07 Jan 2024, 22:23
އިނގިރޭސި އެފްއޭ ކަޕްގެ ހަތަރުވަނަ ބުރުން ނިއުކާސަލް ޔުނައިޓެޑް ޖާގަ ހޯދައިފިއެވެ.
މި މުބާރާތުގެ ހަތަރުވަނަ ބުރުން ނިއުކާސަލް ޖާގަ ހޯދީ ތިންވަނަ ބުރުގައި ސަންޑަލަންޑާ ބައްދަލުކުރި މެޗު 3-0ގެ ނަތީޖާއަކުން ކާމިޔާބު ކޮށްގެންނެވެ. ސަންޑަލަންޑްގެ ދަނޑުގައި ކުޅުނު މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފެއްދީ ނިއުކާސަލުންނެވެ.
ވިއާ ޓައިން ޑާބީގެ ގޮތުގައި މަޝްހޫރުވެފައިވާ ތާރީހީ ވާދަވެރިކަމެއް އޮންނަ މި ދެ ޓީމުގެ ކުރިމަތިލުމުގައި ނިއުކާސަލް ފެނުނީ ޗެމްޕިއަންޝިޕްގައި މިހާރު ކުޅެމުންދާ ސަންޑަލަންޑްއަށް ވުރެ ވަރުގަދަކޮށެވެ.
މިގޮތުން ނިއުކާސަލް އިންވަނީ މި މެޗުގެ ފުރަތަމަ ލަނޑު މެޗުގެ 35ވަނަ މިނެޓްގައި ޖަހައި ލީޑު ނަގައިފައެވެ. މި ލަނޑަކީ ނިއުކާސަލްގެ ޖޯލިންޓާން ނަގާދިން ހުރަހެއް ސަންޑަލަންޑްގެ ޑޭން ބަލާޑް ގައިގައިޖެހި ބައިކޮޅަށް ވަން ލަނޑެކެވެ.
މި މެޗުގައި ނިއުކާސަލުން ކާމިޔާބުކުރި ދެވަނަ ލަނޑު ދެވަނަ ހާފްގެ ކުޅުން ފެށިތާ ކުޑަ އިރުކޮޅެއްގެ ތެރޭގައި ކާމިޔާބު ކޮށްދިނީ އެލެގްޒެންޑާ އިސާކްއެވެ. ފަހު ލަނޑު މެޗުގެ ފަހު މިނެޓްގައި ލިބުނު ޕެނަލްޓީއަކުން ކާމިޔާބު ކޮށްދިނީ ވެސް އިސާކްއެވެ.
މި މެޗުގައި ސަންޑަލަންޑްއަށް ލަނޑެއް ނުޖެހުނު ނަމަވެސް ދޭތެރެ ދޭތެރެއިން ހަމަލާ އުފެއްދޭތޯ މަސައްކަތް ކޮށްފައިވެއެވެ.
މި ކާމިޔާބީއާއެކު ނިއުކާސަލް މިހާރު މިވަނީ މި މުބާރާތުގެ ހަތަރުވަނަ ބުރުން ޖާގަ ހޯދައިފައެވެ.
ނިއުކާސަލުން ވަނީ އެ ޓީމު އެންމެ ފަހުން ކުޅުނު އަށް މެޗުގެ ތެރެއިން ހަތް މެޗުން ބަލިވެފައެވެ.