08 Jan 2024, 13:35
ރާއްޖޭގެ އެހެން ރަށްތަކަށް ވުރެ ގުދުރަތީ ތަފާތު ރީތި ކަމެއް ލިބިފައިވާ ހަމައެކަނި ރަށް ކަމުގައިވާ ހދ. ކޭލަކުނުގައި އިކޯ ޓޫރިޒަމް ތަރައްގީކުރުމުގެ ޕްރޮޖެކްޓެއް ހިންގާތީ ތިމާވެށި ރައްކާތެރިކުރުމަށް ވަކާލާތުކުރާ ޖަމިއްޔާއެއް ކަމަށްވާ އީކޯކެއާ މޯލްޑިވްސްއިން ކަންބޮޑުވުން ފާޅުކޮށްފިއެވެ.
އިއްޔެ ސަރުކާރުންވަނީ ކޭލަކުނު އިކޯ ޓޫރިޒަމަަށް ތަރައްގީކުރަން ނިންމިކަން ހާމަކޮށްފައެވެ. އަދި އެ ކަމުގެ އިތުރު މަޝްވަރާ އިކޮނޮމިކް ކައުންސިލުގައި ކުރަމުން އަންނަކަމަށް ވެސް ސަރުކާރުން ބުނެފައިވެއެވެ.
އެއާއެކު އިކޯކެއާ އިން 'އެކްސް' ގައި މިއަދު ކުރި ޕޯސްޓެއްގައި ބުނީ، ކޭލަކުނަކީ ގައުމީ ތަރިކައެއް ގޮތުގައި ހިމާޔަތް ކޮށްފައި އޮންނަން ޖެހޭ ރަށެއް ކަމަށެވެ.
ކޭލަކުނު ޕްރޮޖެކްޓާ ދެކޮޅަށް އީކޯ ކެއާ އިން އަޑުއުފުލައިފި
މި ކަމާ ގުޅިގެން އިކޯކެއާގެ އެޑްވޮކަސީ ޑިރެކްޓަރު މައީދު ޒާހިރު 'ސަން' އާ ވާހަކަ ދައްކަވަމުން ވިދާޅުވީ، 2017 ވަނަ އަހަރު ވެސް އޭރުގެ ސަރުކާރުން އެ ރަށުގައި ރިސޯޓް ގާއިމުކުުރުމަށް ނިންމުމުން އިކޯކެއާއިން އެ ކަމަށް އިންކާރުކުރި ކަމަށެވެ.
" 2017 ވަނަ އަހަރުވެސް އޭރުގެ ސަރުކާރުން އެރަށް ރިސޯޓަކަށް ހެދުމަށް މަޝްވަރާކުރަމުން ގެންދިޔުމުން އަޅުގަނޑުމެން ދެއްކި ވާހަކަ އަކީ އެރަށް އޮތްގޮތަށް ހަލާކުނުކޮށްލާ ބާއްވަން" މައީދު ވިދާޅުވިއެވެ.
އޭނާ ވިދާޅުވީ އެ ޖަމިއްޔާއިން އަބަދުވެސް ބޭނުންވާ ގޮތަކީ އެ މާހައުލީ ނިޒާމުގެ ތަފާތުކަމުގެ ސަބަބުން އެތަނަށް ލޮޅުމެއްނައިސް އަންނަން އޮތް ޖީލުތަކަށް ރައްކާތެރިކޮށް ބޭއްވުން ކަމަށެވެ.
އަދި މައީދު ވިދާޅުވީ ރާއްޖޭގެ އެހެން ރަށްތަކަށް ވުރެ މިރަށް ގުދުރަތީ ގޮތުން ރީތިވުމުން ވެސް މިރަށް ހިމާޔަތް ކުރުމަކީ އެންމެންގެ ޒިންމާއަކަށް ވާންޖެހޭނެ ކަމަށެވެ.
ކޭލަކުނު އީކޯ ޓުއަރިޒަމަށް ތަރައްގީ ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.
ކޭލަކުނަކީ ޖަންގައްޔެއްގައި ހުންނަ ސިފަތައް ހުންނަހެން ރާއްޖޭގައި އޮތް ހަމައެކަނި ރަށެވެ.
އެ ރަށަކީ ކުރީގައި މީހުން ދިރިއުޅުން ރަށެއް ނަމަވެސް މީލާދީ ގޮތުން 1820 ގައި ކުރި ގަދަ ވިއްސާރާގެ ސަބަބުން އެ ރަށް ސުންނާފަތިވެ، އެ ރަށުގައި ދިރިއުޅުނު މީހުން ރަށުން ފައިބައިގެން ދިޔައީ ކަމަށް ތާރީހީ ފޮތްތަކުގައިވެއެވެ.