08 Jan 2024, 19:06
ތަފާތު އިވެންޓުތައް މެނޭޖުކޮށް، މާކެޓްކުރާ ކުންފުންޏެއް ކަމަށްވާ ޓީޑީއޯ މޯލްޑިވްސްއިން ރާއްޖޭގައި ފުރަތަމަ ފަހަރަށް ބާއްވާ "ބާބަކިއު ޗެލެންޖް"ގެ މީޑީއާ ޕާޓްނަރަކަށް ވުމަށް އެސްއެސްޓީވީއިން މިއަދު އެމްއޯޔޫއެއްގައި ސޮއިކޮށްފިއެވެ.
މި އެމްއޯޔޫގައި އެސްއެސްޓީވީގެ ފަރާތުން ސޮއިކުރެއްވީ ޗީފް ކޮންޓެންޓު އޮފިސަރު މުހައްމަދު ޒަހީނެވެ. ޓީޑީއޯގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރު އަހްމަދު ތޮލާލް ހަސަންއެވެ.
ސޮއިކުރުމަށް ފަހު "ސަން"އާ ވާހަކަދައްކަވަމުން ތޮލާލް ވިދާޅުވީ، އެ ޗެލެންޖުގެ މަގުސަދަކީ ބާބަކިއު ދާއިރާ އިތުރަށް ފުޅާކޮށް ބޭރު ގައުމުތަކުގެ ރަހަތަކާއި ތަފާތު ރަހަތައް ގެނައުން ކަމަށެވެ.
ބާބަކިއު ޗެެލެންޖްގެ މީޑިއާ ޕާޓްނަރަކަށް އެސްއެސްޓީވީ ވުމަށް ޓީޑީއޯ މޯލްޑިވްސް އާއެކު އެމްއޯޔޫގަ ސޮއިކުރުމުގެ ތެރެއިން --- ސަން ފޮޓޯ: އިންފިނިޓް މޮމެންޓްސް/ މުހައްމަދު މާވީ
"އަޅުގަނޑުމެން މި ބަލަނީ ވަރަށް މަޖާ ފެމިލީ އެންޓަޓެއިންމަންޓް އެއްޗެއް ގޮތުގައި ދާނެ ކަމަށް. މިކަހަލަ މުބާރާތެއްގައި ބައިވެރިވުމަކީ ވަރަށް ގިނަ އެޑްވާންޓޭޖްތަކެއް ލިބިގެންދާނެ ކަމެއް،" ތޮލާލް ވިދާޅުވިއެވެ.
އަންނަ ރަމަޟާން މަހު އެސްއެސްޓީވީ މެދުވެރިކޮށް މި މުބާރާތް ކުރިއަށް ގެންދާނީ އަށް އެޕިސޯޑަށް ބަހަލައިގެންނެވެ.
މި ޗެލެންޖު ކުރިއަށްދާނެ ގޮތް ކިޔައިދެއްވަމުން ތޮލާލް ވިދާޅުވީ، ކޮންމެ އެޕިސޯޑެއްގައި ބާބަކިއު ހެދުމަށް ޚާއްޞަ ސްޓައިލެއް ދޭނެ ކަމަށެވެ. އަދި ކޮންމެ އެޕިސޯޑެއްގައިވެސް ބައިވެރިއަކު އެލިމިނޭޓް ވާނެ ކަމަށް އޭނާ ވިދާޅުވިއެވެ.
"އެކަމަކު ފުރަތަމަ އެޕިސޯޑުގައި އެއްވެސް ބައިވެރިއެއް ނުކަޓާނެ. އެ އެޕިސޯޑުގައި އޮންނާނީ ބައިވެރިންގެ ހުނަރު ދައްކާލުން،" ތޮލާލް ވިދާޅުވިއެވެ.
ތޮލާލް ވިދާޅުވީ މި ޗެލެންޖުގެ މީޑީއާ ޕާޓްނަރަކަށް އެސްއެސް މީޑީއާ ޚިޔާރުކުރީ ގިނަ ފައިދާތަކެއް ވާނެ ކަމަށް ބެލެވޭތީ ކަމަށެވެ. އެގޮތުން އެސްއެސް މީޑިއާއިން އޮންލައިންކޮށް، އެޕިސޯޑުތައް ވަގުތުން ބެލޭނެ ކަމަށް އޭނާ ވިދާޅުވިއެވެ.
މިކަމާ ގުޅޭ ގޮތުން ޒަހީން ވިދާޅުވީ، އެ މުބާރާތަކީ އަންނަ ރޯދަމަހު ފެންނާނެ އެންމެ ތަފާތު މުބާރާތަށް ވާނެ ކަމަށެވެ.
ބާބަކިއު ޗެެލެންޖްގެ މީޑިއާ ޕާޓްނަރަކަށް އެސްއެސްޓީވީ ވުމަށް ޓީޑީއޯ މޯލްޑިވްސް އާއެކު އެމްއޯޔޫގަ ސޮއިކުރުމުގެ ތެރެއިން --- ސަން ފޮޓޯ: އިންފިނިޓް މޮމެންޓްސް/ މުހައްމަދު މާވީ
އެއީ ބެލުންތެރިން ޝައުގުވެރިވާނެ ޕްރޮގްރާމަކަށްވެ، ޓީވީ ބަލާ މީހުން ވެސް އިތުރު ވާނެ ކަމަށް ޒަހީން ވިދާޅުވިއެވެ.
ރާއްޖޭގައި ތަފާތު ގޮތްތަކަށް ބާބަކިއު ހަދާކަމަށާއި މުބާރާތެއްގެ ސިފައިގައި މިކަން ކުރަން ފަށަނީ އަލަށްކަން ޒަހީން ފާހަގަކުރެއްވިއެވެ. އަދި މި މުބާރާތަކީ ރިއަލިޓީ ޝޯއެއް ގޮތަށް ގެންދާ ޕްރޮގްރާމެއް ކަމަށާއި މުބާރާތުގެ ޝޫޓިން ކުރިއަށް ދާނީ ރަމަޟާން މަހުގެ ތެރޭގައި ކަމަށް އޭނާ ވިދާޅުވިއެވެ.
އެ ޕްރޮގްރާމަކީ ގިނަ މީހުން ބައިވެރިވާ ޕްރޮގްރާމަކަށް ވާނެ ކަމަށް އުއްމީދު ކުރައްވާ ކަމަށް ވެސް ޒަހީން ވިދާޅުވިއެވެ.
މި ޕްރޮގްރާމްގައި ބައިވެރިވުމުގެ ފުރުސަތު އަންނަ މަހުގެ ފުރަތަމަ ހަފުތާގައި ހުޅުވާލާނެއެވެ.
މި މުބާރާތުގައި ވަނަތަކަށްދާ ބައިވެރިންނަށް ޚާއްޞަ އިނާމުތަކެއް ވަނީ ކަނޑައަޅައިފައެވެ. އެގޮރުން އެއްވަނަ އާއި ދެވަނައަށް ދާ ބައިވެރިންނަށް ފައިސާގެ އިނާމު ލިބޭއިރު ސްޕޮންސަރުންގެ ފަރާތުން ވެސް އިނާމު ދިނުމަށް ނިންމާފައިވެއެވެ.