީ އާއި ބިން ހަވާލުކުރުމުގެ މަސައްކަތް މި ސަރުކާރުން ފަށައިފައިވާކަން މި މަހުގެ ތިން ވަނަ ދުވަހު އެ މިނިސްޓްރީން އިއުލާންކުރިއެވެ.
ހައުސިން މިނިސްޓްރީން މި މަހުގެ ތިން ވަނަ ދުވަހު ގެޒެޓުކުރި އިއުލާނެއްގައި ބުނީ ގޯތީގެ އެއްބަސްވުމުގައި ސޮއިކުރުމަށް ހަމަޖެހިފައިވާ ފަރާތްތަކަށް ހާޒިރުވާނެ ތާރީޚާއި ގަޑިއާއި ތަން ފޯނަށް އެސްއެމްއެސްގެ ޒަރިއްޔާއިން އަންގާނެ ކަމަށެވެ.
މީގެ އިތުރުން މިހާތަނަށް ހަވާލުކޮށްފައިވާ ގޯތީގެ ރަޖިސްޓަރީ ނުވަތަ އެއްބަސްވުމުގައި މައްސަލައެއް ފާހަގަ ކުރެވޭނަމަ ހައުސިން މިނިސްޓްރީއަށް ހުށަހެޅުމުން އެކަން އިސްލާހުކުރާނެ ކަމަށް ވެސް އެ މިނިސްޓްރީން ނެރުނު އިއުލާނުގައި ވެއެވެ.
މިދިޔަ ހަފުތާގެ އަންގާރަ ދުވަހު ރައީސް ޑރ. މުހައްމަދު މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ މި ހަފުތާގެ ތެރޭގައި ގޯއްޗާއި ފްލެޓްވެރިންނަށް ރަޖިސްޓްރީ ހަދައިދީ ނިންމުމުގެ މަސައްކަތް ކުރިއަށްގެންދާނެ ކަމަށެވެ.
އެ މަނިކުފާނު ވިދާޅުވީ ގޯތި ދީފައިވާ ބައެއް ތަންތަނަކީ ނުހިއްކާ ހުރި ތަންތަން ކަމުން އެތަންތަން ހިއްކުމުގެ މަސައްކަތް ބާރަށް ކުރިއަށް ދާ ކަމަށެވެ. މީގެއިތުރުން، ގުޅީފަޅާއި ގިރާވަރު ފަޅުން އިތުރަށް ބިން ހިއްކުމަށް ތައްޔާރު ވަމުން އަންނަ ކަމަށް ވެސް އެމަނިކުފާނު ވިދާޅުވިއެވެ.
ކުރީ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ވަނީ ނިންމައިފައެވެ. މާލޭ މީހުންނަށް ހުޅުމާލޭންނާއި ގުޅިފަޅުންނާއި ގިރާވަރުފަޅުން ވެސް ގޯތި ދޫކުރަން ވަނީ ހަމަޖެހިފައެވެ.
އެ ދައުރު ނިމުމުގެ ކުރިން ގޯތިތަކުގެ ރަޖިސްޓްރީ ދޭން މަސައްކަތް ކުރި ނަމަވެސް އެ މަސައްކަތް ނިމިފައިނުވެއެވެ.
ކުރީ ސަރުކާރުގެ ގެދޮރުވެރިޔާ ސްކީމްގެ ދަށުން ފުރަތަމަ ހަވާލުކުރަން ނިންމީ 4،000 ފްލެޓެވެ.