08 Jan 2024, 16:55
ދުނިޔޭގައި ކުޅޭ އެންމެ ދުވަސްވީ ފުޓްބޯޅަ މުބާރާތް ކަމަށް ގިނަ ބަޔަކު ގަބޫލު ކުރާ އިނގިރޭސި އެފް އޭ ކަޕުގައި ލިވަޕޫލާއި އާސެނަލް ބައްދަލުކުރި މެޗު ކާމިޔާބުކޮށް މި މުބާރާތުގެ ހަތަރު ވަނަ ބުރުން ލިވަޕޫލް ޖާގަ ހޯދައިފިއެވެ.
އާސެނަލްގެ ދަނޑުގައި ކުޅުނު މި މެޗު ލިވަޕޫލުން ކާމިޔާބު ކޮށްފައިވަނީ ދެ ލަނޑު ސުން ލަނޑުންނެވެ.
މި މެޗުގައި ޤައުމީ ޓީމަށް ކުޅެން ދިއުމާއި އަނިޔާގެ ސަބަބުން ދެ ޓީމުގެވެސް މުހިންމު ބައެއް ކުޅުންތެރިންނާއި ނުލާ ކުޅުނު މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އާސެނަލްއެެވެ. ނަމަވެސް މިއާއެކުވެސް ލިވަޕޫލްގެ ޑިފެންސް ފޫއަޅުވާލުމުގައި އާސެނަލްއަށް ދިޔައީ މައްސަލަތަކާއި ކުރިމަތި ވަމުންނެވެ.
މި ގޮތުން އާސެނަލްއަށް މި މެޗުގައި ލަނޑު ޖަހާނެ ރަނގަޅު ފުރުސަތު ލިބި ފުރުސަތު ތަކުގެ ބޭނުން ވަނީ އެންމެ ރަނގަޅު ގޮތުގައި ހިފޭގޮތް ނުވެފައެވެ. ލިވަޕޫލަށް ބަލާލާއިރު އެ ޓީމުންވެސް ވަނީ ލަނޑު ޖަހާނެ ރަނގަޅު ފުރުސަތު ތަކެއް ތަނަވަސް ކޮށްފައެވެ.
ނަމަވެސް މެޗުގެ ފަހު ދިހަ މިނެޓާ ހަމައަށް މިއިން އެއްވެސް ފުރުސަތެއްގެ ބޭނުން ދެ ޓީމުން ކުރެ އެއްވެސް ޓީމަކަށް ކާމިޔާބު ކުރެވެގޮތެއް ނުވިއެވެ. މި މެޗުގެ ލީޑު ލިވަޕޫލުން ނަގާފައިވަނީ މެޗްގެ 80 ވަނަ މިނެޓްގައި ލިބުނު ހިލޭ ޖެހުމަކުންނެވެ.
ރޭގެ މެޗުގައި ލިވަޕޫލް ޓީމުގެ ކެޕްޓަން ކަން ކުރަމުންދިޔަ ޓްރެންޓް އެލެގްޒެންޑާ އަނޯލްޑް ޖެހި މިހިލޭ ޖެހުން އާސެނަލްގެ ގޯލަށް ވަދެފައިވަނީ އެ ޓީމުގެ ޖޭކުބް ކިވިއޯގެ ގައިގާ ޖެހިފާ ބައިކޮޅަށެވެ. އަދި މިމެޗުގައި ލިވަޕޫލްގެ ދެވަނަ ލަނޑު މެޗުގެ އިތުރު ވަގުތުގެ ފަސްވަނަ މިނެޓްގައި ޖަހާދިނީ ލުއިސް ޑިއާޒްއެވެ.
މި ކާމިޔާބީއާއެކު ލިވަޕޫލް މި މުބާރާތުގެ ހަތަރު ވަނަ ބުރުން ޖާގަ ހޯދާފައިވާއިރު ހަތަރު ވަނަ ބުރުގައި ވާދަ ކުރާނެ ޓީމެއް އެނގިގެން ދާނީ މިރޭ ނެގުމަށް ހަމަޖެހިފައިވާ ގުރުއަތުލުމުންނެވެ.