08 Jan 2024, 16:43
އިޓާލިއަން ސެރީއާގައި ޔުވެންޓަސް އާއި ސަލެރްނިޓާނާ ބައްދަލުކުރި މެޗު ޔުވެންޓަސްއިން ކާމިޔާބު ކޮށްފިއެވެ.
ސަލެރްނިޓާނާގެ ދަނޑުގައި ކުޅުނު މި މެޗު ޔޫވޭއިން ކާމިޔާބު ކޮށްފައިވަނީ ފަހަތުން އަރާ ދެ ލަނޑު އެއް ލަނޑުންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެން ދިޔަ މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޔޫވޭއިންނެވެ. މި މެޗުގެ ފުރަތަމަ ހާފުގައި ޔޫވޭއިން މޮޅަށް ކުޅުނު ނަމަވެސް މިހާފުގައި އެ ޓީމަށް ސަލެރްނިޓާނާގެ ޑިފެންސް ފޫއަޅުވާލެވޭ ގޮތެއް ނުވިއެވެ.
ނަތީޖާއަކަށް ވެގެންދިޔައީ ސަލެރްނިޓާނާއިން އުފެއްދި ހަމަލާއެއްގައި އެ ޓީމުން މި މެޗުގެ ލީޑު ނެގުމެވެ. މި ލަނޑު އެ ޓީމަށް ޖަހައިދިނީ 39 ވަނަ މިނެޓްގައި ޖޫލިއޯ މަގިއޮރޭއެވެ.
މި މެޗުގެ ދެވަނަ ހާފުގައި ޔޫވޭއިން ވަނީ އެ ޓީމުގެ ކުޅުން އިތުރަށް ވަރުގަދަ ކޮށް ލަނޑެއް ޖެހޭތޯ ކުރަމުންދިޔަ މަސައްކަތް އިތުރު ކޮށްފައެވެ.
ނަމަވެސް މި މެޗުގައި އިތުރު ލަނޑެއް ފެނުމުގެ ކުރިން ފެނިގެންދިޔައީ ސަލެރްނިޓާނާއަށް މި މެޗުގެ ލީޑު ނަގައިދިން މަގިއޮރޭއަށް ރަތް ކާޑު ދައްކާ ދަނޑުން ފޮނުވާލި ތަނެވެ. ނަތީޖާ އަކަށް ވެގެންދިޔައީ މެޗުގެ 65 ވަނަ މިނެޓްގައި އުފެއްދި ހަމަލާއެއްގައި ޔޫވޭއިން މެޗުގެ ނަތީޖާ ހަމަހަމަ ކުރުމެވެ. މި ލަނޑު އެ ޓީމަށް ކާމިޔާބު ކޮށްދިނީ ސެމިއުލް ލިން ޖޫނިއާއެވެ. އަދި މި މެޗުން ޔޫވޭ މޮޅުވި ލަނޑު އެ ޓީމަށް ކާމިޔާބު ކޮށްދިނީ މެޗުގެ އިތުރު ވަގުތުގައި ޑުސާން ވްލަހޮވިޗްއެވެ.
މި ކާމީޔާބީއާއެކު ޔޫވޭ މިހާރު އުޅެނީ ކުޅުނު 19 މެޗުން ލިބިފައިވާ 46 ޕޮއިންޓާއެކު ތާވަލްގެ ދެ ވަނައިގައެވެ. އަދި މިއާއެކު އިންޓާ މިލާނާއި ދެމެދުގައިވާ ފަރަގު މިހާރުވަނީ ދެ ޕޮއިންޓަށް ކުޑަކޮށްފައެވެ. މި މެޗުން ބަލިވުމުން ސަލެރްނިޓާނާ އުޅެނީ 12 ޕޮއިންޓާއެކު ތާވަލްގެ އެންމެ ފުލުގައެވެ.
މި މުބާރާތުގައި އޭއެސް ރޯމާ އާއި އެޓަލާންޓާ ބައްދަލުކުރި މެޗު އެއް ލަނޑު އެއް ލަނޑުންވީ އެއްވަރެވެ. މި މެޗުގެ ފުރަތަމަ ލަނޑު މެޗުގެ އަށް ވަނަ މިނެޓްގައި އެޓަލާންޓާއިން ޖަހާ ލީޑު ނަގާފައިވަނީކޮށް ރޯމާއިން އެއްވަރު ކޮށްފައިވަނީ 39 ވަނަ މިނެޓްގައި ލިބުނު ޕެނަލްޓީ އަކުންނެވެ.
މި މެޗު އެއްވަރު ވުމުން ރޯމާ މިހާރު އުޅެނީ 29 ޕޮއިންޓާއެކު ތާވަލްގެ އަށް ވަނައިގައެވެ. އަދި އެޓަލާންޓާ އުޅެނީ 30 ޕޮއިންޓާއެކު ތާވަލްގެ ހަ ވަނައިގައެވެ.