08 Jan 2024, 01:25
ޗައިނާގެ ރައީސް ޝީ ޖިން ޕިންގެ ރަސްމީ ދައުވަތުފުޅަކަށް، ރައީސް ޑރ. މުޙައްމަދު މުއިއްޒު ކުރައްވާ ފުރަތަމަ ރަސްމީ ފުރަމާނަ ދަތުރުފުޅުގައި ބައިވެރިވެ ވަޑައިގެންނެވި ވަޒީރުން, ދަތުރުތަކަށް ކުރާ ހޭދަ ވީހާ ވެސް ކުޑަކުރުމުގެ ގޮތުން އިކޮނޮމީ ކްލާހުގައި ދަތުރުފުޅު ކުރައްވައިފިއެވެ.
ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހީމް ޚަލީލް އެކްސްގައި ހިއްސާކުރެއްވި ވީޑީއޯއެއްގައި ވިދާޅުވީ، ރައީސާއެކު ދަތުރުފުޅުގައި ބައިވެރިވެ ވަޑައިގަންނަވާ ވަފުދު ދަތުރުކުރައްވަނީ ސިންގަޕޯ އެއާލައިނުގެ އިކޮނޮމީ ކްލާހުގައި ކަމަށެވެ.
ރައީސާއެކު ދަތުރުފުޅުގައި ބައިވެރިވެ ވަޑައިގަންނަވާ ވަފުދުގައި ޑިފެންސް މިނިސްޓަރު ޣައްސާން މައުމޫނާއި، ފޮރިން މިނިސްޓަރު މޫސާ ޒަމީރާއި، އިންފްރާންސްޓްރަކްޗާ މިނިސްޓަރު ޑރ. އަބްދުﷲ މުއްތަލިބާއި، ހައުސިން މިނިސްޓަރު ޑރ. އަލީ ހައިދަރު އަދި އާބަންކޯގެ މެނޭޖިން ޑިރެކްޓަރު ފަޒުލް ރަޝީދު ހިމެނިވަޑައިގަންނަވައެވެ.
މި ހުރިހާ ބޭފުޅުން ވެސް ތިއްބެވީ އިކޮނޮމީ ކްލާހުގައެވެ.
މި ދަތުރުފުޅުގައި ރާއްޖެއާއި ޗައިނާއާ ދެމެދު ރަސްމީ މަޝްވަރާތައް ބޭއްވުމަށް ހަމަޖެހިފައިވެއެވެ. އަދި ދެ ގައުމުގެ ދެމެދު އެކި ދާއިރާތަކުން ގުޅުން ބަދަހިކުރުމުގެ މުހިންމު އެއްބަސްވުންތަކުގައި ސޮއިކުރާނެއެވެ.
ރައީސް މުއިއްޒު މީގެ ކުރިން ވިދާޅުވެފައި ވަނީ، އެމަނިކުފާނު ވެސް އަދި ނައިބު ރައީސް ހުސެން މުހައްމަދު ލަތީފް ވެސް ފަސްޓް ކްލާހުގައި ދަތުރު ކުރައްވަން ބޭނުންފުޅު ނުވާކަމަށެވެ.
އަދި ފްލައިޓުގެ ބިޒްނަސް ކްލާހަށްވުރެ މަތީ ލެވެލްއެއްގައި ދަތުރު ކުރައްވަން ބޭނުންފުޅު ނުވާކަމަށް ވެސް އެމަނިކުފާނު ވިދާޅުވިއެވެ.