08 Jan 2024, 12:59
ސަރުކާރުގެ ތިން ނައިބު ވަޒީރަކު މީސްމީޑިއާގައި އިންޑިއާގެ ބޮޑުވަޒީރު ނަރެންދްރަ މޯދީއަށް ކުޑައިމީސްކޮށް ދެއްކި ވާހަކައަކީ ސަރުކާރުގެ ބަސް ނޫންކަމުގެ ޔަގީންކަން އެ ގައުމުން ރާއްޖެއަށް ކަނޑައަޅުއްވާފައި ހުންނަވައި ސަފީރު މުނޫ މަހާވަރަށް މިއަދު އަރުވައިފިއެވެ.
ނައިބު ވަޒީރުކަމުގައި ތިއްބަވައި، މޯދީއަށް ކުޑައިމީސްކުރި މައްސަލަ ބޮޑުވެ، ތިން ނައިބު ވަޒީރަކު އިއްޔެ ވަނީ ސަސްޕެންޑުކޮށްފައެވެ.
އެ މައްސަލައިގައި ކަންކަން ހިނގައިދިޔަގޮތް ސާފުކޮށްދޭން ސަރުކާރުން މިއަދު ވަނީ އިންޑިއާ ސަފީރު ހާޒިރުކޮށްފައެވެ. ޚާރިޖީ ވުޒާރާގެ ފަރާތުން މުނޫ މަހާވަރާ އެކު ބައްދަލުކުރެއްވީ އެމްބެސެޑާ އެޓް ލާޖު ޑރ. އަލީ ނަސީރު މުހައްމަދެވެ.
ސަރުކާރުގެ އިސް އޮފިޝަލެއް މިއަދު "ސަން"އަށް ވިދާޅުވީ، އެ ބައްދަލުކުރެއްވުމުގައި ސަރުކާރުގެ ފަރާތުން ސަަފީރަށް އެރުވި ޔަގީންކަމަކީ ތިން ނައިބު ވަޒީރުން ދެއްކި ވާހަކައަކީ ސަރުކާރުގެ ބަހެއް ނޫންކަން ކަމަށެވެ. އަދި، ރާއްޖެއިން އަބަދު ވެސް އޮންނާނީ އަވަށްޓެރި އިންޑިއާއާ އެކުގައިކަން އެ ގައުމަށް ކަށަވަރުކޮށްދީފައިވާ ކަމަށް އޭނާ ވިދާޅުވިއެވެ.
މިއަދު ހެނދުނު ރާއްޖެއިން އިންޑިއާއަށް ކަނޑައަޅުއްވާފައި ހުންނަވައި ސަފީރު އިބްރާހިމް ޝަހީބު ވެސް ވަނީ، އިންޑިއާގެ އެކްސްޓާނަލް އެފެއާޒް މިނިސްޓްރީއަށް ހާޒިރުކޮށްފިއެވެ.
ޝަހީބު، އިންޑިއާގެ އެކްސްޓާނަލް އެފެއާޒް މިނިސްޓްރީއަށް ހާޒިރުކޮށްފައިވަނީ މިއަދު ހެނދުނު 9:00 އެހާކަންހާއިރެވެ. އެކަމަކު، އެ މައްސަލައިގައި ސަރުކާރުން މިހާތަނަށް ރަސްމީ ބަހެއް ބުނެފައެއް ނުވެއެވެ.
ންޑިއާގެ ފަތުރުވެރިކަން ޕްރޮމޯޓުކޮށް، މޯދީ ކުރެއްވި ޕޯސްޓަކާ އެކު ބައެއް ނައިބު ވަޒީރުން ހިމެނޭހެން ގިނަ ބަޔަކު ވަނީ މޯދީއާއި އިންޑިއާއަށް ވަރަށް ބޮޑަށް ކުޑައިމީސްވާ ގޮތަށް ވާހަކަދައްކައިފައެވެ. ހާއްސަކޮށް، ތިން ނައިބު ވަޒީރުން މޯދީއަށް ކުޑައިމީސްކުރި މައްސަލަ ވަނީ ވަރަށް ބޮޑަށް ގޯސްވެފައެވެ.
އިންޑިއާގެ ބޮޑެތި މީޑިއާތަކާއި ބޮލީވުޑުގެ ފިލްމީތަރިން ވެސް އަންނަނީ ރާއްޖެ ދަތުރުނުކުރާން ހިތްވަރުދެމުންނެވެ.
މީގެ ކުރިން ވެސް ދިމާވި ބައެއް މައްސަލަތަކުގައި އިންޑިއާގެ ސަފީރުން ރާއްޖޭގެ ޚާރިޖީ ވުޒާރާއަށް ވެސް ހާޒިރުކޮށްފައި އެބަހުއްޓެވެ. އެގޮތުން، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި އޭރު އިންޑިއާގެ ރައްޔިތުންގެ މަޖިލީހުގެ މެންބަރު ސުބްރަމާނިޔަމް ސުވާމީ ރާއްޖެ ހިފަން ޖެހޭކަމަށް ވިދާޅުވުމުން، އޭރު އެ ގައުމުން ރާއްޖެއަށް ކަނޑައަޅުއްވާފައި ހުންނެވި ސަފީރު ހާޒިރުކުރިއެވެ.
ރައީސް ޑރ. މުޙައްމަދު މުއިއްޒު ވެރިކަމަށް ވަޑައިގެންނެވީ އެ ހަރަކާތުގެ މަގުސަދު ފުއްދަވައި، އިންޑިއާ ސިފައިން ފޮނުވާލާނެ ކަމުގެ ރިޔާސީ ވައުދުފުޅާ އެކުގައެވެ. މި ސަރުކާރުން ވަނީ އިންޑިއާ ސިފައިން އަނބުރާ ގެންދިޔުމަށް އެ ގައުމުގެ ސަރުކާރުގައި ރަސްމީކޮށް އެދިފައެވެ.
އިންޑިއާއަކީ ރާއްޖެއަށް އެންމެ ގިނަ ފަތުރުވެރިން އަންނަ އެއް ގައުމެވެ. އެގޮތުން މިދިޔަ އަހަރު ރާއްޖެއަށް އެންމެ ގިނަ ފަތުރުވެރިން އައިސްފައިވަނީ ވެސް އިންޑިއާއިންނެވެ. އެއީ ޖުމްލަ 209،198 ފަތުރުވެރިންނެވެ.