08 Jan 2024, 06:32
ޓީވީ ޝޯ އަދި ކުޑަ ސްކްރީނުތަކުގެ އުފެއްދުންތަކަށް އަމާޒުކޮށް ކުރިއަށް ގެންދާ އެންމެ ޝަރަފުވެރި އެވޯޑު ހަފުލާ "ގޯލްޑެން ގްލޯބްސް"އާ ދިމާކޮށް ހަޅުތާލެއް ހިންގުމަށް ތައްޔާރުވާކަމުގެ އިޝާރާތްތަކެއް ކޮށްފިއެވެ.
ގޯލްޑެން ގްލޯބްސް އިވެންޓު މާދަމާ ބޭއްވުމަށް ހަމަޖެހިފައިވާއިރު މި ހަޅުތާލަކީ ހޮލީވުޑް އިންޑަސްޓްރީގައި އޮތް ބައިބައިވުމާ ގުޅިގެން ކުރިއަށްދާ ހަޅުތާލެކެވެ.
ފަލަސްތީނަށް އިސްރާއިލުން ދެމުންދާ އަނިޔާތަކާއި ގެއްލުންތަކާ އެކު މުޅީ ހޮލީވުޑްގެ ފަތިފުށް ވަނީ ފެނިގެން ގޮސްފައެވެ. މުޅި އިންޑަސްޓްރީގައި ހިންގުމުގެ އިސް ބާރުތަކުގައި ތިބީ ސެމިޓިކް އަދި އިޒްރާއިލަށް ނިސްބަތްވާ ނުވަތަ އިޒްރާއިލަށް ސަޕޯޓު ކުރާ މީހުންނެވެ. ބޮޑެތި ޕްރޮޑަކްޝަން ކުންފުނިތަކުން ވެސް ކަންތައް އޮތީ އެގޮތަށެވެ.
މިހެން ކަންތައް އޮތްއިރު އިޒްރާއީލާ ދެކޮޅަށް އަޑު އުފުލަމުން ގެންދާ ހުރިހާ އެންމެން ވެސް ހިމޭން ކުރެވޭތޯ އަންނަނީ އެތައް ބަޔަކު މަތީގައި ތިބެގެން މަސައްކަތް ކުރަމުންނެވެ. މިކަމުގެ ތެރޭގައި އެތައް ތަރީންނާއި ލިޔުންތެރިން އަދި ޑައިރެކްޓަރުންގެ ވަޒީފާތައް ވެސް ވަނީ ގެއްލިފައެވެ. މި ވަޒީފާ ގެއްލިފައިވަނީ ހަމައެކަނި ފަލަސްތީނަށް ސަޕޯޓު ކުރުމާ ގުޅިގެންނެވެ.
އެކަމާ ގުޅިގެން ފަލަސްތީނަށް ސަޕޯޓު ކުރާ ގިނަ ބަޔަކު މަސައްކަތް ކުރަމުން އަންނަނީ ގޯލްޑެން ގްލޯބްސް އިވެންޓުގައި ހަޅުތާލު ކުރުމަށެވެ. މިއީ ފަލަސްތީނަށް ސަޕޯޓު ކުރާ މީހުންގެ އަޑު އެހުމަށް މަޖުބޫރު ކުރުވާނެ ކަމެއް ކަމަށް އެ މީހުން ގަބޫލު ކުރެއެވެ.
ގޯލްޑެން ގްލޯބްސް އިވެންޓުގައި ހަޅުތާލު ކުރުމަށް އެތައް ބަޔަކު މަސައްކަތް ކުރަމުން އަންނަނީ މިއީ މިދިޔަ އޮކްޓޯބަރު މަހަށް ފަހުގައި ޓެލެވައިޒްކޮށްގެން ބާއްވާ މިފަދަ ފުރަތަމަ ހޮލީވުޑް އިވެންޓަށް ވާތީއެވެ. ގިނަ ބަޔަކަށް އެއް ތަނަކަށް އެއްވެ ބާއްވާ މިއީ ފުރަތަމަ އިވެންޓަށްވާއިރު މި އިވެންޓުގައި އެތައް ބަޔަކު އިޒްރާއިލަށް ސަޕޯޓު ކުރާ މޭރުމުން ވާހަކަ ދެއްކުމަށް އިޝާރާތްތަކެއް ވަނީ ކޮށްފައެވެ.