07 Jan 2024, 21:52
ގެދޮރު ބިނާކުރުމަށް ކުޑަ އިންޓްރެސްޓެއްގައި ދޫކުރުމަށް ހަމަޖެހިފައިވާ ލުއިލޯނު ސްކީމްތައް މާޗު މަހުގެ ނިޔަލަށް އެކުލަވައިލައި ނިންމުމަށް މަސައްލަތް ކުރަމުން އަންނަކަމަށް ސަރުކާރުން މިރޭ ބުނެފިއެވެ.
ސަރުކާރުން މި ކަން ހާމަކުރީ ކެބިނެޓް ބައްދަލުވުމުގައި ނިންމެވި ނިންމެވުންތަށް ހާމަކުރުމަށް ޓަކައި ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައެވެ.
އެގޮތުން ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާހިމް ވިދާޅުވީ، ބޯހިޔާވަހިކަމާއި އުމްރާނީ ތަރައްގީގެ ޓްރަސްޓް ފަންޑެއް ގާއިމްކުރުމާއި ލުއިލޯން ސްކީމް ގާއިމްކުރުމަށް ސަރުކާރުން ނިންމާފައިވާ ކަމަށެވެ.
އެއީ ބޯހިޔާވަހިކަމުގެ މައްސަލަ ހައްލުކުރަން ސަރުކާރުން ގެންގުޅޭ ސިޔާސަތު ތަންފީޒުރުމާއ ގުޅޭގޮތުން ހައުސިން މިނިސްޓްރީން ހުށަހަޅާފައިވާ ކަރުދާހަކާއި ގުޅޭގޮތުން މަޝްވަރާކުރުމަށްފަހު ނިންމި ކަމެއް ކަމަށް އޭނާ ވިދާޅުވިއެވެ.
އިތުރަށް ވާހަކަދައްކަވަމުން އޭނާ ވިދާޅުވީ މި ކަންތައްތަކާ ގުޅޭގޮތުން ފުޅާ ދާއިރާއެއްގައި މަޝްވަރާ ކުރި ކަމަށެވެ. މީގެ އިތުރުން، މިކަމާ ގުޅޭގޮތުން އިކޮނޮމިކް ކައުންސިލްގައި އިތުރަށް މަޝްވަރާ ކުރަން ވަޒީރުންގެ މަޖިލީހުން ނިންމާފައިވާ ކަމަށް ނާޒިމް ވިދާޅުވިއެވެ.
އަދި، އިންޓްރެސްޓް ފަސް ޕަސަންޓަށް ވުރެން މަތި ނުވާނެ ފަދައިން މި ސްކީމްތަށް އެކުލަވާލުމުގައި ތަންފީޒްކުރަމުން ގެންދާނެ ކަމަށް އޭނާ ވިދާޅުވިއެވެ.
ސަރުކާރުގެ ބޭންކިން ނިޒާމުގެ ތެރެއިން، ބޭންކުތަކުން އަތްފޯރާ ފަށުގައި ހައުސިން ލޯނު ލިބޭ ގޮތަށް ހަމަޖެއްސުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އެގޮތުން ލޯނު ދޭނީ ފަސް ޕަސެންޓަށްވުރެ ކުޑަ އިންޓްރެސްޓް ރޭޓެއްގައި ކަމަށް އެ މަނިކުފާނު ވިދާޅުވިއެވެ.
އިސްކަން ދެއްވާނީ ފުރަތަމަ ގެ އަޅާ މީހުންނަށް ނަަމަވެސް ގެ އަޅަން ފަށައި، ހުއްޓިފައި ހުރި މީހުންނަށް ހައުސިން ކޮމްޕްލީޝަން ލޯން ސްކީމް ވެސް ތައާރަފްކުރާނެކަމަށް އޭރު ރައީސް ވިދާޅުވިއެވެ.
އަދި ސަރުކާރުގެ ބަޖެޓުން ވަކި އަދަދެއް އެޗްޑީއެފްސީގެ ހައުސިން ފަންޑަށް އިތުރުކުރެވި އެ ފަންޑު ބޮޑުކުރާނެކަމަށް އޭނާ ވިދާޅުވިއެވެ.