08 Jan 2024, 11:21
ސަރުކާރުގެ ނައިބު ވަޒީރުންގެ ގޮތުގައި ތިއްބެވި ތިން ބޭފުޅަކު ރަސްމީ އެކައުންޓުން އަވަށްޓެރި އިންޑިއާގެ ބޮޑުވަޒީރު ނަރެންދްރަ މޯދީއަށް ކުޑައިމީސްކޮށް މަލާމާތްކުރި މައްސަލައިގައި, ކަން ހިނގައިދިޔަ ގޮތް ރާއްޖޭގެ ފަރާތުން އޮޅުން ފިލުވައިދިނުމަށް ޓަކައި، ރާއްޖޭގައި ހުންނަވާ އިންޑިއާ ސަފީރު މުނޫ މަހާވަރު މިއަދު މެންދުރުފަހު ފޮރިން މިނިސްޓްރީއަށް ހާޒިރުކުރަން ނިންމައިފިއެވެ.
މުނޫ މަހަވާރު މިނިސްޓްރީއަށް ހާޒިރުކުރަނީ މެންދުރުފަހު 12:00 އަށެވެ.
މުނޫ މަހާވަރު މިއަދު ފޮރިން މިނިސްޓްރީއަށް ހާޒިރުވާން އެންގިއިރު، މިއަދު ހެނދުނު، އިންޑިއާގެ އެކްސްޓާނަލް އެފެއާޒް މިނިސްޓްރީންވަނީ ނިއުދެލީގައި ހުންނަވާ ދިވެހި ސަފީރު، އިބްރާހިމް ޝަހީބު މިއަދު އެ މިނިސްޓްރީއަށް ހާޒިރުކޮށްފައެވެ.
އެއީ ކަން ހިނގައިދިޔަ ގޮތް ސާފުކުރުމަށާއި، އެ ގައުމުގެ ނުރުހުން ފާޅުކުރުމަށެވެ.
ގައުމުތަކުގެ ސަފީރުން ޚާރިޖީ ވުޒާރާއަށް ހާޒިރުކުރަނީ، ކުރިމަތިވާ ކަންކަމުގައި ނުރުހުން ފާޅުކުރުމަށާއި އެ ކަމުގައި އެ ގައުމުން ދެކޭ ގޮތުގެ ސީރިއަސްކަން ހާމަކުރާށެވެ.
ޝަހީބު، އިންޑިއާގެ އެކްސްޓާނަލް އެފެއާޒް މިނިސްޓްރީއަށް ހާޒިރުކޮށްފައިވަނީ މިއަދު ހެނދުނު 9:00 އެހާކަންހާއިރެވެ. އެކަމަކު، އެ މައްސަލައިގައި ސަރުކާރުން މިހާތަނަށް ރަސްމީ ބަހެއް ބުނެފައެއް ނުވެއެވެ.
އިންޑިއާގެ ފަތުރުވެރިކަން ޕްރޮމޯޓުކޮށް، މޯދީ ކުރެއްވި ޕޯސްޓަކާ އެކު ބައެއް ނައިބު ވަޒީރުން ހިމެނޭހެން ގިނަ ބަޔަކު ވަނީ މޯދީއާއި އިންޑިއާއަށް ވަރަށް ބޮޑަށް ކުޑައިމީސްވާ ގޮތަށް ވާހަކަދައްކައިފައެވެ. ހާއްސަކޮށް، ތިން ނައިބު ވަޒީރުން މޯދީއަށް ކުޑައިމީސްކުރި މައްސަލަ ވަނީ ވަރަށް ބޮޑަށް ގޯސްވެފައެވެ.
އިންޑިއާގެ ބޮޑެތި މީޑިއާތަކާއި ބޮލީވުޑުގެ ފިލްމީތަރިން ވެސް އަންނަނީ ރާއްޖެ ދަތުރުނުކުރާން ހިތްވަރުދެމުންނެވެ.